کُرنتھیوں دے ناں دُوجا خط
13 مَیں تیجی وار تواڈے کول آن لئی تیار آں۔ پاک کلام چ لکھیا اے کہ ”ہر معاملے بارے فیصلہ دو یاں تِن گواہواں دے بیان مطابق کیتا جائے۔“* 2 بھانویں کہ حالے مَیں تواڈے نال نئیں آں پر میریاں گلاں نُوں ایس طرحاں منو جیویں مَیں دُوجی وار تواڈے کول آیا واں۔ مَیں اوہناں لوکاں نُوں جنہاں نے پہلاں گُناہ کیتا سی تے باقی ساریاں نُوں وی خبردار کر رہیا واں کہ جدوں مَیں فیر توں آواں گا تے گُناہ کرن والیاں نُوں نئیں بخشاں گا۔ 3 اِنج تُسی جان جاؤ گے کہ مسیح واقعی میرے ذریعے گل کر رہیا اے تے اوہ تواڈے نال پیش آندے ویلے کمزور نئیں اے سگوں طاقتور اے۔ 4 ایہہ سچ اے کہ اوہ انسان ہون دے ناتے کمزور سی تے اوہنوں سُولی تے چڑھایا گیا سی۔ پر اوہ خدا دی طاقت نال زندہ ہو گیا۔ اوہدے وانگوں اَسی وی کمزور آں۔ پر اَسی اوہدے نال رہواں گے تے ایہہ خدا دی طاقت نال ہوئے گا جیہڑی تواڈے تے اثر کردی اے۔
5 اپنا جائزہ لیندے رہوو کہ تُسی ایمان دی راہ تے چل رہے او یاں نئیں۔ اپنے آپ نُوں پَرکھدے رہوو کہ تُسی کیہو جہے انسان او۔ یسوع مسیح تواڈے نال اِک مُٹھ اے پر لازمی اے کہ تُسی اوہ کم کرو جنہاں توں خدا خوش ہوندا اے۔ 6 خدا ساڈے توں خوش اے تے امید اے کہ تُسی وی ایہہ گل من لوو گے۔
7 بھانویں کہ دُوجیاں نُوں لگے کہ خدا ساڈے توں خوش نئیں اے پر ساڈی دُعا اے کہ تُسی کوئی غلط کم نہ کرو۔ اَسی ایہہ دُعا ایس لئی نئیں کردے کہ دُوجیاں نُوں یقین ہو جائے کہ خدا ساڈے توں خوش اے سگوں ایس لئی کرنے آں تاکہ تُسی صحی کم کرو۔ 8 اَسی سچائی دے خلاف کوئی کم نئیں کر سکدے سگوں صرف سچائی دے حق چ کم کر سکنے آں۔ 9 یقین رکھو کہ جدوں تُسی طاقتور ہوندے او* تے سانوں بڑی خوشی ہوندی اے فیر بھانویں اوس ویلے اَسی کمزور ای کیوں نہ ہوئیے۔ ایس لئی ساڈی دُعا اے کہ تُسی اپنی درستی کردے رہوو۔ 10 مَیں ایہہ گلاں ایس لئی لکھ رہیا واں تاکہ جدوں مَیں تواڈے کول آواں تے مینوں تواڈے نال سختی نہ کرنی پووے۔ اصل چ مالک نے مینوں ایس لئی اِختیار دِتا اے تاکہ مَیں تواڈا حوصلہ ودھاواں نہ کہ توانوں بےحوصلہ کراں۔
11 آخر چ بھراوو، مَیں چاہنا واں کہ تُسی ہمیشاں خوش رہوو، اپنی درستی کرو، تسلی پاؤ، اِکو جہی سوچ رکھو تے صلح نال رہوو۔ فیر محبت کرن والا خدا جیہڑا اِطمینان دا سرچشمہ اے، تواڈے نال ہوئے گا۔ 12 گلے مِل کے* اِک دُوجے نُوں سلام کرو۔ 13 سارے مُقدس لوکاں وَلّوں توانوں سلام۔
14 دُعا اے کہ ساڈے مالک یسوع مسیح دی عظیم رحمت، خدا دی محبت تے پاک روح توانوں مِلدی رہوے جدے توں سانوں ساریاں نُوں فائدہ ہوندا اے۔