متی دی اِنجیل
17 چھ دِناں بعد یسوع اپنے نال پطرس، یعقوب تے اوہدے بھرا یوحنا نُوں لے کے اِک اُچے پہاڑ تے گیا۔ اوتھے اوہناں چاراں دے سوا ہور کوئی نئیں سی۔ 2 اوہناں دے سامنے اوہدا روپ بدل گیا یعنی اوہدا چہرہ سورج وانگوں چمکن لگ پیا تے اوہدے کپڑے روشنی وانگوں لِشکن لگ پئے۔ 3 تے ویکھو! اوہناں دے سامنے موسیٰ تے ایلیاہ ظاہر ہوئے تے اوہ دونویں یسوع نال گل کر رہے سن۔ 4 فیر پطرس نے یسوع نُوں کہیا: ”مالک، چنگا اے کہ اَسی ایتھے آئے آں۔ جے تُوں کہویں تے مَیں ایتھے تِن تمبو لا دینا واں۔ اِک تیرے لئی، اِک موسیٰ لئی تے اِک ایلیاہ لئی۔“ 5 اوہ حالے گل کر ای رہیا سی کہ ویکھو!اِک چمکیلا بدّل اوہناں تے چھا گیا تے بدّل چوں آواز آئی: ”ایہہ میرا پیارا پُتر اے جدے توں مَیں خوش آں۔ ایہدی سُنو۔“* 6 ایہہ سُن کے شاگرد بوہت ڈر گئے تے اوہناں نے گوڈیاں بھار بہہ کے سِر جُھکا لئے۔ 7 فیر یسوع اوہناں دے کول آیا تے اوہناں نُوں چُھو کے کہیا: ”اُٹھو، ڈرو نہ۔“ 8 جدوں اوہناں نے سِر چُک کے ویکھیا تے اوتھے یسوع دے علاوہ ہور کوئی نئیں سی۔ 9 فیر پہاڑ توں تھلے آندے ویلے یسوع نے اوہناں نُوں حکم دِتا: ”ایس رویا بارے کسے نُوں نہ دَسنا جدوں تک کہ انسان دے بیٹے نُوں مُردیاں چوں زندہ نئیں کر دِتا جاندا۔“
10 پر شاگرداں نے یسوع نُوں پچھیا: ”فیر شریعت دے عالم ایہہ کیوں کہندے نیں کہ پہلے ایلیاہ دا آنا ضروری اے؟“ 11 یسوع نے جواب دِتا: ”ہاں، ایلیاہ ضرور آئے گا تے سب کجھ ٹھیک کرے گا 12 سگوں مَیں توانوں کہنا واں کہ ایلیاہ تے آ گیا اے۔ پر اوہناں نے اوہنوں نئیں پچھانیا تے اوہدے نال اپنی مرضی مطابق سلوک کیتا۔ ایسے طرحاں انسان دے بیٹے نُوں وی اوہناں دے ہتھوں ظلم سہنا پووے گا۔“ 13 فیر شاگرد سمجھ گئے کہ اوہ یوحنا بپتسمہ دین والے دی گل کر رہیا اے۔
14 جدوں اوہ لوکاں دی اِک بِھیڑ کول پونچے تے اِک بندہ یسوع کول آیا تے اوہدے اَگے گوڈے ٹیک کے اوہنے کہیا: 15 ”مالک، میرے پُتر تے رحم کر۔ اوہ بڑا بیمار اے تے اوہنوں مرگی دے دورے پیندے نیں۔ اوہ اکثر کدی اَگ چ تے کدی پانی چ ڈِگ پیندا اے۔ 16 مَیں اوہنوں تیرے شاگرداں کول لے کے آیا پر اوہ اوہنوں ٹھیک نئیں کر سکے۔“ 17 یسوع نے جواب دِتا: ”اَے ایمان توں خالی تے وِگڑی ہوئی پُشت، مینوں کِنّاں چِر تواڈے نال رہنا پووے گا تے توانوں سہنا پووے گا؟ مُنڈے نُوں میرے کول لے کے آؤ۔“ 18 فیر یسوع نے باغی فرشتے نُوں جھڑکیا تے اوہ مُنڈے وچوں نکل گیا تے مُنڈا اوسے ویلے ٹھیک ہو گیا۔ 19 فیر جدوں یسوع کلّا سی تے شاگرداں نے آ کے اوہنوں پچھیا: ”اَسی اوس باغی فرشتے نُوں کیوں نئیں کڈھ سکے؟“ 20 یسوع نے اوہناں نُوں کہیا: ”کیونکہ تواڈا ایمان کمزور اے۔ مَیں توانوں سچ کہنا واں کہ جے تواڈے اندر رائی دے دانے جِنّاں وی ایمان ہے وے تے تُسی ایس پہاڑ نُوں کہوو گے کہ ایتھوں اُکھڑ کے اوتھے چلا جا تے اوہ چلا جائے گا تے تواڈے لئی کجھ وی کرنا ناممکن نئیں ہوئے گا۔“ 21 *—
22 جدوں یسوع تے اوہدے شاگرد گلیل چ سن تے یسوع نے اوہناں نُوں کہیا: ”انسان دے بیٹے نُوں دھوکھے نال دُشمناں دے حوالے کیتا جائے گا 23 تے اوہ اوہنوں جانوں مار دین گے۔ پر تیجے دن اوہنوں زندہ کر دِتا جائے گا۔“ ایہہ سُن کے شاگرد بڑے دُکھی ہوئے۔
24 جدوں اوہ کفرنحوم پونچے تے ہیکل دا ٹیکس* لین والے پطرس کول آئے تے اوہنوں پچھیا: ”کیہہ تواڈا اُستاد ہیکل دا ٹیکس دیندا اے؟“ 25 اوہنے کہیا: ”ہاں دیندا اے۔“ پر جدوں پطرس گھر پونچیا تے یسوع نے اوہدے کجھ کہن توں پہلاں ای پچھیا: ”شمعون، تیرے خیال چ دُنیا دے بادشاہ کِنہاں کولوں ٹیکس لیندے نیں؟ اپنے پُتراں کولوں یاں فیر لوکاں کولوں؟“ 26 جدوں پطرس نے کہیا: ”لوکاں کولوں،“ تے یسوع نے اوہنوں کہیا: ”تے فیر ایہدا مطلب اے کہ پُتراں نُوں ٹیکس بھرن دی لوڑ نئیں ہوندی۔ 27 پر اَسی اوہناں نُوں ناراض نئیں کرنا چاہندے۔ ایس لئی تُوں جا کے جھیل چ کُنڈی پا تے جیہڑی مچھی پہلاں پھسے گی تُوں اوہدا مُونہہ کھولیں، اوہدے چ تینوں چاندی دا اِک سِکّہ ملے گا۔ اوہدے نال تُوں جا کے اپنا تے میرا ٹیکس بھردے۔“