تیمُتھیُس دے ناں پہلا خط
5 کسے وڈیرے آدمی دی درستی سختی نال نہ کرِیں سگوں اوہنوں باپ سمجھ کے پیار تے عزت نال گل کرِیں۔ ایسے طرحاں جوان آدمیاں نُوں بھرا سمجھ کے، 2 وڈیریاں عورتاں نُوں ماں سمجھ کے تے جوان عورتاں نُوں صافدل نال بھین سمجھ کے نصیحت کرِیں۔
3 اوہناں بیوہ عورتاں دا خیال* رکِھیں جیہڑیاں واقعی بےسہارا نیں۔ 4 جے کسے بیوہ عورت دے بچے ہے نیں یاں اَگوں بچیاں دے بچے ہے نیں تے اوہناں نُوں پہلاں اپنے گھر چ خدا دے اصولاں تے عمل کرنا چاہی دا اے* تے اپنے گھر والیاں دی دیکھبھال کرنی چاہی دی اے۔ اوہناں نُوں اپنے ماں پیو تے اَگوں اوہناں دے ماں پیو دا حق ادا کرنا چاہی دا اے کیونکہ خدا ایہدے توں خوش ہوندا اے۔ 5 جیہڑی بیوہ واقعی بےسہارا تے ضرورتمند ہوندی اے، اوہ خدا تے امید رکھدی اے تے دن رات اِلتجاواں تے دُعاواں کردی اے۔ 6 پر جیہڑی بیوہ عورت عیش* کرن چ لگی رہندی اے، اوہ جیوندے جی مر گئی اے۔* 7 ایس لئی اوہناں نُوں ایہہ ہدیتاں* دیندا رہ تاکہ کوئی وی اوہناں* تے اُنگلی نہ چُک سکے۔ 8 اصل چ جے کوئی اپنیاں دِیاں تے خاص طور تے اپنے گھر والیاں دِیاں ضرورتاں نُوں پورا نئیں کردا، اوہ ایمان توں پھر گیا اے تے اِک غیرایمان بندے نالوں وی بھیڑا اے۔
9 اوس بیوہ عورت دا ناں ضرورتمنداں چ شامل کیتا جا سکدا اے جدی عمر 60 سال توں زیادہ ہوئے، جیہڑی اپنے شوہر دی وفادار* رہی ہوئے، 10 جنہے چنگے کم کر کے نیک ناں کمایا ہوئے یعنی اپنے بچیاں دی چنگی تربیت کیتی ہوئے، مہماننوازی کیتی ہوئے، مُقدس لوکاں د ی خدمت کیتی ہوئے،* ضرورتمند لوکاں دی مدد کیتی ہوئے تے ہر نیک کم دل لا کے کیتا ہوئے۔
11 پر جوان بیوہ عورتاں دے ناں ضرورتمند لوکاں چ شامل نہ کرِیں کیونکہ جدوں اوہناں دِیاں جنسی خواہشاں مسیح دی خدمت کرن توں زیادہ اہم بن جاندیاں نیں تے اوہ شادی کرنا چاہندیاں نیں۔ 12 اِنج اوہ اپنا پہلا وعدہ توڑ دیندیاں نیں تے قصوروار بن جاندیاں نیں۔ 13 نالے اوہناں نُوں ویہلے رہن تے گھر گھر پھرن دی عادت پے جاندی اے۔ ایتھوں تک کہ اوہ چغلیاں کرن تے دُوجیاں دے معاملے چ لت اَڑان لگ پیندیاں نیں تے ایہو جہیاں گلاں کردیاں نیں جیہڑیاں نئیں کرنیاں چاہی دِیاں۔ 14 ایس لئی مَیں چاہنا واں کہ جیہڑیاں بیوہ عورتاں جوان نیں اوہ شادی کرن، ماواں بنن تے اپنے گھر نُوں سنبھالن تاکہ ساڈے دُشمناں نُوں ساڈے خلاف کجھ کہن دا موقع نہ ملے۔ 15 اصل چ کجھ بیوہ عورتاں ایمان توں پھر گئیاں نیں تے شیطان دے پچھے ٹُر پئیاں نیں۔ 16 جے اِک بھین دی کوئی رشتےدار بیوہ اے تے اوہنوں اوہدی مدد کرنی چاہی دی اے تاکہ کلیسیا تے بوجھ نہ پووے۔ اِنج کلیسیا اوہناں بیوہ عورتاں دی مدد کر سکے گی جیہڑیاں واقعی بےسہارا نیں۔
17 جیہڑے بزرگ چنگی طرحاں پیشوائی کردے نیں، اوہناں دی زیادہ* عزت کیتی جائے۔ خاص طور تے اوہناں دی جیہڑے خدا دا کلام سُنان تے تلیم دین لئی سخت محنت کردے نیں 18 کیونکہ پاک کلام چ لکھیا اے: ”جدوں بیل اناج گاہ* رہیا ہوئے تے اوہدے مُونہہ تے چھکو نہ چڑھائیں۔“ نالے ایہہ وی لکھیا اے: ”مزدور اپنی مزدوری دا حقدار اے۔“ 19 کسے بزرگ تے لگے ہوئے اِلزام نُوں صرف اوہدوں ای منِیں جدوں دو یاں تِن لوک گواہی دین۔ 20 اوہناں لوکاں دی درستی ساریاں دے سامنے کرِیں جیہڑے گُناہ کرن چ لگے رہندے نیں تاکہ باقی لوک گُناہ کرن توں خبردار رہن۔ 21 مَیں خدا تے مسیح یسوع تے چُنے ہوئے فرشتیاں دے حضور تینوں ایہہ خاص حکم دینا واں کہ تُوں کوئی وی فیصلہ کرن توں پہلاں سارے معاملے دا جائزہ لوِیں تے طرفداری کیتے بغیر ایہناں ہدیتاں تے عمل کرِیں۔
22 کلیسیا چ کسے وی آدمی نُوں ذمےداری دین* چ جلدبازی نہ کرِیں۔ دُوجیاں دے گُناہواں چ حصےدار نہ بنِیں۔ اپنا چالچلن پاک رکِھیں۔
23 تُوں اکثر بیمار رہنا ایں ایس لئی صرف پانی نہ پیا کر سگوں تھوڑی مے وی پیا کر۔ اوہ معدے لئی فائدےمند ہوندی اے۔
24 کجھ لوکاں دے گُناہواں بارے ساریاں نُوں پتہ ہوندا اے تے اوہناں نُوں فوراً سزا مِلدی اے جد کہ کجھ دے گُناہواں بارے بعد چوں پتہ لگدا اے۔ 25 ایسے طرحاں نیک کماں بارے وی ساریاں نُوں پتہ ہوندا اے تے جیہڑے نیک کماں بارے پتہ نئیں ہوندا، اوہ وی لُکے نئیں رہندے۔