عبرانیوں دے ناں خط
12 تُسی غور کیتا کہ گواہواں دے کِنّے وڈے بدّل نے سانوں گھیریا ہویا اے۔ ایس لئی آؤ، اَسی ہر طرحاں دا بوجھ تے گُناہ دا بھار لاہ کے سُٹ دَئیے جیہڑا اسانی نال سانوں دبا* لیندا اے تے ہمت ہارے بغیر اوس دوڑ چ دوڑدے رہیے جدے چ اَسی حصہ لیا اے۔ 2 آؤ، اَسی اپنا پورا دھیان یسوع تے رکھیے جیہڑا ساڈا عظیم رہنما اے تے ساڈے ایمان نُوں مکمل کردا اے۔ اوہنے اوس خوشی دی خاطر جیہڑی اوہنوں ملنی سی، سُولی تے تکلیف سہی تے بےعزتی دی پرواہ نئیں کیتی۔ ایس لئی ہُن اوہ خدا دے تخت دے سجے پاسے بیٹھا ہویا اے۔ 3 ہاں، یسوع نے اوہناں گُناہگار لوکاں دِیاں گلاں برداشت کیتیاں جنہاں نے اوہدی بےعزتی کر کے اپنا ای نقصان کیتا۔ ایس لئی تُسی یسوع دی مثال تے غور کرو تاکہ تُسی تھک کے ہمت نہ ہارو۔
4 تُسی گُناہ دے خلاف لڑ رہے او پر حالے گل ایس حد تک نئیں پونچی کہ توانوں جان دینی پووے۔ 5 نالے تُسی بالکل بُھل گئے او کہ خدا نے توانوں پُتر ہون دے ناتے ایہہ نصیحت کیتی اے: ”بیٹا، یہوواہ وَلّوں مِلن والی درستی دی بےقدری نہ کر تے جدوں اوہ تینوں سدُھارے* تے ہمت نہ ہار 6 کیونکہ یہوواہ اوہناں دی درستی کردا اے جنہاں نال اوہ محبت کردا اے۔ ہاں، اوہ جنہوں اپنا پُتر بناندا اے، اوہنوں سزا وی دیندا اے۔“*
7 جدوں تواڈی درستی کیتی جاندی اے تے ہمت نہ ہارو سگوں اوہنوں قبول کرو کیونکہ خدا نے توانوں اپنے پُتر بنایا اے۔ کیہہ ہر پیو اپنے پُتر دی درستی نئیں کردا؟ 8 جے خدا تواڈی درستی نہ کردا تے فیر تُسی پُتر نئیں سگوں ناجائز اولاد ہوندے۔ 9 ساڈے چوں ہر اِک دا پیو ساڈی درستی کردا سی۔ پر اَسی فیر وی اوہدی عزت کرنے ساں۔ فیر کیہہ زندہ رہن لئی سانوں اپنے اسمانی باپ دے ہور وی زیادہ تابعدار نئیں ہونا چاہی دا؟ 10 ساڈے چوں ہر اِک دے پیو نے اپنی سمجھ مطابق کجھ عرصے لئی ساڈی درستی کیتی۔ پر خدا ساڈے فائدے لئی ساڈی درستی کردا اے تاکہ اَسی وی اوہدے وانگوں پاک بن سکئے۔ 11 ایہہ سچ اے کہ جدوں ساڈی درستی کیتی جاندی اے تے سانوں خوشی نئیں سگوں دُکھ ہوندا اے۔ پر جیہڑے لوک ایہدے توں تربیت حاصل کردے نیں، اوہ بعد چ صلحپسند تے نیک بن جاندے نیں۔
12 ایس لئی ڈِھلے ہتھاں تے کمزور گوڈیاں نُوں مضبوط کرو 13 تے سِدھی راہ تے چلدے رہوو تاکہ جیہڑا کمزور اے، اوہ ہور کمزور نہ ہو جائے سگوں ٹھیک ہو جائے۔ 14 سارے لوکاں نال صلح قائم رکھن دی پوری کوشش کرو تے اپنا چالچلن پاک رکھو۔ فیر ای تُسی مالک نُوں ویکھ سکو گے۔ 15 ایس گل دا خاص خیال رکھو کہ تُسی کوئی وی ایہو جیہا کم نہ کرو جدی وجہ توں تُسی خدا دی عظیم رحمت گنوا بیٹھو تے تواڈے چ کوئی زہریلی بُوٹی جڑ پھڑ لوے جدی وجہ توں مصیبت کھڑی ہو جائے تے بوہت سارے لوک ناپاک ہو جان۔ 16 نالے خبردار رہوو کہ تواڈے چوں کوئی وی جنسیبدکاری نہ کرے تے نہ ای کوئی عیسُو ورگا ہوئے جنہے پاک چیزاں دی قدر نئیں کیتی تے اِک وقت دی روٹی دے بدلے پہلوٹھا ہون دا اپنا حق ویچ دِتا۔ 17 توانوں پتہ اے کہ بعد چ جدوں اوہنے برکت حاصل کرن دی کوشش کیتی تے اوہنوں ٹھکرا دِتا گیا۔ بھانویں کہ اوہنے رو رو کے اپنے پیو دا فیصلہ بدلن دی کوشش کیتی پر اوہ کامیاب نہ ہویا۔
18 تُسی اصلی پہاڑ کول نئیں آئے جیویں اِسرائیلی اوس پہاڑ* کول آئے سن جدے چوں اَگ نکل رہی سی تے جدے آلے دَوالے کالے بدّل تے گُھپ نھیرا سی۔ اوس ویلے طوفان آیا سی 19 تے نرسنگا* وجایا گیا سی۔ نالے کسے دے بولن دی آواز آ رہی سی۔ اوس آواز نُوں سُن کے لوکاں نے موسیٰ اَگے مِنت کیتی کہ اوہناں نال ہور گل نہ کیتی جائے 20 کیونکہ اوہ ایہہ حکم سُن کے ڈر گئے سن کہ ”جے کوئی جانور وی ایس پہاڑ تے چڑھیا تے اوہنوں پتھراں نال جانوں مار دِتا جائے گا۔“ * 21 اوہ نظارہ ایناں خوفناک سی کہ موسیٰ نے وی کہیا: ”مَیں ڈر نال کمب رہیا واں۔“ 22 پر تُسی صِیّون دے پہاڑ، زندہ خدا دے شہر اسمانی یروشلم تے لکھاں فرشتیاں دی جماعت کول آئے او۔ 23 نالے تُسی خدا دے پہلوٹھے پُتراں* دی کلیسیا کول آئے او جنہاں دے ناں اسمان تے لکھے گئے نیں۔ ہاں، ساریاں دی عدالت کرن والے خدا دے تخت کول تے اوہناں نیک لوکاں کول آئے او جیہڑے پاک روح دے مطابق زندگی گزاردے نیں تے جنہاں نُوں گُناہ توں پاک کیتا گیا اے۔ 24 نالے تُسی نویں عہد دے وِچولے یسوع کول آئے او جنہے ساڈے تے خون چھڑکیا اے۔ ایہہ خون ہابل دے خون نالوں بہتر اے۔*
25 خبردار رہوو کہ تُسی اوہدی گل سُنن توں اِنکار نہ کرو* جیہڑا اسمانوں بول رہیا اے۔ جے اوہناں لوکاں نُوں سزا ملی جنہاں نے زمین تے خدا دے نمائندے دی آگاہی سُنن توں اِنکار کیتا تے فیر سوچو کہ جے اَسی اسمانوں بولن والے دی گل سُنن توں اِنکار کراں گے تے ساڈا کیہہ حشر ہوئے گا؟ 26 اوس ویلے خدا دی آواز نال زمین ہل گئی۔ پر ہُن اوہنے ایہہ وعدہ کیتا اے: ”مَیں اِک وار فیر صرف زمین نُوں ای نئیں سگوں اسمان نُوں وی ہلاواں گا۔“ 27 جدوں خدا نے کہیا: ”اِک وار فیر“ تے اوہنے ظاہر کیتا کہ اوہ اوہناں چیزاں* نُوں ہلا ہلا کے ختم کر دَوے گا جیہڑیاں اوہنے نئیں بنائیاں تاکہ اوہ چیزاں قائم رہن جیہڑیاں نئیں ہلائیاں جان گیاں۔ 28 اَسی اوس بادشاہی دے وارث بناں گے جیہڑی ہلائی نئیں جا سکدی۔ ایس لئی آؤ، وفادار رہیے تاکہ خدا ساڈے تے عظیم رحمت کردا رہوے۔ ایس رحمت دے ذریعے اَسی خوف تے احترام نال خدا دی عبادت کر کے اوہنوں خوش کر سکنے آں۔ 29 اصل چ ساڈا خدا تباہ کرن والی اَگ اے۔