رسولاں دے اعمال

19 جیس عرصے دوران اپلّوس کُرنتھس چ سی، اوہدوں پولُس آسیہ دے پہاڑی علاقیاں چوں لنگھ کے اِفسس آیا۔ اوتھے اوہنوں کجھ شاگرد ملے۔ 2 پولُس نے اوہناں نُوں پچھیا:‏ ”‏جدوں تُسی شاگرد بنے سو تے کیہہ توانوں پاک روح ملی سی؟“‏ اوہناں نے کہیا:‏ ”‏اَسی تے پاک روح بارے کدی سُنیا ای نئیں۔“‏ 3 فیر پولُس نے کہیا:‏ ”‏فیر تُسی کیہڑا بپتسمہ لیا سی؟“‏ اوہناں نے کہیا:‏ ”‏جیہڑا یوحنا دیندا سی۔“‏ 4 پولُس نے کہیا:‏ ”‏یوحنا کولوں بپتسمہ لے کے لوک ایہہ ظاہر کردے سن کہ اوہناں نے توبہ کر لئی اے۔ نالے یوحنا لوکاں نُوں ایہہ دَسدا سی کہ اوہ اوس بندے تے ایمان لیان جیہڑا اوہدے بعد آ رہیا اے یعنی یسوع تے۔“‏ 5 ایہہ سُن کے اوہناں شاگرداں نے مالک یسوع دے ناں تے بپتسمہ لیا۔ 6 فیر جدوں پولُس نے اوہناں تے ہتھ رکھے تے اوہناں نُوں پاک روح ملی۔ اوہ فرق فرق زباناں بولن لگ پئے تے خدا دا پیغام*‏ سُنان لگ پئے۔ 7 اوہ کُل ملا کے 12 آدمی سن۔‏

8 پولُس نے تِن مہینے تک یہودیاں دی عبادت‌گاہ چ جا کے دلیری نال گل کیتی۔ اوہ خدا دی بادشاہی بارے تلیم دیندا سی تے دلیلاں دے کے لوکاں نُوں قائل کرن دی کوشش کردا سی۔ 9 پر کجھ ڈھیٹھ لوک ایمان نئیں لیانا چاہندے سن تے اوہ لوکاں سامنے مالک دی راہ بارے بُرا بھلا کہہ رہے سن۔ ایس لئی پولُس نے اوہناں نُوں چھڈ دِتا تے شاگرداں نُوں لے کے چلا گیا۔ اوہ ہر روز تِرنّس دے سکول چ جا کے تقریراں دین لگ پیا۔ 10 اوہ دو سالاں تک اِنج کردا رہیا۔ ایس لئی صوبہ آسیہ دے سارے یہودیاں تے یونانیاں نُوں مالک دا کلام سُنن دا موقع ملیا۔‏

11 خدا پولُس دے ذریعے وڈے وڈے معجزے کردا رہیا۔ 12 ایتھوں تک کہ جدوں لوک پولُس دے کپڑے تے رومال بیماراں کول لجاندے سن تے اوہناں نُوں شفا مِل جاندی سی تے باغی فرشتے*‏ وی لوکاں چوں نکل جاندے سن۔ 13 پر کجھ یہودی وی جگہ جگہ جا کے لوکاں چوں باغی فرشتیاں نُوں کڈھدے سن۔ اوہ وی مالک یسوع داناں لے کے لوکاں چوں باغی فرشتیاں نُوں کڈھن دی کوشش کرن لگ پئے۔ اوہ کہندے سن:‏ ”‏مَیں تینوں یسوع دے ناں تے جدی مُنادی پولُس کردا اے، حکم دینا واں کہ ایس بندے چوں نکل جا۔“‏ 14 یہودیاں دے اِک وڈے کاہن سکیوا دے سَت پُتر لوکاں چوں باغی فرشتے کڈھدے ہوندے سن۔ 15 اِک وار جدوں اوہناں نے یسوع دا ناں لے کے اِنج کرن دی کوشش کیتی تے باغی فرشتے نے کہیا:‏ ”‏مَیں یسوع نُوں جاننا واں تے پولُس بارے وی مینوں پتہ اے، پر تُسی کون او؟“‏ 16 فیر اوہ بندہ جنہوں باغی فرشتہ چِمبڑیا ہویا سی، اوہناں تے ٹُٹ پیا تے اِک اِک کر کے اوہناں ساریاں تے حاوی ہو گیا۔ اوہنے اوہناں دا ایناں بُرا حال کیتا کہ اوہناں نُوں اوس گھر چوں ننگا تے زخمی حالت چ بھجنا پیا۔ 17 ایس گل بارے اِفسس چ رہن والے سارے یہودیاں تے یونانیاں نُوں پتہ لگ گیا۔ اوہ سارے ڈر گئے تے مالک یسوع دی وڈیائی ہوندی رہی۔ 18 ایمان لیان والے بوہت سارے لوک ساریاں دے سامنے آ کے اپنے گُناہواں دا اِقرار کردے سن۔ 19 بوہت سارے لوک جیہڑے پہلاں جادو ٹونا کردے سن، اوہناں نے اپنیاں کتاباں کٹھیاں کر کے ساریاں دے سامنے ساڑ دِتیاں۔ جدوں حساب لایا گیا تے پتہ چلیا کہ اوہناں کتاباں دی قیمت چاندی دے 50 ہزار سِکّیاں دے برابر سی۔ 20 ایس طرحاں یہوواہ دا کلام رُکاوٹاں دے باوجود زبردست طریقے نال پھیلدا گیا۔‏

21 ایہدے بعد پولُس نے ارادہ کیتا کہ اوہ مقدونیہ تے اخیہ چوں لنگھدا ہویا یروشلم جائے گا۔ اوہنے کہیا:‏ ”‏یروشلم جان توں بعد مَیں روم وی جانواں گا۔“‏ 22 ایس لئی اوہنے تیمُتھیُس تے اِراستُس نُوں جیہڑے اوہدی خدمت کردے سن، مقدونیہ گھل دِتا۔ پر اوہ آپ کجھ عرصے لئی صوبہ آسیہ چ رہیا۔‏

23 اوس ویلے اِفسس چ کجھ لوکاں نے مالک دی راہ تے چلن والیاں دے خلاف بڑا رولا پایا۔ 24 اوتھے دیمیترِیُس ناں دا اِک سنیارا سی جیہڑا چاندی نال ارتمس دیوی دے چھوٹے چھوٹے مندر بناندا سی۔ اوہدی وجہ توں مندر بنان والے دُوجے کاریگر وی بڑے پیسے کماندے سن۔ 25 دیمیترِیُس نے اوہناں نُوں تے ہور کاریگراں نُوں کٹھا کر کے کہیا:‏ ”‏بھراوو، تُسی جان دے او کہ ایس کاروبار دی وجہ توں ساڈی بڑی کمائی ہوندی اے۔ 26 پر تُسی آپ ویکھیا تے سُنیا اے کہ پولُس صرف اِفسس چ ای نئیں سگوں آسیہ دے پورے صوبے چ بتھیرے لوکاں نُوں اپنے مغر لا کے کسے ہور مذہب چ لے گیا اے۔ اوہ کہندا اے کہ ہتھاں نال بنیا کوئی وی دیوتا اصل چ خدا نئیں اے۔ 27 خطرہ صرف ایس گل دا نئیں کہ ساڈے کاروبار دی بدنامی ہوئے گی سگوں ساڈی عظیم دیوی ارتمس دے مندر دی وی کوئی قدر نئیں رہوے گی۔ ساڈی دیوی نُوں آسیہ دے پورے صوبے سگوں پوری دُنیا دے لوک پوجدے نیں، پر ایس بندے دی وجہ توں اوہدی شان مٹی چ مِل جائے گی۔“‏ 28 ایہہ سُن کے لوک غصے نال بھڑک اُٹھے تے اُچی اُچی ایہہ نعرے لان لگ پئے:‏ ”‏اِفسس دی ارتمس دیوی عظیم اے!‏“‏

29 ایس لئی پورے شہر چ ہلچل مچ گئی تے لوکاں دی اِک وڈی بِھیڑ پولُس دے ساتھیاں گِیُس تے ارِسترخس نُوں گھسیٹ کے تماشاگاہ*‏ چ لے گئی۔ اوہ دونویں مقدونی سن۔ 30 پولُس وی تماشاگاہ دے اندر جانا چاہندا سی۔ پر شاگرداں نے اوہنوں جان نہ دِتا۔ 31 کھیڈاں تے میلیاں دا اِنتظام کرن والے بندے وی پولُس دا بھلا چاہندے سن۔ ایس لئی اوہناں نے پیغام گھل کے مِنت کیتی کہ اوہ اندر جا کے اپنی جان خطرے چ نہ پائے۔ 32 سارے لوک رولا پا رہے سن۔ کوئی کجھ کہہ رہیا سی تے کوئی کجھ۔ اصل چ لوک اُلجھن چ سن۔ زیادہ تر نُوں تے پتہ ای نئیں سی کہ اوہ اوتھے جمع کیوں نیں۔ 33 ایس لئی یہودیاں نے بِھیڑ وچوں سکندر ناں دے اِک بندے نُوں دھکا دے کے اَگے کیتا۔ فیر سکندر نے اشارہ کر کے لوکاں نُوں چپ رہن لئی کہیا تاکہ اوہ اوہناں نال گل کر سکے۔‏*‏ 34 پر جدوں لوکاں نُوں پتہ چلیا کہ اوہ یہودی اے تے اوہ سارے تقریباً دو گھنٹے تک اُچی اُچی ایہہ نعرہ لاندے رہے:‏ ”‏اِفسس دی ارتمس دیوی عظیم اے!‏“‏

35 آخر شہر دے ناظم نے لوکاں نُوں چپ کرایا تے فیر اوہناں نُوں کہیا:‏ ”‏اِفسس دے لوکو، دُنیا چ کیہڑا انسان اے جیہڑا نئیں جان دا کہ شہر اِفسس عظیم دیوی ارتمس دے مندر تے اوہدی مورت دا رکھوالا اے جیہڑی اسمان توں نازل ہوئی سی؟ 36 کوئی وی ایس گل توں اِنکار نئیں کر سکدا۔ ایس لئی جذباتی نہ ہووو تے جلدبازی چ کجھ نہ کرو۔ 37 تُسی جیہڑے بندیاں نُوں ایتھے لیائے او، اوہناں نے نہ تے ساڈے مندراں نُوں لُٹیا اے تے نہ ای ساڈی دیوی دے خلاف کوئی گل کیتی اے۔ 38 ایس لئی جے دیمیترِیُس تے اوہدے نال دے کاریگراں دا کسے نال کوئی جھگڑا اے تے اوہ اوہدوں اِک دُوجے تے مقدمہ چلان جدوں عدالتاں لگدیاں نیں تے صوبے دے حاکم سُنوائی کردے نیں۔ 39 پر جے تُسی کسے ہور معاملے تے گل کرنی اے تے ایہدے تے اوہدوں غور کیتا جا سکدا اے جدوں عوام فیصلہ کرن لئی کٹھی ہوندی اے۔‏*‏ 40 یاد رکھو، اَج دے ایس ہنگامے دی وجہ توں ساڈے تے بغاوت کرن دا اِلزام لگ سکدا اے کیونکہ ایس بِھیڑ نے کٹھے ہو کے بِلاوجہ ای شہر چ اینی ہلچل مچا دِتی اے۔“‏ 41 ایہہ گلاں کہہ کے اوہنے سارے لوکاں نُوں اوتھوں گھل دِتا۔‏