یوحنا نُوں مِلن والا مُکاشفہ

7 ایہدے بعد مَیں زمین دے چار کونیاں تے چار فرشتیاں نُوں کھلوتے ویکھیا جنہاں نے زمین دِیاں چار ہواواں نُوں روکیا ہویا*‏ سی تاکہ زمین، سمندر یاں کسے وی درخت تے ہوا نہ چلے۔ 2 فیر مَیں اِک فرشتے نُوں مشرق وَلّوں*‏ آندے ویکھیا جدے ہتھ چ زندہ خدا دی مُہر سی۔ اوہنے اوہناں چاراں فرشتیاں نُوں آواز دِتی جنہاں نُوں زمین تے سمندر نُوں نقصان پونچان دا اِختیار دِتا گیا سی 3 تے کہیا:‏ ”‏زمین، سمندر یاں درختاں نُوں اوہدوں تک نقصان نہ پونچانا جدوں تک اَسی اپنے خدا دے غلاماں دے متھے تے مُہر نئیں لا دیندے۔“‏

4 فیر مَیں سُنیا کہ جنہاں تے مُہر لائی گئی سی، اوہناں دی تعداد 1 لکھ 44 ہزار اے۔ اوہناں نُوں اِسرائیل دے ہر قبیلے چوں چُنیا گیا اے:‏

9 ایہدے بعد مَیں لوکاں دی اِک وڈی بِھیڑ ویکھی جنہوں کوئی گن نئیں سکدا سی۔ اوہ لوک ساریاں قوماں، قبیلیاں، زباناں تے نسلاں توں سن۔ اوہناں نے چِٹے کپڑے پائے ہوئے سن تے اوہناں دے ہتھاں چ کھجور دِیاں ٹاہنیاں سن۔ اوہ تخت تے میمنے دے سامنے کھلوتے ہوئے سن۔ 10 اوہ لگاتار اُچی اُچی کہہ رہے سن:‏ ”‏اَسی تخت تے بیٹھے اپنے خدا دے تے میمنے دے دِلوں شکرگزار آں کیونکہ اوہناں نے سانوں نجات دَوائی اے۔“‏

11 سارے فرشتے خدا دے تخت، بزرگاں تے چار کروبیاں دے آلے دَوالے کھلوتے سن تے اوہناں نے تخت دے سامنے سجدہ کر کے خدا دی عبادت کیتی۔ 12 اوہ کہہ رہے سن:‏ ”‏آمین!‏ ساڈے خدا دی تعریف، وڈیائی، عزت تے شکرگزاری ہمیشاں ہوندی رہوے تے حکمت، طاقت تے زور ہمیشاں ہمیشاں تک اوہدا رہوے۔ آمین۔“‏

13 ایہہ سُن کے اِک بزرگ نے مینوں پچھیا:‏ ”‏ایہہ لوک جنہاں نے چِٹے کپڑے پائے ہوئے نیں، کون نیں تے کتھوں آئے نیں؟“‏ 14 مَیں فوراً اوہنوں کہیا:‏ ”‏میرے مالک، ایہہ گل تے تُوں جاننا ایں۔“‏ اوہنے کہیا:‏ ”‏ایہہ اوہ لوک نیں جیہڑے وڈی مصیبت توں بچ گئے نیں تے ایہناں نے اپنے کپڑے میمنے دے خون نال دھو کے چِٹے کیتے نیں۔ 15 ایس لئی اوہ خدا دے تخت دے سامنے کھلوتے نیں تے دن رات اوہدی ہیکل چ اوہدی عبادت کردے نیں۔ تخت تے بیٹھا خدا اوہناں دی حفاظت کرن لئی اِک خیمہ بنائے گا۔‏*‏ 16 ہُن توں اوہناں نُوں کدی وی بُھکھ تے پیاس نئیں لگے گی تے نہ ای اوہناں نُوں تیز دُھپ یاں سخت گرمی نقصان پونچائے گی 17 کیونکہ میمنا جیہڑا تخت دے کول کھلوتا اے، اِک چرواہے وانگوں اوہناں دی دیکھ‌بھال کرے گا تے اوہناں نُوں زندگی دین والے پانی دے چشمے کول لے جائے گا تے خدا اوہناں دِیاں اَکھاں دے ہر آنسو نُوں پُونجھ دَوے گا۔“‏