پطرس دا پہلا خط
2 ایس لئی تُسی ہر طرحاں دی بُرائی، دھوکھےبازی، پاکھنڈ، حسد تے چغلیاں کرنا چھڈ دَوو۔ 2 ننھے بچیاں وانگوں خدا دے کلام دے خالص دودھ لئی اپنے اندر بُھکھ پیدا کرو تاکہ تُسی ودھو پھلو تے نجات پا سکو 3 کیونکہ تُسی چکھ* کے ویکھ لیا اے کہ مالک مہربان اے۔
4 انساناں نے اوس زندہ پتھر یعنی ساڈے مالک نُوں ردّ کر دِتا۔ پر خدا نے اوہنوں چُنیا تے اوہ اوہدے لئی قیمتی اے۔ جیویں جیویں تُسی اوہدے کول آندے او، 5 تُسی وی زندہ پتھر بن جاندے او۔ توانوں اوس گھر چ لایا جا رہیا اے جیہڑا پاک روح دے ذریعے بنایا جا رہیا اے تاکہ تُسی کاہناں دی مُقدس جماعت بن جاؤ تے یسوع مسیح دے ذریعے اوہ قربانیاں پیش کرو جیہڑیاں خدا نُوں پسند نیں 6 کیونکہ پاک کلام چ لکھیا اے: ”ویکھو، مَیں صیون چ نِیہہ دا سب توں اہم پتھر* رکھ رہیا واں جیہڑا چُنیا ہویا اے تے بوہت زیادہ قیمتی اے۔ اوہدے تے ایمان رکھن والے کدی مایوس* نئیں ہون گے۔“
7 اوہ تواڈے لئی قیمتی اے کیونکہ تُسی ایمان رکھدے او۔ پر ایمان نہ رکھن والیاں لئی اوہ قیمتی نئیں اے کیونکہ لکھیا اے: ”جیہڑے پتھر نُوں مستریاں نے ردّ کیتا اوہی کونے دا سب توں خاص پتھر بن گیا“ 8 نالے ”ٹھوکر لان والا پتھر تے رُکاوٹ پان والی چٹان بن گیا اے۔“ اوہناں نُوں ٹھوکر ایس لئی لگدی اے کیونکہ اوہ خدا دے کلام تے عمل نئیں کردے، ایہو جہے لوکاں دا ایہی انجام ہوندا اے۔* 9 پر تُسی ”اِک چُنی ہوئی نسل، کاہناں دی اِک شاہی جماعت، اِک مُقدس قوم تے خدا دی خاص ملکیت او تاکہ تُسی ہر پاسے اوہدیاں عظیم صفتاں* دا اعلان کرو“ جنہے توانوں نھیرے چوں کڈھ کے اپنی شاندار روشنی چ بلایا اے۔ 10 پہلاں تواڈی اپنی کوئی پچھان نئیں سی، پر ہُن تُسی خدا دی قوم او۔ پہلاں تواڈے تے رحم نئیں کیتا گیا سی، پر ہُن تواڈے تے رحم کیتا گیا اے۔
11 پیارے بھراوو، مَیں توانوں تاکید کرنا واں کہ تُسی ایس دُنیا چ اپنے آپ نُوں پردیسی تے مسافر سمجھدے ہوئیاں اپنے جسم دِیاں غلط خواہشاں دا ڈٹ کے مقابلہ کرو جیہڑیاں توانوں اپنے وَس چ کرن لئی تواڈے اندر لڑدیاں رہندیاں نیں۔ 12 دُنیا دے لوکاں دے سامنے اپنا چال چلن نیک رکھو تاکہ جدوں اوہ تواڈے تے کوئی غلط کم کرن دا اِلزام لان تے اوہ تواڈے چنگے کماں نُوں اپنیاں اَکھاں نال ویکھ سکن تے اوس دن خدا دی وڈیائی کرن جدوں اوہ انساناں نُوں پَرکھے گا۔
13 مالک دی خاطر اِختیار رکھن والے ہر انسان* دے تابع رہوو۔ بھانویں اوہ بادشاہ ہووے کیونکہ اوہدا رُتبہ اُچا ہوندا اے، 14 یاں فیر حاکم ہون جنہاں نُوں بادشاہ بھیڑے کم کرن والیاں نُوں سزا دین تے چنگے کم کرن والیاں دی تعریف کرن لئی مقرر کردا اے۔ 15 خدا ایہی چاہندا اے کہ تُسی چنگے کم کرو تاکہ تُسی بیوقوفاں دا مُونہہ بند کر سکو جیہڑے بےبنیاد گلاں کردے نیں۔ 16 آزاد لوکاں وانگوں جیو۔ پر اپنی آزادی نُوں غلط کم کرن لئی نئیں* سگوں خدا دی غلامی کرن لئی استمال کرو۔ 17 ہر طرحاں دے لوکاں دی عزت کرو، اپنے سارے ہمایماناں* نال پیار کرو، خدا توں ڈرو تے بادشاہ دا احترام کرو۔
18 نوکر اپنے مالکاں دی عزت کرن تے اوہناں دے تابع رہن۔ صرف اوہناں مالکاں دے ای نئیں جیہڑے چنگے تے نرممزاج نیں سگوں اوہناں دے وی جنہاں نُوں خوش کرنا سوکھا نئیں ہوندا 19 کیونکہ جے کوئی انسان خدا دے سامنے صاف ضمیر رکھن لئی مصیبتاں برداشت کردا اے تے نااِنصافیاں سہندا اے، اوہ تعریف دے لائق اے۔ 20 پر جے تُسی گُناہ کرن دی وجہ توں مار کُٹائی برداشت کردے او تے ایہدے چ کیہڑی وڈی گل اے؟ پر جے توانوں چنگے کم کرن دی وجہ توں مشکلاں برداشت کرنیاں پیندیاں نیں تے تُسی خدا دِیاں نظراں چ تعریف دے لائق او۔
21 اصل چ توانوں ایسے لئی بلایا گیا سی کیونکہ مسیح نے وی تواڈے لئی دُکھ سہے تے تواڈے لئی مثال قائم کیتی تاکہ تُسی اوہدے تے دھیان نال عمل کر سکو۔* 22 اوہنے نہ تے کوئی گُناہ کیتا تے نہ ای اپنے مُونہوں دھوکھا دین والیاں گلاں کہیاں۔ 23 جدوں لوک اوہدی بےعزتی کردے سن تے اوہ اَگوں اوہناں دی بےعزتی نئیں کردا سی۔ جدوں لوک اوہدے تے ظلم کردے سن تے اوہ اوہناں نُوں ڈراندا دھمکاندا نئیں سی سگوں اپنے آپ نُوں اوہدے حوالے کردا سی جیہڑا سچا اِنصاف کردا اے۔ 24 اوہ ساڈے گُناہ اپنے اُتے لے کے سُولی* چڑھ گیا تاکہ اَسی گُناہ دے لحاظ نال مر جائیے، پر نیکی دے لحاظ نال زندہ رہیے۔ ”توانوں اوہدے زخماں دی وجہ توں شفا ملی اے۔“ 25 تُسی ایہو جہیاں بھیڈاں وانگوں سو جیہڑیاں بھٹک رہیاں سن۔ پر ہُن تُسی اپنے* چرواہے تے رکھوالے کول واپس آ گئے او۔