عبرانیوں دے ناں خط
3 ایس لئی مُقدس بھراوو، تُسی جنہاں نُوں اسمان تے جان لئی بلایا گیا اے، یسوع تے غور کرو جنہوں اَسی قبول کیتا اے تے جیہڑا رسول تے اعلیٰ کاہن اے۔ 2 خدا نے یسوع نُوں مقرر کیتا تے اوہ اوہدا وفادار رہیا جیویں موسیٰ خدا دے گھر چ خدمت* کردے ویلے وفادار رہیا۔ 3 اوہنوں موسیٰ نالوں زیادہ عزت دے لائق ٹھہرایا گیا کیونکہ اِک گھر نالوں بوہتی عزت* اوس بندے نُوں مِلدی اے جنہے گھر بنایا اے۔ 4 بےشک ہر گھر نُوں کسے نہ کسے نے بنایا اے پر جنہے سب کجھ بنایا اے، اوہ خدا اے۔ 5 موسیٰ خدا دے گھر چ اِک وفادار خادم سی تے اوہدی خدمت اوہناں گلاں وَل اشارہ کردی سی جیہڑیاں خدا نے بعد چ دَسنیاں سن۔ 6 پر مسیح خدا دا وفادار پُتر اے تے اوہدے گھر دا نگران اے۔ اَسی خدا دا گھر آں پر ضروری اے کہ اَسی دلیری نال گل کردے رہیے تے اپنی اوس امید نُوں آخر تک مضبوط رکھیے جدے تے سانوں مان اے۔
7 ایس لئی پاک روح دے ذریعے لکھیا گیا: ”اَج جدوں تُسی میری آواز سُنو 8 تے اپنے دِلاں نُوں سخت نہ کرنا جیویں تواڈے پیو دادیاں نے اوس موقعے تے کیتا جدوں اوہناں نے مینوں بڑا غصہ دَوایا۔ اوس دن ویرانے چ اوہناں نے مینوں اَزمایا سی۔ 9 بھانویں کہ اوہناں نے ویرانے چ 40 سالاں تک میرے کم ویکھے پر فیر وی اوہناں نے مینوں اَزمایا تے میرا اِمتحان لیا۔ 10 ایسے لئی مَیں اوس ڈھیٹھ پُشت نال بڑا ناراض ہویا تے مَیں کہیا: ”اوہناں دے دل ہمیشاں گمراہ ہو جاندے نیں تے اوہ میریاں راہواں نُوں نئیں پچھاندے۔“ 11 ایس لئی میں غصے چ قسم کھادی: ”اوہ میرے آرام چ شامل نئیں ہون گے۔““*
12 ایس وجہ توں بھراوو، خبردار رہوو تاکہ ایہہ نہ ہوئے کہ تُسی زندہ خدا توں مُونہہ موڑ لوو تے تواڈا دل ایمان توں خالی ہو جائے تے بُرائی نال بھر جائے۔ 13 پر تُسی ”اَج“ یعنی جدوں تک ساڈے کول موقع اے، ہر روز اِک دُوجے نُوں حوصلہ دیندے رہوو تاکہ گُناہ دی دھوکھا دین والی کشش تواڈے دل نُوں سخت نہ کر دَوے۔ 14 اَسی اوہدوں ای مسیح نال حصےدار بناں گے جدوں اَسی اپنے اوس بھروسے نُوں آخر تک قائم رکھاں گے جیہڑا سانوں شروع چ سی 15 جیویں کہ پاک کلام چ لکھیا اے: ”اَج جدوں تُسی میری آواز سُنو تے اپنے دِلاں نُوں سخت نہ کرنا جیویں تواڈے پیو دادیاں نے اوس موقعے تے کیتا سی جدوں اوہناں نے مینوں بڑا غصہ دَوایا سی۔“
16 اوہ کون سن جنہاں نے خدا دی آواز سُنی پر فیر وی اوہنوں بڑا غصہ دَوایا؟ کیہہ ایہہ سارے اوہی لوک نئیں سن جیہڑے موسیٰ دی رہنمائی چ مصر چوں نکلے سن؟ 17 نالے خدا 40 سالاں تک کِنہاں نال بڑا ناراض رہیا؟ کیہہ ایہہ اوہی نئیں سن جنہاں نے گُناہ کیتا تے جیہڑے ویرانے چ مر گئے؟ 18 نالے خدا نے قسم کھا کے کِنہاں بارے کہیا کہ اوہ اوہدے آرام چ شامل نئیں ہون گے؟ کیہہ ایہہ اوہی لوک نئیں سن جنہاں نے اوہدی گل نئیں منی سی؟ 19 ہاں، اوہناں دا دل ایمان توں خالی سی۔ ایس لئی اوہ خدا دے آرام چ شامل نئیں ہوئے۔