عبرانیوں دے ناں خط
9 پہلے عہد یعنی شریعت چ خدا نے عبادت کرن بارے حکم دِتے سن تے زمین تے اِک پاک جگہ دا اِنتظام وی کیتا سی۔ 2 اوس پاک جگہ تے اِک خیمہ بنایا گیا سی جدے چ دو کمرے سن۔ پہلے کمرے نُوں پاک کمرہ کہیا جاندا سی۔ اوہدے چ شمعدان تے اِک میز سی جدے تے نذرانے دِیاں روٹیاں رکھیاں جاندیاں سن۔ 3 نالے پہلے تے دُوجے کمرے دے وچکار اِک پردہ ہوندا سی۔ دُوجے کمرے نُوں پاک ترین کمرہ کہیا جاندا سی 4 تے اوہدے چ سونے دا بخوردان تے عہد دا صندوق سی جدے ہر پاسے سونا لگیا ہویا سی۔* اوس صندوق چ عہد دِیاں تختیاں سن، سونے دا اِک مرتبان سی جدے چ من سی تے ہارون دی اوہ لاٹھی سی جدے تے کلیاں نکلیاں سن۔ 5 صندوق دے ڈھکن* اُتے دو شاندار کروبی* بنے ہوئے سن۔ پر ہُن ایہناں چیزاں بارے تفصیل نال گل کرن دا وقت نئیں اے۔
6 جدوں خیمہ تیار ہو گیا تے کاہن پاک خدمت کرن لئی ہر روز* پاک کمرے چ جاندے سن۔ 7 پر پاک ترین کمرے چ صرف اعلیٰ کاہن ای سال دے اِک خاص دن تے قربانی دا خون لے کے جاندا سی۔ اوہ اوس خون نُوں اپنے گُناہواں لئی تے لوکاں دے اوہناں گُناہواں لئی خدا اَگے پیش کردا سی جیہڑے اوہناں کولوں انجانے چ ہو جاندے سن۔ 8 ایس بندوبست دے ذریعے پاک روح ظاہر کردی اے کہ پاک ترین کمرے* چ جان دا رستہ اوہدوں تک نئیں کھولیا گیا سی جدوں تک پہلا خیمہ موجود سی۔ 9 خیمے دا اشارہ ساڈے زمانے وَل اے۔ خیمے دے بندوبست دے مطابق جیہڑے نذرانے تے قربانیاں چڑھائیاں جاندیاں نیں، اوہ عبادت کرن والے بندے دے ضمیر نُوں پوری طرحاں پاک صاف نئیں کر سکدیاں 10 کیونکہ ایہناں دا تعلق صرف کھان پین دِیاں چیزاں تے پانی نال پاک صاف کرن دِیاں رسماں نال اے۔ شریعت دے ایہہ حکم انسان نُوں جسمانی طور تے پاک صاف کردے سن تے صرف اوہدوں تک ضروری سن جدوں تک طے کیتے ہوئے ویلے تے اِک بہتر بندوبست قائم نئیں ہو گیا۔*
11 پر ہُن مسیح اعلیٰ کاہن بن گیا اے تے اوہدے ذریعے سانوں بوہت ساریاں برکتاں مِل رہیاں نیں۔ اوہ اوس خیمے* چ گیا جیہڑا زمین تے موجود خیمے نالوں کِتے زیادہ عظیم تے شاندار اے کیونکہ اوہنوں انساناں نے نئیں بنایا۔ 12 پر اوہ کسے بکرے تے وَچھے دے خون نال نئیں سگوں اپنے خون نال اِکو وار ہمیشاں لئی پاک ترین جگہ گیا تاکہ سانوں ہمیشاں لئی نجات دَوائے۔ 13 کاہن بیلاں تے بکریاں دا خون پاکترین کمرے چ چھڑکدا سی۔ نالے ناپاک لوکاں نُوں جسمانی طور تے پاک صاف کرن لئی اوہناں اُتے وَچھی* دی قربانی دی سواہ چھڑکی جاندی سی۔ جے جانوراں دا خون تے سواہ لوکاں نُوں پاک صاف کر سکدے سن 14 تے فیر سوچو کہ مسیح دا خون ساڈے ضمیر نُوں بھیڑے* کماں توں پاک کرن دی کِنّی زیادہ طاقت رکھدا اے۔ اوہنے ہمیشاں قائم رہن والی پاک روح دی رہنمائی چ اپنے آپ نُوں خدا سامنے اِک بےعیب قربانی دے طور تے پیش کیتا تاکہ اَسی زندہ خدا دی عبادت کر سکئے۔
15 ایسے لئی مسیح نویں عہد دا وِچولا اے۔ اوہنے اپنی جان دا فدیہ دے کے اوہناں لوکاں نُوں چھٹکارا دَوایا جنہاں نے پہلے عہد دے خلاف گُناہ کیتے سن۔ خدا نے اوہناں لوکاں نُوں بلایا تے اوہناں نال وعدہ کیتا تاکہ اوہ ہمیشاں دی زندگی دے وارث بنن۔ 16 جدوں انسان تے خدا دے درمیان عہد بنھیا جاندا اے تے وِچولے لئی جان دینا ضروری ہوندا اے 17 کیونکہ اوہدی موت دے بغیر عہد دی کوئی حیثیت نئیں ہوندی۔ جدوں تک عہد دا وِچولا زندہ اے، عہد قائم نئیں ہوندا۔ 18 ایسے لئی پہلا عہد وی خون دے ذریعے ای قائم ہویا سی۔ 19 ایہہ اوہدوں ہویا جدوں موسیٰ نے پوری قوم نُوں شریعت دے سارے حکم دَسے تے فیر وَچھیاں تے بکریاں دا خون پانی چ ملایا تے زوفے دی ٹاہنی اُتے گُوڑھے لال رنگ دی اُن بنھ کے اوس خون نُوں عہد دی کتاب* تے پوری قوم اُتے چھڑکیا 20 تے کہیا: ”ایس خون دے ذریعے خدا نال عہد قائم ہو گیا اے تے خدا چاہندا اے کہ تُسی ایہدے چ دِتے حکماں تے عمل کرو۔“ 21 نالے اوہنے خیمے تے مُقدس خدمت لئی استمال ہون والے بھانڈیاں تے وی خون چھڑکیا۔ 22 شریعت دے مطابق تقریباً ساریاں چیزاں خون نال پاک ہوندیاں نیں تے خون دے بغیر* گُناہ معاف نئیں ہو سکدے۔
23 ایس لئی ضروری سی کہ اوہناں چیزاں نُوں جانوراں دی قربانی دے خون نال پاک کیتا جائے جیہڑیاں اسمانی چیزاں دی نقل سن۔ پر اسمانی چیزاں لئی ایس توں وی بہتر قربانیاں دی ضرورت اے۔ 24 ایس لئی مسیح انساناں دے ہتھاں نال بنے پاک ترین کمرے چ نئیں گیا جیہڑا اصل دی نقل اے سگوں اوہ اسمان تے گیا تاکہ ساڈی خاطر خدا دے سامنے حاضر ہوئے۔ 25 اعلیٰ کاہن ہر سال پاک ترین کمرے چ اپنا نئیں سگوں جانوراں دا خون لے کے جاندا اے۔ پر مسیح نُوں وار وار اپنی قربانی پیش کرن دی ضرورت نئیں اے۔ 26 جے اِنج ہوندا تے اوہنوں دُنیا دی بنیاد رکھن دے ویلے توں لے کے ہُن تک وار وار تکلیف سہنی پیندی۔* پر اوہ ایس آخری زمانے* چ اِکو وار آیا تاکہ اپنی جان دے کے گُناہ نُوں مٹا دَوے۔ 27 ہر انسان نُوں اِکو وار مرنا پیندا اے تے بعد چ اوہدی عدالت ہوئے گی۔ 28 ایسے طرحاں مسیح نُوں وی بوہت سارے لوکاں دے گُناہواں دی خاطر اِکو وار ہمیشاں لئی قربان کیتا گیا۔ جدوں اوہ دُوجی وار آئے گا تے اوہ گُناہ نُوں مٹان لئی نئیں سگوں اوہناں لوکاں نُوں نجات دَوان لئی آئے گا* جیہڑے بےتابی نال اوہدا اِنتظار کر رہے نیں۔