رسولاں دے اعمال
15 فیر یہودیہ توں کجھ شاگرد انطاکیہ آئے جیہڑے بھراواں نُوں ایہہ تلیم دین لگ پئے: ”جدوں تک تُسی موسیٰ دی شریعت دے مطابق ختنہ نئیں کراؤ گے، توانوں نجات نئیں ملے گی۔“ 2 پولُس تے برنباس دا اوہناں نال بوہت جھگڑا تے بحث ہوئی۔ ایس لئی فیصلہ ہویا کہ اوہ دونویں کجھ ہور بھراواں نال یروشلم چ رسولاں تے بزرگاں کول جان گے تاکہ ایس مسئلے نُوں حل کیتا جائے۔
3 جدوں اوہ نکلے تے کلیسیا چوں کجھ جنے تھوڑی دُور تک اوہناں دے نال گئے۔ فیر پولُس، برنباس تے کجھ ہور بھرا فینیکے تے سامریہ چوں لنگھے تے اوتھوں دے بھراواں نُوں کُھل کے دَسیا کہ غیریہودی قوماں دے لوک وی اپنے آپ نُوں بدل کے خدا دی عبادت کرن لگ پئے نیں۔ ایہہ سُن کے بھراواں نُوں بڑی خوشی ہوئی۔ 4 جدوں اوہ یروشلم پونچے تے کلیسیا دے بھین بھرا، رسول تے بزرگ بڑی خوشی نال اوہناں نُوں ملے۔ پولُس تے برنباس نے اوہناں نُوں دَسیا کہ خدا نے اوہناں دے ذریعے بوہت سارے کم کیتے۔ 5 پر اوتھے کجھ ایہو جہے شاگرد وی سن جیہڑے پہلاں فریسیاں دی تلیم تے چلدے سن۔ اوہناں نے اُٹھ کے کہیا: ”غیریہودی لوکاں لئی ختنہ کرانا لازمی اے۔ اوہناں نُوں حکم دِتا جائے کہ اوہ موسیٰ دی شریعت تے عمل کرن۔“
6 ایس لئی رسول تے بزرگ ایس معاملے تے غور کرن لئی جمع ہوئے۔ 7 اوہناں چ کافی دیر تک بحث ہوئی۔ فیر پطرس نے اُٹھ کے کہیا: ”بھراوو، تُسی چنگی طرحاں جان دے او کہ خدا نے ساڈے وچوں پہلاں مینوں چُنیا سی تاکہ میرے ذریعے غیریہودیاں نُوں خوشخبری سُنائی جائے تے اوہ ایمان لیان۔ 8 خدا دِلاں نُوں جان دا اے تے اوہنے ساڈے وانگوں اوہناں نُوں وی پاک روح دے کے ایہہ ظاہر کیتا اے کہ اوہنے اوہناں نُوں قبول کیتا اے۔ 9 خدا نے ساڈے چ تے اوہناں چ کوئی فرق نئیں کیتا سگوں اوہنے اوہناں دے ایمان دی وجہ توں اوہناں دے دِلاں نُوں پاک کیتا۔ 10 فیر تُسی خدا نُوں کیوں اَزما رہے او تے شاگرداں دے موڈھیاں اُتے اوہ بھار کیوں پا رہے او جیہڑا نہ تے ساڈے پیو دادیاں کولوں چُکیا گیا تے نہ ای ساڈے کولوں؟ 11 پر غور کرو کہ ساڈے وانگوں غیریہودی لوک وی ایہی ایمان رکھدے نیں کہ نجات مالک یسوع دی عظیم رحمت دے ذریعے ملے گی۔“
12 ایہہ سُن کے اوہ سارے چپ ہو گئے۔ فیر اوہ برنباس تے پولُس دی گل سُنن لگ پئے جنہاں نے دَسیا کہ خدا نے اوہناں دے ذریعے غیریہودی قوماں وچ بڑیاں نشانیاں وکھائیاں تے حیران کرن والے کم* کیتے۔ 13 جدوں اوہناں دونواں نے اپنی گل ختم کر لئی تے یعقوب نے کہیا: ”بھراوو، میری گل سُنو، 14 شمعون* نے توانوں صاف صاف دَسیا اے کہ ہُن خدا نے غیریہودی لوکاں تے وی دھیان دِتا اے تاکہ اوہ اوہناں چوں وی ایہو جہے لوکاں نُوں چُنے جیہڑے اوہدے ناں توں پچھانے جان۔* 15 ایہی گل خدا نے نبیاں دے ذریعے وی کہی سی جیویں کہ پاک کلام چ لکھیا اے: 16 ”ایہہ سب ہون دے بعد مَیں واپس آ کے داؤد دے ڈِگے ہوئے گھر* نُوں فیر توں کھڑا کراں گا۔ مَیں ایہنوں دُبارہ بنانواں گا تے ایہدے کھنڈراں دی مرمت کراں گا 17 تاکہ جیہڑے لوک باقی رہ گئے نیں، اوہ دُوجیاں قوماں دے لوکاں نال مِل کے پورے دل نال یہوواہ نُوں لبھن یعنی اوہناں لوکاں نال مِل کے جنہاں نُوں مَیں اپنا ناں دِتا اے۔ مَیں یہوواہ ایہہ گل کہہ رہیا واں تے اوہ سارے کم کر رہیا واں 18 جنہاں نُوں کرن دا فیصلہ مَیں صدیاں پہلاں ای کر لیا سی۔“ 19 ایس لئی میری صلاح* اے کہ خدا تے ایمان لیان والے غیریہودی لوکاں نُوں پریشان نہ کیتا جائے 20 سگوں اوہناں نُوں لکھ کے ایہہ دَسیا جائے کہ اوہ بُت پرستی نال تعلق رکھن والیاں گھٹیا چیزاں، جنسی بدکاری تے گلا گُھٹ کے مارے گئے جانوراں دے گوشت* توں دُور رہن تے خون استمال نہ کرن۔ 21 اصل چ پرانے زمانے توں ای لوک شہر شہر چ موسیٰ دی شریعت چ لکھیاں گلاں دی مُنادی کردے آئے نیں تے ہر سبت دے دن عبادتگاہواں چ ساریاں دے سامنے اوہدیاں کتاباں پڑھیاں جاندیاں نیں۔“
22 فیر رسولاں تے بزرگاں نے فیصلہ کیتا کہ اوہ دو بھراواں نُوں چُن کے پولُس تے برنباس نال انطاکیہ گھلن گے۔ ساری کلیسیا نے ایس فیصلے چ اوہناں دا ساتھ دِتا۔ ایس کم لئی اوہناں نے کلیسیا چ پیشوائی کرن والے دو بھراواں نُوں چُنیا یعنی یہوداہ جنہوں برسبّا وی کہندے نیں تے سیلاس۔ 23 ایہناں بھراواں دے ہتھ اوہناں نے ایہہ خط گھلیا:
”رسولاں تے بزرگاں یعنی تواڈے بھراواں وَلّوں، انطاکیہ، سُوریہ تے کِلکیہ دے بھراواں دے ناں جیہڑے غیریہودی قوماں چوں نیں: سلام، 24 اَسی سُنیا اے کہ ساڈے وچوں کجھ بھراواں نے آ کے اپنیاں گلاں نال توانوں پریشان کیتا اے تے گمراہ کرن دی کوشش کیتی اے۔ پر اَسی اوہناں نُوں ایہو جہی کوئی ہدیت نئیں دِتی سی۔ 25 ایس لئی اَسی ساریاں نے مِل کے ایہہ فیصلہ کیتا اے کہ اَسی دو بھراواں نُوں چُن کے ساڈے پیارے بھراواں برنباس تے پولُس نال تواڈے کول گھلاں گے 26 جنہاں نے اپنی زندگی ساڈے مالک یسوع مسیح دے ناں کر دِتی اے۔* 27 اَسی یہوداہ تے سیلاس نُوں ایس لئی گھل رہے آں تاکہ اوہ وی ایس خط چ لکھیاں گلاں بارے توانوں دَسن۔ 28 پاک روح دی رہنمائی چ اَسی فیصلہ کیتا اے کہ اَسی تواڈے تے ہور کوئی بوجھ نئیں پانواں گے۔ تُسی صرف ایہناں ضروری گلاں تے عمل کرنا: 29 تُسی بُت پرستی نال تعلق رکھن والیاں چیزاں،* خون، گلا گُھٹ کے مارے گئے جانوراں دے گوشت* تے جنسی بدکاری توں دُور رہنا۔ جے تُسی دھیان نال ایہناں ہدیتاں تے چلو گے تے تُسی سلامت رہوو گے۔ خوش رہوو!“*
30 فیر اوہناں چاراں نُوں انطاکیہ گھلیا گیا۔ اوتھے پونچ کے اوہناں نے سارے شاگرداں نُوں جمع کیتا تے اوہناں نُوں اوہ خط دِتا۔ 31 خط پڑھ کے شاگرداں نُوں بڑا حوصلہ ملیا تے اوہ بوہت خوش ہوئے۔ 32 یہوداہ تے سیلاس وی نبی سن۔ ایس لئی اوہناں نے ایہو جہیاں بوہت ساریاں گلاں کیتیاں جنہاں توں بھراواں دا حوصلہ تے ہمت ودھی۔ 33 اوہ کجھ دِناں تک اوتھے رہے۔ فیر بھراواں نے اوہناں نُوں خدا حافظ کہیا تے واپس یروشلم گھل دِتا۔ 34 ——*35 پر پولُس تے برنباس انطاکیہ چ رہے تے دُوجے کئی شاگرداں نال مِل کے یہوواہ دے کلام دی خوشخبری سُناندے رہے تے تلیم دیندے رہے۔
36 فیر کجھ دِناں بعد پولُس نے برنباس نُوں کہیا: ”چلو ہُن اَسی اوہناں سارے شہراں چ واپس جا کے بھراواں دا حال چال پتہ کریئے جِتھے اَسی یہوواہ دا کلام سُنایا سی۔“ 37 برنباس نے فیصلہ کیتا ہویا سی کہ یوحنا مرقس وی اوہناں دے نال جائے گا۔ 38 پر پولُس اوہنوں نال نئیں لجانا چاہندا سی کیونکہ اوہ صوبہ پمفیلیہ چ مُنادی کرن لئی اوہناں دے نال نئیں گیا سی سگوں اوہناں نُوں چھڈ کے چلا گیا سی۔ 39 ایس گل تے اوہناں دونواں چ بڑا جھگڑا ہویا تے اوہ اِک دُوجے توں وَکھ ہو گئے۔ برنباس نے یوحنا مرقس نُوں نال لیا تے سمندری جہاز تے بیٹھ کے قُبرص وَل چلا گیا۔ 40 پر پولُس نے سیلاس نُوں چُنیا۔ فیر بھراواں نے پولُس نُوں یہوواہ دی عظیم رحمت دے حوالے کیتا۔ ایہدے بعد پولُس تے سیلاس اوتھوں چلے گئے۔ 41 اوہ سُوریہ تے کِلکیہ گیا تے اوتھوں دِیاں کلیسیاواں دے بھین بھراواں دا حوصلہ ودھایا۔