تیمُتھیُس دے ناں پہلا خط
1 مَیں پولُس، ساڈے نجات دین والے خدا تے مسیح یسوع دے حکم نال رسول آں جیہڑا ساڈی امید اے۔ 2 تیمُتھیُس،* تُوں ساڈے مالک دی خدمت چ میرے لئی اِک وفادار پُتر* ثابت ہویا ایں۔
دُعا اے کہ ساڈا باپ خدا تے ساڈا مالک مسیح یسوع تیرے تے مہربانی کرن تے تینوں عظیم رحمت تے سلامتی بخشن۔
3 جیس طرحاں مقدونیہ جان توں پہلاں مَیں تینوں اِفسس چ رہن لئی کہیا سی اوسے طرحاں مَیں ہُن وی تینوں اوتھے رہن لئی کہہ رہیا واں تاکہ تُوں غلط تلیم دین والیاں نُوں حکم دَویں کہ اوہ باز آ جان 4 تے جھوٹھیاں کہانیاں تے نسبنامیاں تے دھیان نہ دین کیونکہ ایہو جہیاں گلاں دا کوئی فائدہ نئیں ہوندا سگوں ایہناں دی وجہ توں بےتُکے سوال کھڑے ہوندے نیں تے ایمان کمزور ہوندا اے کیونکہ ایہہ خدا وَلّوں نئیں نیں۔ 5 مَیں ایہہ ہدیت* ایس لئی دے رہیا واں تاکہ اَسی صافدل، صاف ضمیر تے سچے ایمان دی بنیاد تے اِک دُوجے نال سچی محبت کریئے۔ 6 کجھ لوکاں نے ایہناں ہدیتاں تے چلنا چھڈ دِتا اے تے فضول گلاں کرن لگ پئے نیں۔ 7 اوہ خدا دے قانون دے اُستاد تے بننا چاہندے نیں، پر آپ ای اوہناں گلاں نُوں نئیں سمجھدے جیہڑیاں اوہ کردے نیں تے جنہاں تے اَڑے رہندے نیں۔
8 اَسی جاننے آں کہ شریعت چنگی اے۔ پر ضروری اے کہ ایہنوں خدا دی مرضی مطابق لاگو کیتا جائے۔ 9 یاد رکھ کہ شریعت نیک لوکاں لئی نئیں سگوں اوہناں لوکاں لئی دِتی گئی سی جیہڑے بھیڑے، باغی، نافرمان، گُناہگار، بےوفا، پاک چیزاں دی ناقدری کرن والے، ماں پیو دے قاتل تے دُوجے لوکاں دے خونی نیں۔ 10 نالے شریعت جنسیبدکاری کرن والیاں، مرداں نال جنسی تعلق رکھن والے مرداں، اغوا کرن والیاں، جھوٹھ بولن والیاں، جھوٹھی گواہی دین والیاں* تے سچی* تلیم دے خلاف کم کرن والیاں لئی وی دِتی گئی سی۔ 11 ایہہ سچی تلیم ساڈے خوشدل خدا دی اوس شاندار خوشخبری دے مطابق اے جنہوں سُنان دی ذمےداری مینوں دِتی گئی اے۔
12 مَیں اپنے مالک مسیح یسوع دا بڑا شکرگزار آں جنہے مینوں طاقت بخشی کیونکہ اوہنے میرے تے بھروسا کر کے مینوں اِک خاص خدمت کرن دی ذمےداری دِتی۔ 13 بھانویں کہ مَیں پہلے کُفر بکنا ساں، خدا دے بندیاں تے ظلم کرنا ساں تے گھمنڈی ساں پر فیر وی میرے تے رحم کیتا گیا کیونکہ مَیں ایہہ سب کجھ انجانے چ تے ایمان نہ رکھن دی وجہ توں کیتا۔ 14 پر ساڈے مالک نے میرے اُتے دل کھول کے عظیم رحمت کیتی تے مسیح یسوع کولوں مینوں ایمان تے محبت ملی۔ 15 ایہہ گل سچی تے بھروسے دے لائق اے کہ مسیح یسوع گُناہگاراں نُوں نجات دَوان لئی دُنیا چ آیا جنہاں چوں سب توں وڈا گُناہگار مَیں آں۔ 16 پر فیر وی میرے ورگے وڈے گُناہگار اُتے رحم کیتا گیا تاکہ میرے ذریعے مسیح یسوع ظاہر کرے کہ اوہ کِنّاں صبر والا اے۔ نالے مَیں اوہناں لوکاں لئی مثال بناں جیہڑے ہمیشاں دی زندگی پان لئی اوہدے تے ایمان رکھن گے۔
17 واحد خدا جنہوں ویکھیا نئیں جا سکدا تے جیہڑا ہمیشاں توں بادشاہ اے تے ہمیشاں زندہ رہوے گا، اوہدی عزت تے وڈیائی ہمیشاں تک ہوندی رہوے۔ آمین۔
18 بیٹا تیمُتھیُس، مَیں تینوں ایہہ ہدیت* اوہناں پیشینگوئیاں دے مطابق دے رہیا واں جیہڑیاں تیرے بارے کیتیاں گئیاں سن۔ تُوں ایہناں توں حوصلہ پا کے نیکی دی جنگ لڑدا رہ، 19 ایمان تے قائم رہ تے صاف ضمیر رکھ۔ کجھ لوکاں نے ایہناں گلاں نُوں ردّ کر دِتا جدی وجہ توں اوہناں دے ایمان دا بیڑا غرق* ہو گیا۔ 20 ہِمنیُس تے سکندر ایہو جہے لوکاں وچوں ای نیں۔ مَیں اوہناں نُوں شیطان دے حوالے کر دِتا* اے تاکہ اوہناں نُوں ایہہ سبق ملے کہ اوہناں نُوں کُفر نئیں بکنا چاہی دا۔