عبرانیوں دے ناں خط
7 مَلکیصدق سالم دا بادشاہ تے خدا تعالیٰ دا کاہن سی۔ جدوں ابراہام بادشاہواں نُوں ہرا کے* واپس آ رہیا سی تے اوہدوں مَلکیصدق اوہنوں ملیا تے اوہنوں برکت دِتی۔ 2 ابراہام نے اوہنوں اپنے مال* دا دَسواں حصہ دِتا۔ مَلکیصدق دے ناں دا مطلب اے: ”نیکی دا بادشاہ۔“ نالے اوہنوں سالم دا بادشاہ وی کہیا جاندا اے جدا مطلب اے: ”سلامتی دا بادشاہ۔“ 3 ایس بارے کوئی معلومات نئیں کہ اوہدے ماں پیو کون سن، اوہ کِدی نسل چوں سی، اوہ کدوں پیدا ہویا تے کدوں مریا۔ اِک لحاظ نال اوہ خدا دے پُتر ورگا سی، ایس لئی اوہ ہمیشاں تک کاہن رہوے گا۔*
4 غور کرو کہ مَلکیصدق ایناں عظیم سی کہ اوہنوں ساڈے خاندان دے سربراہ ابراہام نے اپنے مال چوں سب توں ودھیا چیزاں دا دَسواں حصہ دِتا۔ 5 ایہہ سچ اے کہ لاوی دے پُتراں نُوں کاہن دے طور تے خدمت کرن دی ذمےداری ملی اے۔ نالے شریعت چ حکم دِتا گیا اے کہ اِسرائیلی قوم یعنی اوہناں دے بھرا ای اوہناں نُوں اپنے مال چوں دَسواں حصہ دین بھانویں کہ اوہ وی ابراہام دی نسل چوں نیں۔ 6 پر مَلکیصدق لاوی دے گھرانے چوں نئیں سی۔ فیر وی اوہنے ابراہام کولوں دَسواں حصہ لیا تے اوہنوں برکت دِتی جدے نال وعدے کیتے گئے سن۔ 7 اَسی چنگی طرحاں جاننے آں کہ وڈا چھوٹے نُوں برکت دیندا اے۔ 8 لاوی جنہاں نُوں دَسواں حصہ دِتا جاندا سی، آخر چ مر جاندے سن۔ پر اوس بندے بارے جنہوں دَسواں حصہ دِتا گیا، پاک کلام چ گواہی دِتی گئی اے کہ اوہ زندہ اے۔* 9 ایہہ وی کہیا جا سکدا اے کہ لاوی جنہاں نُوں دَسواں حصہ دِتا جاندا اے، اوہناں نے وی اِک لحاظ نال ابراہام دے ذریعے مَلکیصدق نُوں دَسواں حصہ دِتا 10 کیونکہ جدوں اوہ ابراہام نُوں ملیا تے لاوی نے ابراہام دی نسل چوں حالے پیدا ہونا سی۔
11 موسیٰ دی شریعت دے مطابق لاویاں نُوں کاہناں دے طور تے خدمت کرن دی خاص ذمےداری دِتی گئی سی۔ جے ایس بندوبست دے ذریعے انسان گُناہ توں پاک ہو سکدے تے فیر پاک کلام چ ایہہ کیوں کہیا گیا سی کہ اِک ایہو جیہا کاہن آئے گا جیہڑا مَلکیصدق ورگا ہوئے گا نہ کہ ہارون ورگا؟ 12 ہُن کاہناں دا بندوبست بدل رہیا اے۔ ایس لئی ضروری اے کہ شریعت نُوں وی بدلیا جائے 13 کیونکہ جیس بندے بارے ایہہ گلاں کہیاں جا رہیاں نیں، اوہ لاوی دے قبیلے چوں نئیں اے۔ اوہدے قبیلے دے کسے وی بندے نے کدی وی کاہن دے طور تے قربانیاں نئیں چڑھائیاں۔ 14 سانوں پتہ اے کہ ساڈا مالک یسوع یہوداہ دے قبیلے چوں اے بھانویں کہ موسیٰ نے ایہہ کدی وی نئیں کہیا سی کہ ایس قبیلے چوں کوئی کاہن بنے گا۔
15 ہُن اَسی ایس گل نُوں چنگی طرحاں سمجھ سکنے آں کیونکہ مَلکیصدق ورگا کاہن آ گیا اے۔ 16 شریعت دے مطابق کاہناں نُوں لاوی دے قبیلے چوں چُنیا جاندا سی۔ پر اوہنوں اوس شرط دے مطابق نئیں سگوں ایس لئی چُنیا گیا کیونکہ اوہدے کول اوہ طاقت اے جدی وجہ توں اوہ ہمیشاں تک زندہ رہوے گا۔* 17 ایس لئی پاک کلام چ اوہدے بارے کہیا گیا اے: ”تُوں مَلکیصدق وانگوں کاہن ایں تے ہمیشاں کاہن رہویں گا۔“
18 شریعت چ دِتے کاہناں دے بندوبست نُوں ختم کر دِتا گیا کیونکہ اوہ کمزور تے بےاثر سی۔ 19 شریعت نے کسے نُوں وی گُناہ توں پاک نئیں کیتا۔ پر خدا نے سانوں اِک بہتر امید دِتی اے جدے ذریعے اَسی گُناہ توں پاک ہُنے آں تے اوہدے نیڑے ہو جانے آں۔ 20 نالے خدا نے قسم کھا کے یسوع نُوں کاہن بنایا سی۔ 21 (شریعت دے تحت جیہڑے آدمی کاہن بنے، اوہناں بارے خدا نے قسم نئیں کھادی سی۔ پر یسوع نُوں کاہن بناندے ویلے خدا نے اپنی قسم کھا کے کہیا: ”یہوواہ نے قسم کھادی کہ”تُوں ہمیشاں کاہن رہویں گا“ تے اوہ اپنا ارادہ نئیں بدلے گا۔“) 22 اِنج یسوع اِک بہتر عہد یعنی نویں عہد دی ضمانت بن گیا۔ 23 ایہدے علاوہ ہارون دی نسل چوں جیہڑا وی بندہ کاہن بن دا سی، اوہ موت دی وجہ توں ایہہ خدمت جاری نئیں رکھ سکدا سی۔ ایس لئی اوہدی جگہ کوئی ہور کاہن بن دا سی۔ 24 پر یسوع ہمیشاں تک زندہ رہوے گا۔ ایس لئی کسے ہور کاہن دی ضرورت نئیں ہوئے گی۔ 25 ایہی وجہ اے کہ اوہ اوہناں لوکاں نُوں ہمیشاں دی زندگی دَوا سکدا اے جیہڑے اوہدے ذریعے خدا کولوں دُعا کردے نیں کیونکہ اوہ اوہناں واسطے اِلتجا کرن لئی ہمیشاں زندہ اے۔
26 واقعی سانوں اِک ایہو جہے اعلیٰ کاہن دی ضرورت اے جیہڑا وفادار، بےگُناہ تے پاک اے۔ اوہ گُناہگار انساناں ورگا نئیں اے سگوں اوہنوں اسماناں نالوں اُچا کیتا گیا اے۔ 27 باقی اعلیٰ کاہن پہلاں تے اپنے گُناہواں لئی تے فیر دُوجے لوکاں دے گُناہواں لئی ہر روز قربانیاں چڑھاندے سن۔ پر ساڈے اعلیٰ کاہن نُوں اِنج کرن دی ضرورت نئیں اے کیونکہ اوہنے اپنے آپ نُوں قربان کر کے اِکو وار ہمیشاں لئی گُناہواں دی قربانی چڑھا دِتی اے۔ 28 شریعت دے ذریعے جیہڑے آدمیاں نُوں اعلیٰ کاہن بنایا جاندا سی، اوہناں چ کمزوریاں ہوندیاں سن۔ پر شریعت دے بعد خدا نے قسم کھا کے اپنے پُتر نُوں ہمیشاں لئی اعلیٰ کاہن چُنیا جنہوں ہر لحاظ نال قابل* بنایا گیا اے۔