متی دی اِنجیل
11 اپنے 12 شاگرداں نُوں ہدیتاں دین دے بعد یسوع آلے دوالے دے شہراں چ مُنادی کرن تے تلیم دین ٹُر پیا۔
2 پر جیل وچ یوحنا نے مسیح دے کماں بارے سُن کے اپنے شاگرداں نُوں اوہدے کول ایہہ پچھن لئی بھیجیا: 3 ”کیہہ تُوں اوہی ایں جنہے آنا سی یاں اَسی کسے ہور نُوں اُڈیکئیے؟“ 4 یسوع نے اوہناں نُوں کہیا: ”جا کے یوحنا نُوں اوہ ساریاں گلاں دَسو جیہڑیاں تُسی ویکھ رہے او تے سُن رہے او 5 کہ اَنھے ویکھ رہے نیں، لنگڑے ٹُر پھر رہے نیں، کوڑھی شفا پا رہے نیں، بولے سُن رہے نیں، مُردیاں نُوں زندہ کیتا جا رہیا اے تے غریباں نُوں خوشخبری سُنائی جا رہی اے۔ 6 خوش اے اوہ جیہڑا میرے بارے شک نئیں کردا۔“
7 یوحنا دے شاگرداں دے جان توں بعد یسوع لوکاں نُوں یوحنا بارے آکھن لگ پیا: ”تُسی ویرانے چ کیہہ ویکھن گئے سو؟ کیہہ ہوا نال ہِلدے ہوئے کانے* نُوں؟ 8 فیر تُسی کیہہ ویکھن گئے سو؟ کیہہ شاندار کپڑے* پائے ہوئے آدمی نُوں؟ ایہو جہے کپڑے پان والے لوک تے محلاں چ رہندے نیں۔ 9 فیر تُسی اوتھے کیوں گئے سو؟ کیہہ اِک نبی نُوں ویکھن؟ ہاں، مَیں توانوں کہنا واں کہ اوہ تے نبیاں توں وی ودھ کے وے۔ 10 اوہ اوہی اے جدے بارے لکھیا اے: ”ویکھ! مَیں اپنا پیغمبر تیرے اَگے اَگے بھیج رہیا واں جیہڑا تیرے لئی راہ تیار کرے گا۔“ 11 مَیں توانوں سچ کہنا واں کہ اَج تک جِنّے وی انسان پیدا ہوئے نیں اوہناں وچوں یوحنا بپتسمہ دین والے توں وڈا کوئی نئیں۔ پر جیہڑا اسمان دی بادشاہی چ سب توں چھوٹا اے، اوہ یوحنا نالوں وڈا اے۔ 12 یوحنا بپتسمہ دین والے دے دِناں توں لے کے ہُن تک لوک اسمان دی بادشاہی چ جان لئی بڑا زور لا رہے نیں تے جیہڑے ایہنوں حاصل کرن لئی اپنا پورا زور لاندے نیں، اوہ ایہنوں پا لیندے نیں 13 کیونکہ نبیاں تے شریعت دی تلیم دا اعلان یوحنا دے زمانے تک کیتا گیا۔ 14 ایس لئی تُسی بھانویں منو یاں نہ منو، یوحنا ای اوہ ایلیاہ اے جنہے آنا سی۔ 15 کن لا کے سُنو کہ مَیں کیہہ کہہ رہیا واں۔
16 ایس زمانے دے لوک کدے ورگے نیں؟ ایہہ اوہناں چھوٹے بچیاں ورگے نیں جیہڑے بازار چ بیٹھے ہوئے نیں تے دُوجے بچیاں نُوں آواز مار کے کہندے نیں: 17 ”اَسی تواڈے لئی بانسری وجائی پر تُسی نہ نچے، اَسی تواڈے لئی وین پائے پر تُسی نہ پِٹے۔“ 18 ایسے طرحاں یوحنا دُوجیاں وانگوں کھاندا پیندا نئیں پر لوک کہندے نیں کہ ”اوہنوں اِک باغی فرشتہ چِمبڑیا ہویا اے۔“ 19 جد کہ انسان دا بیٹا* کھاندا پیندا اے فیر وی لوک اوہدے بارے کہندے نیں کہ ”ویکھو! پیٹو تے شرابی، ٹیکس لین والیاں تے گُناہگاراں دا یار۔“ پر حکمت اپنے کماں توں صحی ثابت ہوندی اے۔“*
20 فیر اوہ اوہناں شہراں نُوں سختی نال ڈانٹن لگ پیا جِتھے اوہنے زیادہ معجزے کیتے سن پر فیر وی اوتھوں دے لوکاں نے توبہ نئیں کیتی۔ 21 اوہنے کہیا: ”لعنت تیرے تے خُرازین! لعنت تیرے تے بیتصیدا! کیونکہ جیہڑے معجزے تواڈے چ کیتے گئے جے اوہ صور تے صیدا چ کیتے جاندے تے اوتھوں دے لوکاں نے بوریاں پا کے تے سواہ چ بہہ کے کدوں دی توبہ کر لئی ہوندی۔ 22 پر مَیں توانوں کہنا واں کہ عدالت دے دن تُسی صور تے صیدا نالوں بوہتی سزا دے لائق ہووو گے۔ 23 تے اَے کفرنحوم، کیہہ تینوں اسمان تے چڑھایا جائے گا؟ نئیں، سگوں تُوں تے قبر* چ جائیں گا کیونکہ جیہڑے معجزے تیرے چ کیتے گئے جے اوہ سدوم چ کیتے جاندے تے اوہ اَج تک موجود ہوندا۔ 24 ایس لئی مَیں تینوں کہنا واں کہ عدالت دے دن تُوں سدوم نالوں بوہتی سزا دے لائق ہوئیں گا۔“
25 اوس ویلے یسوع نے کہیا: ”اَے باپ، اسمان تے زمین دے مالک! مَیں ساریاں دے سامنے تیری وڈیائی کرنا واں کیونکہ تُوں ایہہ گلاں عقلمنداں تے سیانیاں توں لُکائیاں پر چھوٹے بچیاں اُتے ظاہر کیتیاں۔ 26 ہاں، اَے باپ، ایہی تیری مرضی سی۔ 27 میرے باپ نے سب کجھ میرے حوالے کر دِتا اے تے کوئی وی پُتر نُوں پوری طرحاں نئیں جان دا سوائے باپ دے تے نہ ای کوئی باپ نُوں پوری طرحاں جان دا اے سوائے پُتر دے تے اوس انسان دے جدے تے پُتر باپ نُوں ظاہر کرنا چاہندا اے۔ 28 اَے محنت کرن والیو تے بھار تھلے دبے ہوئے سارے لوکو، میرے کول آؤ۔ مَیں توانوں آرام تے تازگی بخشاں گا۔ 29 میرا جُوا* اپنے موڈھیاں تے چُک لوَو تے میرے کولوں سکھو کیونکہ مَیں نرممزاج تے دلوں خاکسار آں۔ فیر توانوں آرام تے تازگی ملے گی 30 کیونکہ میرا جُوا چُکنا اسان اے تے میرا بھار ہولا اے۔“