کُرنتھیوں دے ناں دُوجا خط

4 خدا دے رحم دی وجہ توں سانوں ایہہ خدمت کرن دی ذمے‌داری ملی اے، ایس لئی اَسی ہمت نئیں ہاردے۔ 2 اَسی بے‌ایمانی تے بے‌شرمی دے کم کرنے چھڈ دِتے نیں۔ نالے اَسی چالاکی نئیں کردے تے نہ ای خدا دے کلام دِیاں گلاں نُوں توڑ مروڑ کے پیش کرنے آں*‏ سگوں اَسی سچائی دی تلیم دینے آں۔ اِنج اَسی خدا دے حضور سارے لوکاں سامنے*‏ چنگی مثال قائم کرنے آں۔ 3 جے کسے نُوں لگدا اے کہ اَسی جیہڑی خوش‌خبری سُنانے آں، اوہدے تے پردہ پیا ہویا اے تے ایہہ پردہ صرف اوہناں لوکاں لئی اے جیہڑے تباہی دی راہ تے چل رہے نیں۔ 4 ایس جہان دے خدا نے اوہناں غیرایمان لوکاں دی عقل تے پردہ پایا ہویا اے تاکہ اوہناں اُتے مسیح بارے جیہڑا ہوبہو خدا ورگا اے، شان‌دار خوش‌خبری دی روشنی نہ چمکے۔ 5 اصل چ اَسی اپنے بارے نئیں سگوں یسوع مسیح بارے مُنادی کر رہے آں کہ اوہ ای مالک اے تے اوہدی خاطر ای اَسی تواڈے غلام آں۔ 6 خدا نے ای کہیا سی کہ ”‏نھیرے چ روشنی چمکے“‏ تے اوہنے ای مسیح دے ذریعے*‏ ساڈے دِلاں نُوں اپنے شان‌دار علم نال روشن کر دِتا اے۔‏

7 پر اَسی مٹی دے بھانڈیاں وانگوں آں جنہاں چ خدا نے خزانہ*‏ رکھیا اے تاکہ ظاہر ہوئے کہ ساڈے کول جیہڑی طاقت اے، اوہ انسانی طاقت توں ودھ کے وے کیونکہ ایہہ سانوں خدا وَلّوں ملی اے۔ 8 اَسی مشکلاں نال گِھرے تے ہُنے آں پر ایہناں چ پھسے نئیں رہندے۔ اَسی اُلجھن چ تے ہُنے آں پر ناامید نئیں ہوندے۔‏*‏ 9 ساڈے تے ظلم تے کیتا جاندا اے پر اَسی بے‌سہارا نئیں ہوندے۔ سانوں تھلے سُٹیا*‏ جاندا اے پر اَسی فیر کھلو جانے آں۔‏*‏ 10 یسوع وانگوں ساڈے تے ظلم کیتا جاندا اے تے ساڈی جان ہمیشاں خطرے چ رہندی اے جدے توں ظاہر ہوندا اے کہ اَسی وی یسوع ورگیاں مشکلاں چوں لنگھ رہے آں۔ 11 اَسی جی تے رہے آں پر یسوع دی خاطر اَسی ہمیشاں موت دا سامنا کرنے آں جدے توں ظاہر ہوندا اے کہ اَسی وی یسوع ورگیاں مشکلاں چوں لنگھ رہے آں۔ 12 ایس لئی بھانویں سانوں موت دا سامنا کرنا پیندا اے پر ایہدی وجہ توں توانوں زندگی مِلدی اے۔‏*‏

13 پاک کلام چ لکھیا اے:‏ ”‏مَیں ایمان رکھنا واں، ایس لئی مَیں گل کرنا واں۔“‏ اَسی وی ایہو جیہا ایمان ظاہر کرنے آں، ایسے لئی اَسی گل کرنے آں۔ 14 اَسی جاننے آں کہ خدا نے یسوع نُوں زندہ کیتا تے اوہ سانوں وی زندہ کرے گا تاکہ خدا سانوں ساریاں نُوں یسوع دے سامنے پیش کرے تے اَسی اوہدے نال ہوئیے۔ 15 اَسی ایہہ سب کجھ*‏ تواڈی خاطر کرنے آں تاکہ زیادہ توں زیادہ لوکاں اُتے خدا دی عظیم رحمت ہوئے تے ہور وی لوک خدا دا شکر کر کے اوہدی وڈیائی کرن۔‏

16 ایس لئی اَسی ہمت نئیں ہاردے۔ ایہہ سچ اے کہ اَسی باہروں*‏ کمزور ہوندے جا رہے آں پر اندروں دن بدن مضبوط ہوندے جا رہے آں۔‏*‏ 17 ساڈیاں مصیبتاں تھوڑی دیر لئی نیں تے معمولی نیں۔ پر ایہناں نُوں سہن دی وجہ توں سانوں جیہڑی شان ملے گی، اوہدے اَگے ایہہ کجھ وی نئیں کیونکہ اوہ شان ودھدی جائے گی تے ہمیشاں تک رہوے گی۔ 18 ایس لئی آؤ، اَسی اپنا دھیان اوہناں چیزاں تے نہ رکھیے جیہڑیاں نظر آندیاں نیں کیونکہ ایہہ تھوڑی دیر لئی نیں سگوں اوہناں چیزاں تے رکھیے جیہڑیاں نظر نئیں آندیاں کیونکہ ایہہ ہمیشاں تک رہن گیاں۔‏