یوحنا نُوں مِلن والا مُکاشفہ
1 ایس کتاب چ اوہ گلاں نیں جیہڑیاں یسوع مسیح نے ظاہر کیتیاں۔* اوہنوں ایہہ گلاں خدا نے دَسیاں سن تاکہ اوہ خدا دے خادماں نُوں وکھائے کہ چھیتی کیہہ ہون والا اے۔ یسوع نے اپنا فرشتہ اپنے غلام یوحنا کول گھلیا جنہے اوہنوں ایہہ سب کجھ نشانیاں وکھا کے دَسیا۔ 2 یوحنا نے اوہناں ساریاں گلاں بارے گواہی دِتی جیہڑیاں اوہنے ویکھیاں سن یعنی اوہنے خدا دا کلام سُنایا تے یسوع مسیح وَلّوں پیغام دِتا۔ 3 خوش اے اوہ انسان جیہڑا ایس کتاب چ لکھیاں پیشینگوئیاں نُوں اُچی آواز چ پڑھدا اے۔ نالے خوش نیں اوہ لوک جیہڑے ایہدے چ لکھیاں گلاں نُوں سُن دے تے ایہناں تے عمل کردے نیں کیونکہ طے کیتا ہویا ویلا نیڑے وے۔
4 مَیں یوحنا ایہہ خط صوبہ آسیہ دِیاں سَت کلیسیاواں نُوں لکھ رہیا واں:
خدا ہمیشاں توں سی، ہمیشاں توں اے تے آن والا اے۔ دُعا اے کہ خدا وَلّوں تے اوہناں سَت طاقتاں* وَلّوں توانوں عظیم رحمت تے اِطمینان ملے جیہڑیاں اوہدے تخت دے سامنے نیں۔ 5 یسوع مسیح وی توانوں عظیم رحمت تے اِطمینان بخشے جیہڑا ”وفادار گواہ،“ ”مُردیاں چوں پہلوٹھا“* تے ”زمین دے بادشاہواں دا بادشاہ“ اے۔
یسوع ساڈے نال محبت کردا اے تے اوہنے اپنے خون دے ذریعے سانوں گُناہواں توں آزاد کرایا اے۔ 6 اوہنے ای سانوں بادشاہ تے کاہن بنایا اے تاکہ اَسی اوہدے باپ یعنی خدا دی خدمت کریئے۔ یسوع دی وڈیائی ہوئے تے اوہدا اِختیار ہمیشاں قائم رہوے۔ آمین۔
7 ویکھو! اوہ بدّلاں چ آ رہیا اے تے ہر کوئی اوہنوں ویکھے گا، ہاں، اوہ وی جنہاں نے اوہنوں وِنھیا سی۔* نالے زمین دِیاں ساریاں قوماں اوہدی وجہ توں دُکھ دے مارے چھاتی پِٹن گیاں۔ آمین۔
8 یہوواہ خدا کہندا اے: ”شروع تے آخر مَیں آں۔* مَیں اوہ واں جیہڑا ہمیشاں توں سی، ہمیشاں توں اے تے آن والا اے تے جدے کول بےحد طاقت اے۔“
9 مَیں یوحنا، یسوع دا شاگرد ہون دی وجہ توں تواڈا بھرا تے بادشاہی چ حصے دار آں۔ مَیں تواڈے وانگوں دُکھ سہے تے صبر نال مشکلاں نُوں برداشت کیتا۔ خدا تے یسوع بارے گواہی دین دی وجہ توں مَیں پتمُس جزیرے تے ساں۔ 10 اوتھے مَیں پاک روح دے اثر چ مالک دا دن ویکھیا* تے مَیں اپنے پچھوں کسے دی زوردار آواز سُنی جیہڑی نرسنگے* ورگی سی۔ 11 اوہنے کہیا: ”تُوں جو کجھ وی ویکھ رہیا ایں، اوہنوں اِک کتاب* چ لکھ لے تے ایہناں سَت کلیسیاواں نُوں گھل: اِفسس، سمِرنہ، پرگمن، تھواتیرہ، سردیس، فِلدلفیہ تے لودیکیہ۔“
12 مَیں ایہہ ویکھن لئی پچھے مُڑیا کہ کون میرے نال گل کر رہیا اے۔ جدوں مَیں مُڑیا تے مَیں سونے دے سَت شمعدان ویکھے۔ 13 اوہناں شمعداناں دے وچکار کوئی کھلوتا ہویا سی جیہڑا انسان دے بیٹے ورگا سی۔ اوہنے اِک لما کُرتا پایا ہویا سی جیہڑا پیراں تک سی تے اوہنے اپنے سینے تے سنہری پٹی بنھی ہوئی سی۔ 14 نالے اوہدے سِر دے وال اُن تے برف وانگوں چِٹے سن تے اوہدیاں اَکھاں بھڑکدے ہوئے شعلیاں ورگیاں سن۔ 15 اوہدے پیر اوس خالص تانبے وانگوں چمک رہے سن جیہڑا بھٹھی چ تپ رہیا ہوئے۔ اوہدی آواز اِک وڈے آبشار وانگوں زوردار سی۔ 16 اوہدے سجے ہتھ چ سَت تارے سن تے اوہدے مُونہہ چوں اِک لمی، تیز تے دو دھاری تلوار نکلی ہوئی سی تے اوہدا چہرہ سورج دی تیز روشنی وانگوں چمک رہیا سی۔ 17 جدوں مَیں اوہنوں ویکھیا تے مَیں بےجان ہو کے اوہدے پیراں چ ڈِگ پیا۔
اوہنے اپنا سجا ہتھ میرے اُتے رکھیا تے کہیا: ”نہ ڈر، مَیں ای پہلا تے آخری آں۔ 18 مَیں مر گیا ساں پر ویکھ ہُن مَیں زندہ واں تے ہمیشاں ہمیشاں تک زندہ رہواں گا تے میرے کول موت تے قبر دِیاں چابیاں نیں۔ 19 ایس لئی اوہناں گلاں نُوں لکھ لے جیہڑیاں تُوں ویکھیاں نیں تے جیہڑیاں ہُن ہو رہیاں نیں تے جیہڑیاں بعد چ ہون گیاں۔ 20 تُوں میرے سجے ہتھ وچ جیہڑے سَت تارے تے سونے دے سَت شمعدان ویکھے سن، اوہ اِک مُقدس راز وَل اشارہ کردے نیں جدا مطلب ایہہ وے: سَت تارے سَت کلیسیاواں دے فرشتے نیں تے سَت شمعدان سَت کلیسیاواں نیں۔