یوحنا نُوں مِلن والا مُکاشفہ
22 اوس فرشتے نے مینوں زندگی دے پانی دا دریا وکھایا جیہڑا شیشے وانگوں صاف شفاف سی۔ اوہ دریا خدا تے میمنے دے تخت توں نکل کے 2 شہر دی وڈی سڑک دے وچکار وگ رہیا سی۔ دریا دے دونویں پاسے زندگی دے درخت لگے ہوئے سن جنہاں تے سال چ باراں وار یعنی ہر مہینے پھل لگدا سی تے اوہناں دے پتیاں توں قوماں نُوں شفا مِلدی سی۔
3 اوس شہر تے کدی وی لعنت نئیں ہوئے گی سگوں خدا تے میمنے دا تخت اوتھے ہوئے گا تے خدا دے غلام اوہدی خدمت کرن گے۔ 4 اوہ اوہدا چہرہ ویکھن گے تے اوہدا ناں اوہناں دے متھیاں تے لکھیا ہوئے گا۔ 5 اوتھے کدی وی رات نئیں ہوئے گی تے اوہناں نُوں دِیوے یاں سورج دی روشنی دی لوڑ نئیں پووے گی کیونکہ یہوواہ خدا اوہناں تے روشنی چمکائے گا تے اوہ ہمیشاں ہمیشاں لئی بادشاہواں دے طور تے حکمرانی کرن گے۔
6 فرشتے نے مینوں کہیا: ”ایہہ گلاں بھروسے دے لائق تے سچیاں نیں۔ یہوواہ خدا جیہڑا نبیاں دے ذریعے پیشینگوئیاں کردا اے، اوہنے اپنا فرشتہ گھل کے اپنے غلاماں نُوں اوہ سب کجھ وکھایا جو چھیتی ہون والا اے۔ 7 یسوع نے کہیا اے: ویکھ! مَیں چھیتی آ رہیا واں۔ خوش نیں اوہ لوک جیہڑے ایس کتاب چ لکھیاں ہوئیاں گلاں* تے عمل کردے نیں۔“
8 مَیں یوحنا ایہہ گلاں سُن تے ویکھ رہیا ساں۔ ایہہ سب کجھ سُن کے تے ویکھ کے مَیں اوس فرشتے دی عبادت کرن لئی اوہدے اَگے سجدہ کیتا جیہڑا مینوں ایہہ گلاں وکھا رہیا سی۔ 9 پر اوہنے مینوں کہیا: ”خبردار! اِنج نہ کر، صرف خدا دی عبادت کر! مَیں تے بس خدا دا غلام آں جیویں تُوں، تیرے بھرا یعنی نبی تے اوہ لوک نیں جیہڑے ایس کتاب چ لکھیاں گلاں تے عمل کردے نیں۔“
10 فرشتے نے مینوں ایہہ وی کہیا: ”ایس کتاب چ لکھیاں پیشینگوئیاں نُوں راز چ نہ رکھ* کیونکہ طے کیتا ہویا ویلا نیڑے وے۔ 11 بھیڑے کم کرن والا انسان بھیڑے کم کردا رہوے تے ناپاک کم کرن والا ناپاک کم کردا رہوے۔ پر نیک انسان، نیکی کردا رہوے تے جیہڑا پاک اے، اوہ پاک رہوے۔
12 خدا کہندا اے: ”ویکھ، مَیں چھیتی آ رہیا واں تے مَیں ہر اِک نُوں اوہدے کماں دا صلہ دَواں گا۔ 13 مَیں الفا تے اومیگا واں۔* ہاں، مَیں ای پہلا تے آخری آں۔ مَیں ای شروع تے آخر آں۔ 14 خوش نیں اوہ لوک جنہاں نے اپنے کپڑے دھوتے نیں کیونکہ اوہناں نُوں زندگی دے درختاں دا پھل کھان* تے شہر دے دروازیاں دے اندر جان دی اجازت ملے گی۔ 15 شہروں باہر اوہ لوک* نیں جیہڑے گھٹیا کم، جادوٹونا، جنسیبدکاری، قتل تے بُتپرستی کردے نیں۔ نالے اوہ لوک نیں جنہاں نُوں جھوٹھ بول کے تے دُوجیاں نُوں دھوکھا دے کے مزہ آندا اے۔“
16 یسوع کہندا اے: ”مَیں اپنا فرشتہ گھلیا تاکہ اوہ توانوں اوہناں گلاں بارے دَسے* جیہڑیاں کلیسیاواں دے فائدے لئی نیں۔ مَیں داؤد دی جڑ تے اوہدی نسل چوں آں تے صبح دا چمکدا ہویا تارا واں۔““
17 پاک روح تے دُلہن کہہ رہے نیں: ” آؤ!“ تے جیہڑا وی ایہہ دعوت سُنے، اوہ وی کہوے: ” آؤ!“ تے جنہوں وی پیاس لگی اے، اوہ آئے تے جیہڑا وی چاہوے زندگی دا پانی مُفت لوے۔
18 یسوع کہندا اے: ”جیہڑا وی ایس کتاب چ لکھیاں پیشینگوئیاں نُوں سُن دا اے، اوہنوں مَیں کہنا واں: جے کوئی ایہدے چ اپنے وَلّوں کوئی گل شامل کرے گا تے خدا اوہدے اُتے ایس کتاب چ لکھیاں ساریاں آفتاں لیائے گا۔ 19 نالے جے کوئی ایس کتاب دِیاں پیشینگوئیاں وچوں کوئی گل کڈھے گا تے خدا اوہنوں نہ تے زندگی دے درختاں دا پھل دَوے گا تے نہ ای مُقدس شہر دے اندر آن دَوے گا جنہاں بارے ایس کتاب چ دَسیا گیا اے۔
20 جیہڑا ایہناں گلاں بارے گواہی دے رہیا اے، اوہ کہندا اے: ”ہاں، مَیں چھیتی آ رہیا واں۔““
مَیں* کہیا: ”آمین! مالک یسوع آ جا!“
21 دُعا اے کہ مالک یسوع مُقدس لوکاں تے عظیم رحمت کردا رہوے۔