یوحنا نُوں مِلن والا مُکاشفہ
19 ایہناں گلاں دے بعد مَیں اسمان توں اِک اُچی آواز سُنی جیویں اِک وڈی بِھیڑ دی ہوندی اے۔ اوہناں نے کہیا: ”یاہ دی وڈیائی کرو!* ساڈا خدا بڑا عظیم تے طاقتور اے تے اوہ نجات دَواندا اے۔ 2 اوہ سچائی تے اِنصاف نال عدالت کردا اے۔ ایسے لئی اوہنے وڈی طوائف نُوں سزا دِتی جنہے اپنی جنسیبدکاری دی وجہ توں دُنیا نُوں وگاڑ دِتا۔ ہاں، خدا نے اوہدے کولوں بدلہ لیا کیونکہ اوہنے اپنے ہتھ اوہدے غلاماں دے خون نال رنگے سن۔“ 3 اوسے ویلے اوہناں نے دُوجی وار کہیا: ”یاہ دی وڈیائی کرو! بابل دی تباہی دا دُھواں ہمیشاں ہمیشاں تک اُٹھدا رہوے گا۔“
4 فیر 24 بزرگاں تے چار کروبیاں نے گوڈے ٹیک کے تخت تے بیٹھے خدا دی عبادت کیتی تے کہیا: ”آمین! یاہ دی وڈیائی کرو!“
5 نالے تخت توں کسے نے کہیا: ”اَے خدا دے چھوٹے تے وڈے غلامو، جیہڑے اوہدے توں ڈردے او، تُسی سارے اوہدی وڈیائی کرو!“
6 فیر مَیں اِک آواز سُنی جیویں اِک وڈی بِھیڑ، تیزی نال وگدے پانی تے زوردار گرج دی ہوندی اے۔ اوہناں نے کہیا: ”یاہ دی وڈیائی کرو کیونکہ بےحد طاقت والے ساڈے خدا یہوواہ نے بادشاہ دے طور تے حکمرانی شروع کر دِتی اے! 7 آؤ خوش ہوئیے سگوں خوشی نال نچئے تے اوہدی وڈیائی کریئے کیونکہ میمنے دی شادی دا ویلا آ گیا اے تے اوہدی دُلہن تیار ہو گئی اے۔ 8 دُلہن نُوں ودھیا لیلن دے صاف تے شاندار* کپڑے پان لئی دِتے گئے نیں کیونکہ ودھیا لیلن دا اشارہ مُقدس لوکاں دے نیک کماں وَل اے۔“
9 فرشتے نے مینوں کہیا: ”ایہہ لکھ: خوش نیں اوہ لوک جنہاں نُوں میمنے دی شادی چ آن دی دعوت ملی اے۔“ نالے اوہنے مینوں کہیا: ”خدا دِیاں ایہہ گلاں سچیاں نیں۔“ 10 ایہہ سُن کے مَیں اوہدی عبادت کرن لئی اوہدے اَگے سجدہ کیتا۔ پر اوہنے مینوں کہیا: ”خبردار! اِنج نہ کر، صرف خدا دی عبادت کر! مَیں وی اِک غلام آں جیویں تُوں تے تیرے بھرا نیں جنہاں نُوں یسوع بارے گواہی دین دا کم دِتا گیا اے۔ پیشینگوئیاں ایسے لئی کیتیاں گئیاں نیں تاکہ یسوع بارے گواہی دِتی جائے۔“
11 مَیں ویکھیا کہ اسمان کُھل گیا تے مینوں اِک چِٹا گھوڑا نظر آیا۔ اوہدے سوار دا ناں اے: وفادار تے سچا۔ اوہ اِنصاف نال* عدالت کردا اے تے جنگ لڑدا اے۔ 12 اوہدیاں اَکھاں بھڑکدے ہوئے شعلے نیں تے اوہدے سِر تے بوہت سارے تاج نیں۔ اوہدے تے اِک ناں لکھیا اے جنہوں صرف اوہی جان دا اے۔ 13 اوہدے کپڑیاں اُتے خون دے داغ نیں تے اوہدا ناں اے: خدا دا کلام۔ 14 اسمان دِیاں فوجاں چِٹے گھوڑیاں اُتے اوہدے پچھے پچھے آ رہیاں سن تے سارے فوجیاں نے ودھیا لیلن دے چِٹے تے صاف کپڑے پائے ہوئے سن۔ 15 اوہدے مُونہہ چوں اِک لمی تے تیز تلوار نکلی ہوئی سی جدے نال اوہ قوماں نُوں مارے گا تے لوھے دے ڈنڈے نال اوہناں تے حکمرانی کرے گا۔ ایہدے علاوہ اوہ اوہناں دُشمناں نُوں انگوراں وانگوں مِدے گا جنہاں اُتے بےحد طاقت والے خدا دا سخت قہر نازل ہوئے گا۔ 16 اوہدے کپڑیاں اُتے، ہاں، اوہدے پٹ اُتے ایہہ ناں لکھیا ہویا اے: بادشاہواں دا بادشاہ تے مالکاں دا مالک۔
17 فیر مَیں اِک فرشتے نُوں سورج دے سامنے کھلوتے ویکھیا۔ اوہنے اُچی آواز چ اسمان تے اُڈن والے سارے پرندیاں نُوں کہیا: ”ایدھر آؤ، خدا دی وڈی دعوت لئی کٹھے ہو جاؤ 18 تاکہ تُسی بادشاہواں، فوجی کمانڈراں، طاقتور آدمیاں، گھوڑیاں تے اوہناں دے سواراں، آزاد تے غلام، چھوٹے تے وڈے، ہاں، سارے لوکاں دا گوشت کھا سکو۔“
19 فیر مَیں ویکھیا کہ وحشی درندہ، زمین دے بادشاہ تے اوہناں دِیاں فوجاں اوس گُھڑسوار تے اوہدی فوج نال جنگ لڑن لئی جمع ہوئیاں۔ 20 نالے وحشی درندہ تے اوہ جھوٹھا نبی پھڑیا گیا جنہے وحشی درندے دے سامنے نشانیاں وکھا کے اوہناں لوکاں نُوں گمراہ کیتا سی جنہاں نے وحشی درندے دا نشان لوایا سی تے اوہدے بُت دی پوجا کیتی سی۔ اوہناں دونواں نُوں زندہ ای گندھک نال بلدی ہوئی اَگ دی جھیل چ سُٹ دِتا گیا۔ 21 پر باقی سارے لوک اوس لمی تلوار نال مارے گئے جیہڑی گُھڑسوار دے مُونہہ چوں نکلی ہوئی سی تے سارے پرندے اوہناں دا گوشت کھا کے رَج گئے۔