تیمُتھیُس دے ناں پہلا خط
3 ایس ضروری گل* وَل دھیان دے: جے اِک بھرا نگہبان بنن لئی محنت کر رہیا اے تے اوہ اِک چنگے کم دی خواہش رکھدا اے۔ 2 اِک نگہبان نُوں اِلزام توں پاک، اِک بیوی دا شوہر، چنگیاں عادتاں دا مالک، سمجھدار، سلیقے نال کم کرن والا،* مہماننواز تے تلیم دین دے لائق ہونا چاہی دا اے۔ 3 اوہنوں شرابی، ظالم، اَڑیل،* جھگڑالو تے پیسے نال پیار کرن والا نئیں ہونا چاہی دا۔ 4 اوہنوں اپنے گھرانے دی چنگی طرحاں سربراہی کرنی چاہی دی اے تے اوہدے بچیاں نُوں تابعدار تے تمیزدار ہونا چاہی دا اے۔ 5 (کیونکہ جے اِک بندہ اپنے گھر والیاں دی چنگی طرحاں سربراہی نئیں کر سکدا تے اوہ خدا دی کلیسیا دی دیکھبھال کیویں کرے گا؟) 6 اوہ نواں نواں مسیحی نہ بنیا ہوئے تاکہ ایہہ نہ ہوئے کہ اوہ غرور نال پُھل جائے تے اوہنوں وی اوہی سزا ملے جیہڑی اِبلیس نُوں سُنائی گئی سی۔ 7 ایہدے علاوہ دُنیا دے لوکاں چ وی اوہنوں نیک ناں ہونا چاہی دا اے تاکہ کوئی وی اوہدے تے اُنگلی نہ چُک سکے تے اوہ اِبلیس دے پھندے چ نہ پھسے۔
8 ایسے طرحاں کلیسیا دے خادماں نُوں وی عزتدار* ہونا چاہی دا اے۔ اوہناں نُوں دھوکھےباز* نئیں ہونا چاہی دا، حدوں ودھ شراب* نئیں پینی چاہی دی تے ناجائز فائدہ حاصل کرن دا لالچ نئیں کرنا چاہی دا اے 9 سگوں اوہناں نُوں صاف ضمیر نال اوس تلیم تے ایمان رکھنا چاہی دا اے* جیہڑی خدا نے ظاہر کیتی اے۔
10 نالے پہلے اوہناں نُوں پَرکھیا جائے تے جے اوہ لائق ثابت ہون تے فیر اوہناں نُوں کلیسیا چ خادم بنایا جائے۔ پر ضروری اے کہ اوہ بےاِلزام ہون۔
11 ایسے طرحاں عورتاں نُوں وی عزتدار* ہونا چاہی دا اے۔ اوہ جھوٹھیاں گلاں پھیلا کے دُوجیاں نُوں بدنام کرن والیاں نہ ہون سگوں اوہناں دِیاں عادتاں چنگیاں ہون تے اوہ ہر معاملے چ وفادار ہون۔
12 جیہڑے بھرا خادم نیں، اوہناں دی صرف اِک بیوی ہونی چاہی دی اے۔ نالے اوہناں نُوں اپنے بچیاں تے گھر والیاں دی چنگی طرحاں سربراہی کرنی چاہی دی اے۔ 13 جیہڑے بھرا چنگی طرحاں خدمت کردے نیں، اوہ نیک ناں کماندے نیں تے مسیح یسوع تے ایمان رکھن دی وجہ توں دلیری نال گل کر سکدے نیں۔*
14 امید اے کہ مَیں چھیتی تیرے کول آواں گا۔ فیر وی مَیں تینوں ایہہ گلاں لکھ رہیا واں 15 تاکہ جے مینوں آن چ دیر ہو گئی تے تینوں پتہ ہوئے کہ خدا دے گھرانے چ تیرا چالچلن کیہو جیہا ہونا چاہی دا اے۔ ایہہ گھرانہ زندہ خدا دی کلیسیا اے جدے ذریعے سچائی نُوں سہارا مِلدا اے تے ایہہ قائم رہندی اے۔ * 16 خدا دی بندگی دا ایہہ مُقدس راز واقعی بوہت خاص اے: ”یسوع اِک انسان بن کے آیا۔ جدوں اوہ روح دے طور تے اسمان تے واپس گیا تے خدا نے اوہنوں نیک ٹھہرایا۔ اوہ فرشتیاں تے ظاہر ہویا، قوماں چ اوہدے بارے مُنادی کیتی گئی، دُنیا چ لوک اوہدے تے ایمان لیائے تے اسمان تے اوہنوں بڑی شان ملی۔“