یوحنا نُوں مِلن والا مُکاشفہ
17 جیہڑے سَت فرشتیاں کول سَت کٹورے سن، اوہناں وچوں اِک نے آ کے مینوں کہیا: ”آ، مَیں تینوں وکھانا واں کہ اوس وڈی طوائف نُوں کیہہ سزا دِتی جائے گی جیہڑی بوہت سارے پانیاں تے بیٹھی اے 2 تے جنہے زمین دے بادشاہواں نال جنسیبدکاری* کیتی اے تے جدی جنسیبدکاری دی مے پی کے زمین تے رہن والے نشے چ ٹُن ہو گئے نیں۔“
3 فرشتہ مینوں پاک روح دی رہنمائی چ اِک ویران جگہ تے لے گیا۔ فیر مَیں اِک عورت نُوں ویکھیا جیہڑی گُوڑھے لال رنگ دے وحشی درندے تے بیٹھی ہوئی سی۔ اوس درندے دے سَت سِر تے دس سنگِ سن تے اوہدے پورے جسم تے خدا دی بےعزتی کرن والے ناں لکھے ہوئے سن۔ 4 اوس عورت دے کپڑے جامنی تے گُوڑھے لال رنگ دے سن تے اوہ سونے، قیمتی پتھراں تے موتیاں دے زیوراں نال سجی ہوئی سی۔ اوہدے ہتھ چ اِک سونے دا پیالہ سی جیہڑا گھٹیا چیزاں تے اوہدی جنسیبدکاری دے ناپاک کماں نال بھریا ہویا سی۔ 5 اوہدے متھے تے ایہہ ناں لکھیا ہویا سی جیہڑا اِک راز سی: ”وڈا بابل، زمین دِیاں گھٹیا چیزاں تے طوائفاں دی ماں۔“ 6 مَیں ویکھیا کہ اوہ عورت مُقدس لوکاں تے یسوع دے گواہواں دا خون پی کے نشے چ ٹُن اے۔
اوہنوں ویکھ کے مَیں بڑا حیران ہویا۔ 7 ایس لئی فرشتے نے مینوں کہیا: ”تُوں حیران کیوں ہو رہیا ایں؟ مَیں تینوں اوس عورت تے اوس وحشی درندے دا راز دَساں گا جدے تے اوہ بیٹھی ہوئی اے تے جدے سَت سِر تے دس سنگِ نیں۔ راز ایہہ وے: 8 تُوں جیہڑا وحشی درندہ ویکھیا، اوہ پہلاں سی تے ہُن نئیں اے۔ پر اوہ اتھاہ گڑھے چوں نِکلن والا اے تے اوہنوں ختم کر دِتا جائے گا۔ جدوں زمین تے رہن والے یعنی اوہ لوک جنہاں دے ناں دُنیا دی بنیاد رکھن دے ویلے توں زندگی دی کتاب چ نئیں لکھے گئے، ویکھن گے کہ وحشی درندہ پہلے سی تے ہُن نئیں اے پر فیر ظاہر ہوئے گا تے اوہ حیران ہون گے۔
9 ایس گل نُوں سمجھن لئی حکمت دی لوڑ اے: سَت سِراں دا اشارہ سَت پہاڑاں وَل اے جنہاں تے اوہ عورت بیٹھی ہوئی اے۔ 10 ایہناں دا مطلب سَت بادشاہ نیں جنہاں چوں پنج آ کے چلے گئے نیں۔ اِک ہے وے تے اِک حالے آیا نئیں۔ پر جدوں اوہ آئے گا تے اوہ تھوڑی دیر لئی رہوے گا۔ 11 اوہ وحشی درندہ جیہڑا سی پر ہُن نئیں اے، اوہ اَٹھواں بادشاہ اے تے سَت بادشاہواں چوں نکلیا اے۔ پر اوہنوں ختم کر دِتا جائے گا۔
12 تُوں جیہڑے دس سنگِ ویکھے، اوہناں دا اشارہ اوہناں دس بادشاہواں وَل اے جنہاں نُوں حالے تک بادشاہی نئیں ملی۔ پر اوہناں نُوں وحشی درندے نال اِک گھنٹے لئی بادشاہی کرن دا اِختیار دِتا جائے گا۔ 13 اوہ مِل کے اپنی طاقت تے اِختیار وحشی درندے نُوں دین دا ارادہ کرن گے۔ 14 اوہ میمنے نال جنگ کرن گے پر میمنا اوہناں تے فتح حاصل کرے گا کیونکہ اوہ مالکاں دا مالک تے بادشاہواں دا بادشاہ اے۔ نالے مالک دے ساتھی وی فتح حاصل کرن گے یعنی اوہ جنہاں نُوں بلایا تے چُنیا گیا اے تے جیہڑے وفادار نیں۔“
15 فیر فرشتے نے مینوں کہیا: ”تُوں طوائف نُوں جیہڑے پانیاں تے بیٹھے ویکھیا، اوہناں دا اشارہ بوہت سارے لوکاں، نسلاں، قوماں تے زباناں وَل اے۔ 16 تُوں جیہڑے دس سنگِ تے وحشی درندہ ویکھیا سی، اوہ اوس طوائف توں نفرت کرن گے، اوہنوں برباد تے ننگا کرن گے، اوہدا گوشت کھا جان گے تے اوہنوں اَگ نال ساڑ کے سواہ کر دین گے 17 کیونکہ خدا اپنی مرضی پوری کرن دا خیال اوہناں دے دِلاں چ پائے گا یعنی ایہہ کہ اوہ سارے اپنے سانجھے ارادے نُوں پورا کرن لئی اوہدوں تک اپنی بادشاہی وحشی درندے نُوں دے دین جدوں تک خدا دِیاں ساریاں گلاں پوریاں نئیں ہو جاندیاں۔ 18 تُوں جیہڑی عورت ویکھی، اوہدا اشارہ وڈے شہر وَل اے تے اوہ اِک ملکہ وانگوں زمین دے بادشاہواں تے حکمرانی کردی اے۔“