متی دی اِنجیل
16 فیر فریسی تے صدوقی یسوع کول آئے تے اوہناں نے اوہنوں اَزمان لئی کہیا: ”سانوں اسمان توں کوئی نشانی وکھا۔“ 2 اوہنے اوہناں نُوں کہیا: ”جدوں شام ہوندی اے تے تُسی کہندے او کہ ”موسم سوہنا ہوئے گا کیونکہ اسمان دا رنگ گُوڑھا لال اے،“ 3 تے جدوں سویر ہوندی اے تے تُسی کہندے او کہ ”اَج موسم ٹھنڈا ہوئے گا تے مینہ پووے گا کیونکہ اسمان دا رنگ گُوڑھا لال تے ہے وے، پر بدّل چھائے ہوئے نیں۔“ تُسی اسمان نُوں ویکھ کے تے سمجھ جاندے او کہ موسم کیہو جیہا ہوئے گا پر ایس زمانے دِیاں نشانیاں نُوں ویکھ کے وی اوہناں دا مطلب نئیں سمجھدے۔ 4 ایہہ بھیڑی تے بےوفا* پُشت وار وار نشانی منگدی اے۔ پر ایہنوں یُوناہ نبی دی نشانی دے علاوہ ہور کوئی نشانی نئیں وکھائی جائے گی۔“ ایہہ کہہ کے اوہ اوہناں نُوں چھڈ کے اوتھوں چلا گیا۔
5 فیر شاگرد جھیل دے دُوجے پاسے چلے گئے۔ پر اوہ اپنے نال روٹیاں لیانا بُھل گئے۔ 6 یسوع نے اوہناں نُوں کہیا: ”خبردار رہوو* تے فریسیاں تے صدوقیاں دے خمیر توں بچ کے رہوو۔“ 7 ایس لئی اوہ اِک دُوجے نُوں کہن لگ پئے: ”اوہنے سانوں ایہہ گل شاید ایس لئی کہی اے کیونکہ اَسی اپنے نال روٹیاں نئیں لیائے۔“ 8 اوہناں دی گل جان کے یسوع نے کہیا: ”اَے کمزور ایمان والیو، تُسی آپس چ ایہہ گل کیوں کر رہے او کہ تواڈے کول روٹیاں نئیں نیں؟ 9 کیہہ تُسی حالے وی نئیں سمجھے؟ یاں کیہہ توانوں یاد نئیں کہ جدوں پنج روٹیاں نال 5000 آدمیاں نے کھانا کھادا سی تے بچے ہوئے ٹکڑیاں نال تُسی کِنّیاں ٹوکریاں بھریاں سن؟ 10 تے جدوں سَت روٹیاں نال 4000 آدمیاں نے کھانا کھادا سی تے اوس ویلے بچے ہوئے ٹکڑیاں نال تُسی کِنّے ٹوکرے بھرے سن؟ 11 تُسی کیوں نئیں سمجھ رہے کہ مَیں روٹی دی گل نئیں کر رہیا سگوں مَیں تے ایہہ کہہ رہیا واں کہ فریسیاں تے صدوقیاں دے خمیر توں بچ کے رہوو۔“ 12 فیر اوہ سمجھ گئے کہ یسوع اصلی خمیر توں نئیں سگوں فریسیاں تے صدوقیاں دی تلیم توں بچ کے رہن دی گل کر رہیا سی۔
13 جدوں یسوع قیصریہ فِلپّی دے علاقے چ پونچیا تے اوہنے اپنے شاگرداں نُوں پچھیا: ”لوکاں دے خیال چ انسان دا بیٹا* کون اے؟“ 14 اوہناں نے کہیا: ”کجھ کہندے نیں یوحنا بپتسمہ دین والا، کجھ لوک کہندے نیں ایلیاہ تے کئی لوک کہندے نیں یرمیاہ یاں کوئی ہور نبی۔“ 15 اوہنے اوہناں نُوں پچھیا: ”پر تواڈے خیال چ مَیں کون آں؟“ 16 شمعون پطرس نے جواب دِتا: ”تُوں مسیح ایں، زندہ خدا دا پُتر۔“ 17 یسوع نے اوہنوں کہیا: ”خوش ایں تُوں، یُوناہ دے پُتر شمعون، کیونکہ ایہہ گل تیرے تے کسے انسان نے نئیں سگوں میرے اسمانی باپ نے ظاہر کیتی اے۔ 18 نالے مَیں تینوں کہنا واں کہ تُوں پطرس ایں تے مَیں ایس چٹان* تے اپنی کلیسیا بنانواں گا جدے تے موت* دا وی کوئی وَس نئیں چلے گا۔ 19 مَیں تینوں اسمان دی بادشاہی دِیاں چابیاں دَواں گا تے جو کجھ تُوں زمین تے بنھیں گا، اوہ پہلاں ای اسمان تے بنھ دِتا گیا ہوئے گا تے جو کجھ تُوں زمین تے کھولیں گا، اوہ پہلاں ای اسمان تے کھول دِتا گیا ہوئے گا۔“ 20 فیر اوہنے شاگرداں نُوں سختی نال منع کیتا کہ اوہ کسے نُوں نہ دَسن کہ اوہ مسیح اے۔
21 اوس وقت توں یسوع اپنے شاگرداں نُوں ایہہ دَسن لگ پیا کہ اوہنوں یروشلیم جانا پووے گا جِتھے بزرگ، وڈے کاہن تے شریعت دے عالم اوہدے تے بڑا ظلم کرن گے تے اوہنوں جانوں مار دین گے۔ پر تیجے دن اوہنوں زندہ کر دِتا جائے گا۔ 22 ایہہ سُن کے پطرس اوہنوں اِک پاسے لجا کے جھڑکن لگ پیا تے اوہنوں کہیا: ”مالک، اپنے اُتے تھوڑا تے ترس کھا۔ تیرے نال اِنج کدی نئیں ہوئے گا۔“ 23 پر یسوع نے پطرس توں مُونہہ موڑ کے کہیا: ”پراں ہٹ شیطان، تُوں میری راہ چ رکاوٹ بن رہیا ایں کیونکہ تُوں خدا وانگوں نئیں سگوں انساناں وانگوں سوچنا ایں۔“
24 فیر یسوع نے اپنے شاگرداں نُوں کہیا: ”جے کوئی میرا شاگرد* بننا چاہندا اے تے اوہ اپنے لئی جینا چھڈ دَوے تے اپنی سُولی چُک کے میرے پچھے پچھے چلدا رہوے 25 کیونکہ جیہڑا اپنی جان بچانا چاہندا اے، اوہ ایہنوں گنوا بیٹھے گا۔ پر جیہڑا میری خاطر اپنی جان گنواندا اے، اوہ ایہنوں بچا لوَے گا۔ 26 جے اِک انسان ساری دُنیا کھٹ لوَے پر اپنی زندگی گنوا بیٹھے تے اوہنوں کیہہ فائدہ؟ یاں اِک انسان زندگی* پان لئی کیہہ دے سکدا اے؟ 27 کیونکہ جدوں انسان دا بیٹا اپنے فرشتیاں سمیت اپنے باپ دی شانوشوکت نال آئے گا تے اوہ ہر اِک نُوں اوہدے کماں مطابق بدلہ دَوے گا۔ 28 مَیں توانوں سچ کہنا واں کہ ایتھے کجھ ایہو جہے لوک موجود نیں جیہڑے اوہدوں تک نئیں مرن* گے جدوں تک اوہ انسان دے بیٹے نُوں اوہدی بادشاہی چ آندیاں نئیں ویکھ لیندے۔“