عبرانیوں دے ناں خط
4 خدا دے وعدے مطابق اَسی حالے وی اوہدے آرام چ شامل* ہو سکنے آں۔ ایس لئی آؤ، خبردار رہیے تے کوئی ایہو جیہا کم نہ کریئے جدی وجہ توں ساڈے چوں کوئی وی اوہدے آرام چ شامل ہون دا موقع گنوا بیٹھے۔ 2 سانوں وی خوشخبری سُنائی گئی اے بالکل اونویں ای جیویں ساڈے پیو دادیاں نُوں سُنائی گئی سی۔ بھانویں کہ اوہناں نے خوشخبری* سُنی سی پر اوہناں نُوں کوئی فائدہ نئیں ہویا کیونکہ اوہ فرمانبردار لوکاں ورگے نئیں سن جنہاں نے ایمان ظاہر کیتا۔ 3 اَسی ایمان ظاہر کیتا اے، ایس لئی اَسی اوہدے آرام چ شامل ہو سکنے آں کیونکہ خدا نے نافرمان لوکاں بارے کہیا: ”مَیں غصے چ قسم کھادی کہ ”اوہ میرے آرام چ شامل نئیں ہون گے۔““ اوہنے ایہہ گل کہی بھانویں کہ دُنیا دی بنیاد رکھن دے ویلے توں اوہدے کم پورے ہو گئے سن۔ 4 پاک کلام چ ستویں دن بارے لکھیا اے: ”خدا نے اپنے سارے کم ختم کر کے ستویں دن آرام کیتا۔“ 5 نالے اوہنے ایہہ وی کہیا: ”اوہ میرے آرام چ شامل نئیں ہون گے۔“
6 جنہاں لوکاں نُوں سب توں پہلاں خوشخبری سُنائی گئی سی، اوہ اپنی نافرمانی دی وجہ توں خدا دے آرام چ شامل نئیں ہوئے۔ پر کجھ لوکاں کول حالے وی اوہدے آرام چ شامل ہون دا موقع اے۔ 7 ایسے لئی جدوں خدا نے بڑے عرصے بعد داؤد دے زبور چ لفظ ”اَج“ استمال کیتا تے اوہدے توں ظاہر ہویا کہ اوہنے دُبارہ اِک خاص دن ٹھہرایا اے جیویں کہ مَیں پہلاں وی خدا دی ایس گل دا حوالہ دِتا کہ ”اَج جدوں تُسی میری آواز سُنو تے اپنے دِلاں نُوں سخت نہ کرنا۔“ 8 جے یشوع اِسرائیلیاں نُوں اوس جگہ لے گیا ہوندا جِتھے اوہناں نُوں خدا وَلّوں آرام ملنا سی تے فیر بعد چ خدا اِک ہور دن دا ذکر نہ کردا۔ 9 ایس لئی اَج وی خدا دے بندیاں لئی سبت دے دن ورگا آرام دا دن ہے وے۔ 10 جیہڑا بندہ خدا دے آرام چ شامل ہوندا اے، اوہ وی اپنے کماں توں آرام کردا اے جیویں خدا نے اپنے کماں توں آرام کیتا۔
11 ایس لئی آؤ، اَسی خدا دے آرام چ شامل ہون دی پوری کوشش کریئے تاکہ ساڈے چوں کوئی وی اوہناں وانگوں نافرمانی نہ کرن لگ پووے۔ 12 یاد رکھو کہ خدا دا کلام زندہ تے طاقتور اے تے کسے وی دو دھاری تلوار نالوں زیادہ تیز اے۔ جیویں اِک تیز تلوار جسم نُوں چیر کے گُودے نُوں ہڈیاں* توں الگ کردی اے، اونویں ای کلام انسان دے اندر تک جا کے ظاہر کردا اے کہ اوہ اندروں کیہو جیہا اے تے باہروں کیہو جیہا اے۔ نالے ایہہ اوہدے دل دے خیالاں تے ارادیاں نُوں جان لیندا اے۔ 13 اَسی خدا نُوں حساب دینا اے جدی نظر توں کوئی وی چیز چھپی نئیں اے سگوں ہر چیز اوہدے سامنے بےپردہ اے تے اوہ سب کجھ صاف صاف ویکھ سکدا اے۔
14 ساڈا اعلیٰ کاہن خدا دا پُتر یسوع اے۔ اوہ بوہت عظیم اے تے اسمان تے چلا گیا اے۔ ایس لئی آؤ، اوہدے تے اپنے ایمان بارے ساریاں نُوں دَسیے۔ 15 ساڈا اعلیٰ کاہن ساڈیاں کمزوریاں نُوں چنگی طرحاں سمجھدا اے* کیونکہ ساڈے وانگوں اوہنوں وی ہر لحاظ نال اَزمایا گیا پر اوہنے کدی کوئی گُناہ نئیں کیتا۔ 16 ایس لئی آؤ، اَسی عظیم رحمت دے مالک یعنی خدا دے تخت دے سامنے عبادت کریئے تے بغیر کسے ڈر دے دُعا کریئے تاکہ اوہ ساڈے تے رحم کرے تے اپنی عظیم رحمت دی وجہ توں صحی وقت تے* ساڈی مدد کرے۔