رومیوں دے ناں خط
3 فیر کیہہ یہودی ہون یاں ختنہ کران دا کوئی فائدہ ہے وے؟ 2 ہاں، بڑے فائدے نیں۔ پہلا فائدہ تے ایہہ وے کہ خدا نے اپنا پاک کلام یہودیاں نُوں دِتا۔* 3 پر جے کجھ یہودیاں نے ایمان ظاہر نئیں کیتا تے کیہہ ایہدا مطلب ایہہ وے کہ خدا دِیاں گلاں تے بھروسا نئیں کیتا جا سکدا؟ 4 بالکل نئیں! سارے انسان جھوٹھے ہو سکدے نیں پر خدا ہمیشاں سچ بولدا اے کیونکہ پاک کلام چ لکھیا اے: ”تیریاں گلاں سچیاں ثابت ہون گیاں تے جدوں تیرے تے مُقدمہ ہوئے گا تے تُوں جِتیں گا۔“ 5 پر کجھ لوک سوچدے نیں کہ اوہناں دے غلط کماں توں ثابت ہوندا اے کہ خدا کِنّاں نیک اے۔ پر کیہہ ایہدا مطلب ایہہ وے کہ خدا اپنا قہر نازل کر کے نااِنصافی کردا اے؟ 6 بالکل نئیں! اوہنے تے پوری دُنیا دی عدالت کرنی اے تے فیر اوہ نااِنصافی کیویں کر سکدا اے؟
7 کجھ ہور لوک کہندے نیں: ”جے میرے جھوٹھ بولن توں خدا سچا ثابت ہوندا اے تے اوہدی وڈیائی ہوندی اے تے فیر مینوں گُناہگار کیوں ٹھہرایا جاندا اے؟“ 8 فیر کیہہ اَسی وی ایہہ گل کہیے: ”آؤ اَسی بھیڑے کم کریئے تاکہ چنگے نتیجے نِکلن“؟ اصل چ کجھ لوک ساڈے تے جھوٹھا اِلزام لاندے نیں کہ اَسی اِنج سوچنے آں۔ پر جدوں اوہناں لوکاں دی عدالت ہوئے گی تے اوہناں نُوں سزا دِتی جائے گی۔
9 فیر کیہہ اَسی جیہڑے یہودی آں، دُوجیاں نالوں بہتر آں؟ بالکل نئیں کیونکہ اَسی پہلاں ای کہہ چُکے آں کہ یہودی تے یونانی سارے ای گُناہگار نیں 10 جیویں کہ پاک کلام چ لکھیا اے: ”کوئی وی انسان نیک نئیں، ہاں، اِک وی نئیں۔ 11 کسے کول وی گہری سمجھ نئیں اے۔ کوئی وی خدا دی تلاش نئیں کردا۔ 12 سارے انساناں نے اوہدے توں مُونہہ موڑ لیا اے تے سارے کسے کم دے نئیں رہے۔ کوئی وی انسان مہربان نئیں رہیا، ہاں، اِک وی نئیں۔“ 13 ”اوہناں دِیاں گلاں لوکاں نُوں قبر چ گھل دیندیاں نیں۔* اوہ اپنی زبان نال دھوکھا دیندے نیں۔“ ”اوہناں دے بُلھاں چوں سَپاں دا زہر نکلدا اے۔“ 14 ”اوہناں دے مُونہہ چوں لعنت تے کوڑیاں گلاں نکلدیاں نیں۔“ 15 ”اوہناں دے پیر خون کرن لئی تیزی نال بھج دے نیں۔“ 16 ”اوہ لوکاں نُوں ہمیشاں برباد کردے نیں تے اوہناں نُوں تکلیف پونچاندے نیں 17 تے اوہناں نُوں صلح دی راہ تے چلنا نئیں آندا۔“ 18 ”اوہناں دے دل چ خدا لئی کوئی عزت نئیں۔“*
19 اَسی جاننے آں کہ شریعت چ لکھیاں گلاں اوہناں لئی نیں جنہاں نُوں شریعت دِتی گئی سی تاکہ کوئی وی گُناہ توں پاک ہون دا دعویٰ نہ کر سکے۔ شریعت توں ظاہر ہوندا اے کہ ساری دُنیا گُناہگار اے تے خدا دی نظر چ سزا دے لائق اے۔ 20 ایس لئی کوئی وی انسان شریعت تے عمل کر کے خدا دی نظر چ نیک نئیں ٹھہر سکدا سگوں شریعت دے ذریعے ظاہر ہوندا اے کہ انسان کِنّاں گُناہگار اے۔*
21 پر ہُن خدا نے ایہہ گل ظاہر کر دِتی اے کہ اوہدیاں نظراں چ نیک ٹھہرن لئی شریعت تے عمل کرنا ضروری نئیں اے۔ ایہہ گل پہلاں ای شریعت تے نبیاں دِیاں کتاباں چ دَسی گئی سی۔ 22 ہاں، خدا نے ظاہر کیتا اے کہ اوہدی نظر چ اوہ سارے لوک نیک ٹھہر سکدے نیں جیہڑے یسوع مسیح تے ایمان لیاندے نیں کیونکہ اوہدے لئی سارے لوک برابر نیں۔ 23 سارے انسان گُناہگار نیں تے خدا دی شان* ظاہر کرن چ ناکام رہے نیں۔ 24 پر خدا نے اپنی عظیم رحمت دی وجہ توں انساناں نُوں اِک نعمت دِتی۔ اوہنے مسیح یسوع دے فدیے دا بندوبست کیتا تاکہ انساناں نُوں گُناہواں توں چھٹکارا ملے تے اوہ خدا دی نظر چ نیک ٹھہرن۔ 25 خدا نے یسوع دی قربانی ایس لئی دِتی تاکہ انسان اوہدے خون تے ایمان لیا کے خدا نال صلح کر سکن۔ ایہدے توں ظاہر ہویا کہ خدا اوہدوں وی اپنے نیک اصولاں تے قائم سی جدوں اوہنے ماضی چ لوکاں لئی صبر وکھایا تے اوہناں دے گُناہ معاف کیتے۔ 26 اَج وی اوہ یسوع تے ایمان رکھن والے انسان نُوں نیک ٹھہرا کے ظاہر کردا اے کہ اوہ اپنے نیک اصولاں تے قائم اے۔
27 فیر ساڈے کول شیخی مارن دی کیہڑی وجہ اے؟ کوئی وجہ نئیں۔ کیہہ سانوں ایس گل تے شیخی مارنی چاہی دی اے کہ اَسی موسیٰ دی شریعت تے عمل کرنے آں؟ نئیں سگوں صرف ایس گل تے کہ اَسی اوس شریعت تے عمل کرنے آں جیہڑی ایمان نُوں اہمیت دیندی اے۔ 28 اَسی مننے آں کہ اِک انسان نُوں موسیٰ دی شریعت تے عمل کرن دی وجہ توں نئیں سگوں ایمان دی وجہ توں نیک ٹھہرایا جاندا اے۔ 29 کیہہ خدا صرف یہودیاں دا ای خدا اے یاں غیریہودیاں دا وی؟ ہاں، اوہ غیریہودیاں دا وی خدا اے۔ 30 اِک ای خدا اے تے اوہی انساناں نُوں اوہناں دے ایمان دی وجہ توں نیک ٹھہرائے گا فیر بھانویں اوہناں دا ختنہ ہویا اے یاں نئیں۔ 31 فیر کیہہ اَسی ایمان رکھن نال شریعت نُوں ردّ کرنے آں؟ بالکل نئیں سگوں اَسی مننے آں کہ شریعت فائدےمند اے۔