رسولاں دے اعمال
12 اوس ویلے بادشاہ ہیرودیس کلیسیا دے کجھ بھین بھراواں تے ظلم کرن لگ پیا۔ 2 اوہنے یوحنا دے بھرا یعقوب نُوں تلوار نال مروا دِتا۔ 3 جدوں اوہنے ویکھیا کہ یہودی ایس گل توں خوش ہوئے نیں تے اوہنے پطرس نُوں وی گِرفتار کر لیا۔ (ایہہ بےخمیری روٹی دی عید دے دوران ہویا سی۔) 4 اوہنے پطرس نُوں پھڑ کے قید کر دِتا کیونکہ اوہ فسح دی عید دے بعد پطرس نُوں لوکاں سامنے پیش کرنا چاہندا سی۔* سپاہیاں دِیاں چار ٹولیاں واری واری پطرس تے پہرا دیندیاں سن تے ہر ٹولی چ چار سپاہی سن۔ 5 جدوں پطرس جیل چ سی تے کلیسیا دِلوں اوہدے لئی خدا کولوں دُعا کر رہی سی۔
6 جیس دن ہیرودیس پطرس نُوں لوکاں سامنے پیش کرن والا سی، اوس توں اِک رات پہلاں پطرس بیڑیاں نال بنھیا ہویا دو سپاہیاں دے وچکار سُتا ہویا سی۔ نالے دو سپاہی دروازے تے پہرا دے رہے سن۔ 7 فیر اچانک یہوواہ دا اِک فرشتہ اوتھے آ گیا تے اوہ جگہ روشنی نال بھر گئی۔ اوس فرشتے نے پطرس نُوں ہتھ لا کے جگایا تے کہیا: ”چھیتی اُٹھ!“ پطرس دے ہتھاں دِیاں بیڑیاں اپنے آپ کُھل گئیاں۔ 8 فیر فرشتے نے اوہنوں کہیا: ”اپنے کپڑے تے جُتی پا لے۔“ اوہنے اِنج ای کیتا۔ ایہدے بعد فرشتے نے اوہنوں کہیا: ”اپنی چادر لے تے میرے پچھے پچھے آ جا۔“ 9 پطرس اوہدے پچھے پچھے باہر آ گیا۔ پر اوہنوں پتہ نئیں چل رہیا سی کہ فرشتہ سچمچ اوہدی مدد کر رہیا اے سگوں اوہنوں لگیا کہ اوہ اِک رُویا ویکھ رہیا اے۔ 10 اوہ پہرےداراں دی پہلی تے دُوجی چونکی کولوں لنگھ کے لوھے دے اوس دروازے کول پونچ گئے جیہڑا شہر وَل جاندا اے۔ اوہ دروازہ اپنے آپ کُھل گیا تے اوہ باہر آ کے اِک گلی چ ٹُردے گئے تے فیر اچانک فرشتہ اوہنوں چھڈ کے چلا گیا۔ 11 اوہدوں پطرس سمجھ گیا کہ ایہہ کوئی رُویا نئیں اے تے اوہنے کہیا: ”ہُن مَیں سمجھ گیا واں کہ یہوواہ نے اپنا فرشتہ گھل کے مینوں ہیرودیس دے ہتھوں بچا لیا اے تے میرے نال اوہ سب کجھ نئیں ہون دِتا جو یہودی چاہندے سن۔“
12 ایہدے بعد اوہ مریم دے گھر گیا جیہڑی اوس یوحنا دی ماں اے جنہوں مرقس وی کہیا جاندا اے۔ اوتھے کئی شاگرد جمع ہو کے دُعا کر رہے سن۔ 13 جدوں پطرس نے دروازہ کھڑکایا تے رُدی ناں دی نوکرانی ویکھن آئی کہ کون اے۔ 14 جدوں اوہنے پطرس دی آواز پچھان لئی تے اوہ اینی خوش ہوئی کہ دروازہ کھولے بغیر ای اندر بھج گئی تے ساریاں نُوں دَسیا کہ دروازے تے پطرس آیا اے۔ 15 اوہناں نے رُدی نُوں کہیا: ”تُوں پاگل ہو گئی ایں۔“ پر اوہ وار وار کہندی رہی کہ باہر پطرس کھلوتا اے۔ اوہ کہن لگ پئے: ”کوئی فرشتہ* ہونا اے۔“ 16 پر پطرس باہر کھلوتا دروازہ کھڑکاندا رہیا۔ جدوں اوہناں نے دروازہ کھولیا تے اوہ بڑے حیران ہوئے۔ 17 پطرس نے اوہناں نُوں اشارہ کر کے چپ رہن لئی کہیا۔ فیر اوہنے اوہناں نُوں کُھل کے دَسیا کہ یہوواہ نے کیویں اوہنوں جیل چوں کڈھیا اے تے فیر اوہنے کہیا: ”ایہہ ساریاں گلاں یعقوب تے دُوجے بھراواں نُوں دَسنا۔“ فیر اوہ اوتھوں نکل کے کسے ہور جگہ چلا گیا۔
18 جدوں دن چڑھیا تے سپاہیاں وچ ہلچل مچ گئی کیونکہ پطرس غائب ہو گیا سی۔ 19 ہیرودیس نے پطرس نُوں لبھن دی بڑی کوشش کیتی۔ پر جدوں اوہ نہ ملیا تے اوہنے پہرےداراں کولوں پچھ گچھ کیتی تے اوہناں نُوں سزا دین دا حکم دِتا۔ ایہدے بعد ہیرودیس یہودیہ توں قیصریہ چلا گیا تے کجھ عرصہ اوتھے رہیا۔
20 بادشاہ ہیرودیس نُوں صور تے صیدا دے لوکاں تے بڑا غصہ سی۔ ایس لئی اوہ کٹھے ہو کے اوہدے کول آئے۔ اوہناں نے بادشاہ دے گھر دے مختار بلاستُس نُوں ایس گل تے راضی کر لیا کہ اوہ بادشاہ نال اوہناں دی صلح کرائے کیونکہ اوہناں دے ملک چ کھان پین دِیاں شیواں بادشاہ دے ملک توں ای آندیاں سن۔ 21 فیر اِک خاص دن تے ہیرودیس شاہی کپڑے پا کے عدالت دے تخت تے بہہ گیا تے لوکاں سامنے تقریر کرن لگ پیا۔ 22 فیر اوتھے جمع ہوئے سارے لوک اُچی اُچی کہن لگ پئے: ”ایہہ انسان دی نئیں سگوں اِک دیوتا دی آواز اے۔“ 23 اوسے ویلے یہوواہ دے اِک فرشتے نے اوہنوں سزا دِتی کیونکہ اوہنے خدا دی وڈیائی نئیں کیتی سی۔ اوہدے جسم چ کیڑے پے گئے تے اوہ مر گیا۔
24 پر یہوواہ دا کلام پھیلدا گیا تے ایمان لیان والے لوکاں دی تعداد ودھدی گئی۔
25 جدوں برنباس تے ساؤل نے یروشلم چ ضرورتمند بھین بھراواں نُوں چیزاں پونچان دی ذمےداری پوری کر لئی تے اوہ واپس انطاکیہ چلے گئے۔ اوہ اپنے نال یوحنا نُوں وی لے گئے جنہوں مرقس کہیا جاندا اے۔