کُرنتھیوں دے ناں پہلا خط

11 میری مثال تے عمل کرو جیویں مَیں مسیح دی مثال تے عمل کرنا واں۔‏

2 مَیں تواڈی تعریف کرنا واں کیونکہ تُسی ہمیشاں میری مثال نُوں یاد رکھدے او تے اوہناں ہدیتاں*‏ تے چنگی طرحاں عمل کردے او جیہڑیاں مَیں توانوں دِتیاں سن۔ 3 پر مَیں چاہنا واں کہ تُسی جان لوو کہ ہر آدمی دا سربراہ*‏ مسیح اے، ہر عورت دا سربراہ*‏ آدمی اے تے مسیح دا سربراہ*‏ خدا اے۔ 4 جے اِک آدمی اپنا سِر ڈھک کے دُعا کردا اے یاں خدا دے کلام چوں تلیم دیندا اے*‏ تے اوہ اپنے سربراہ نُوں شرمندہ کردا اے۔ 5 پر جے اِک عورت سِر ڈھکے بغیر دُعا کردی اے یاں خدا دے کلام چوں تلیم دیندی اے*‏ تے اوہ اپنے سربراہ نُوں شرمندہ کردی اے کیونکہ اِنج اوہ اوس عورت وانگوں ہوندی اے جدا سِر مُنیا گیا ہوئے۔‏*‏ 6 جے اِک عورت اپنا سِر نئیں ڈھک دی تے اوہ اپنے وال وی کٹوائے۔ پر وال کٹوانا یاں سِر مُنوانا اِک عورت لئی شرم دی گل اے۔ ایس لئی اوہنوں اپنا سِر ڈھکنا چاہی دا اے۔‏

7 آدمی نُوں اپنا سِر نئیں ڈھکنا چاہی دا کیونکہ اوہنوں خدا ورگا بنایا گیا اے تے اوہ اوہدی شان اے۔ پر عورت آدمی دی شان اے 8 کیونکہ خدا نے آدمی نُوں عورت دے جسم توں نئیں سگوں عورت نُوں آدمی دے جسم توں بنایا سی۔ 9 نالے خدا نے آدمی نُوں عورت دی خاطر نئیں سگوں عورت نُوں آدمی دی خاطر بنایا سی۔ 10 نہ صرف ایس وجہ توں سگوں فرشتیاں دی خاطر وی عورت نُوں اپنا سِر ڈھکنا چاہی دا اے تاکہ اوہ تابع‌داری ظاہر کر سکے۔‏

11 ایہدے علاوہ مالک دی کلیسیا چ مرداں تے عورتاں دونواں نُوں اِک دُوجے دی ضرورت اے 12 کیونکہ عورت مرد توں بنی اے تے مرد عورت توں پیدا ہوندا اے۔ پر ساریاں چیزاں خدا نے بنائیاں نیں۔ 13 تُسی آپ فیصلہ کرو کہ کیہہ عورت لئی سِر ڈھکے بغیر دُوجیاں سامنے دُعا کرنا ٹھیک ہوئے گا؟ 14 کیہہ تُسی نئیں جان دے کہ قدرتی طور تے آدمی لئی لمے وال رکھنا شرم دی گل اے 15 جد کہ عورت لئی لمے وال رکھنا عزت دی گل اے؟ کیونکہ اوہنوں وال سِر ڈھکن لئی دِتے گئے نیں۔ 16 پر جے کسے نُوں ایس گل تے اِعتراض اے تے اوہنوں مَیں کہنا چاہنا واں کہ ساڈے چ تے خدا دِیاں کلیسیاواں چ ایہی رواج اے۔‏

17 پر جدوں تُسی عبادت لئی کٹھے ہوندے او تے توانوں فائدہ نئیں سگوں نقصان ہوندا اے۔ ایس لئی ایہہ ہدیتاں دیندے ویلے مَیں تواڈی تعریف نئیں کر سکدا۔ 18 پہلی گل تے ایہہ وے کہ مَیں سُنیا اے کہ جدوں تُسی کلیسیا چ کٹھے ہوندے او تے تواڈے چ جھگڑے ہوندے نیں۔ مَیں جیہڑیاں گلاں سُن رہیا واں، اوہ کسے حد تک سچ وی نیں۔ 19 بے‌شک تواڈے چ فرقے بنن گے تاکہ ظاہر ہو جائے کہ تواڈے وچوں کون خدا دی مرضی تے چل رہیا اے تے کون نئیں۔‏

20 جدوں تُسی مالک دی یاد*‏ چ کھانا کھان لئی کٹھے ہوندے او تے اصل چ تُسی اوہنوں کھان دے لائق نئیں ہوندے 21 کیونکہ جدوں اوہنوں کھان دا ویلا آندا اے تے تُسی پہلاں ای کھانا کھالیا ہوندا اے۔ نالے تواڈے چوں کجھ بُھکھے ہوندے نیں تے کجھ نشے چ ہوندے نیں۔ 22 کیہہ تُسی اپنے گھر کھا پی نئیں سکدے؟ کیہہ تواڈی نظر چ خدا دی کلیسیا دی کوئی عزت نئیں تے کیہہ تُسی غریب لوکاں نُوں شرمندہ کرنا چاہندے او؟ ہُن مَیں توانوں کیہہ کہواں؟ کیہہ مَیں تواڈی تعریف کراں؟ ایس معاملے چ تُسی تعریف دے لائق نئیں او۔‏

23 مَیں توانوں اوہی ہدیتاں دے رہیا واں جیہڑیاں مالک نے مینوں دِتیاں سن۔ جدوں مالک یسوع نُوں پھڑوایا جانا سی تے اوس رات اوہنے روٹی لئی 24 تے خدا دا شکر کر کے توڑی تے کہیا:‏ ”‏ایہہ میرے جسم وَل اشارہ کردی اے جیہڑا تواڈی خاطر قربان کیتا جائے گا۔ میری یاد چ ایسے طرحاں کردے رہوو۔“‏ 25 جدوں مالک نے کھانا کھا لیا تے اوہنے پیالہ لے کے وی اِنج ای کیتا تے کہیا:‏ ”‏ایہہ پیالہ نویں عہد وَل اشارہ کردا اے جنہوں میرے خون دے ذریعے قائم کیتا جائے گا۔ جدوں وی تُسی ایس پیالے چوں پیو تے میری یاد چ ایسے طرحاں کردے رہوو۔“‏ 26 جدوں وی تُسی ایس روٹی چوں کھاندے تے ایس پیالے چوں مے پیندے او تے تُسی مالک دے آن تک اوہدی موت دا اعلان کردے او۔‏

27 ایس لئی جے کوئی ایہو جیہا بندہ مالک دی روٹی چوں کھاندا تے اوہدے پیالے چوں پیندا اے جیہڑا ایہدے لائق نئیں ہوندا تے اوہ مالک دے جسم تے خون دے خلاف گُناہ کردا اے۔ 28 ہر بندے نُوں پہلاں اپنے آپ نُوں پَرکھنا چاہی دا اے کہ اوہ ایس روٹی چوں کھان تے مے چوں پین دے لائق ہے وے یاں نئیں۔ 29 جے کوئی بندہ ایس گل نُوں نئیں سمجھدا کہ روٹی تے مے مالک یسوع دے جسم وَل اشارہ کردیاں نیں تے اوہ ایہناں چوں کھا پی کے اپنے آپ نُوں قصوروار ٹھہراندا اے۔ 30 ایسے وجہ توں تواڈے وچوں بوہت سارے لوک کمزور تے بیمار نیں تے کئی موت دی نیندر سوں گئے نیں۔‏*‏ 31 پر جے اَسی اپنے آپ نُوں پَرکھاں گے تے فیر سانوں قصوروار نئیں ٹھہرایا جائے گا۔ 32 جدوں سانوں قصوروار ٹھہرایا جاندا اے تے یہوواہ ساڈی درستی کر رہیا ہوندا اے تاکہ سانوں دُنیا دے نال سزا نہ ملے۔ 33 ایس لئی میرے بھراوو، جدوں تُسی ایہہ کھانا کھان لئی کٹھے ہوندے او تے اِک دُوجے دا اِنتظار کرو۔ 34 جے تواڈے وچوں کسے نُوں بُھکھ لگی ہوئے تے اوہ اپنے گھروں کھائے تاکہ توانوں اوس ویلے قصوروار نہ ٹھہرایا جائے جدوں تُسی کٹھے ہوندے او۔ پر باقی معاملیاں نُوں مَیں اوتھے آ کے حل کراں گا۔‏