یوحنا نُوں مِلن والا مُکاشفہ
16 فیر مَیں سُنیا کہ ہیکل چوں کسے نے سَت فرشتیاں نُوں اُچی آواز چ کہیا: ”جاؤ، خدا دے غصے دے سَت کٹورے زمین تے ڈولھ دَوو۔“
2 پہلے فرشتے نے جا کے اپنا کٹورا زمین تے ڈولھیا۔ ایہدی وجہ توں اوہناں لوکاں دے جسم تے تکلیف دین والے تے جانلیوا پھوڑے نکل آئے جنہاں تے وحشی درندے دا نشان لگیا ہویا سی تے جیہڑے اوہدے بُت دی پوجا کردے سن۔
3 دُوجے فرشتے نے اپنا کٹورا سمندر وچ ڈولھیا جدی وجہ توں سمندر دا پانی اِک مُردہ انسان دے خون ورگا بن گیا* تے سمندر چ رہن والے سارے جاندار مر گئے۔
4 تیجے فرشتے نے اپنا کٹورا دریاواں تے چشمیاں تے ڈولھیا تے اوہ خون بن گئے۔ 5 جیس فرشتے کول پانی اُتے اِختیار سی، اوہنوں مَیں ایہہ کہندے سُنیا: ”اَے ساڈے خدا، تُوں ہمیشاں ہمیشاں توں ایں۔ تُوں وفادار تے نیک ایں تے تُوں اوہناں لوکاں دی عدالت اِنصاف نال کیتی اے 6 جنہاں نے تیرے مُقدس لوکاں تے نبیاں دا خون کیتا۔ ایس لئی تُوں اوہناں نُوں خون پیایا۔ اوہ ایسے سزا دے لائق نیں!“ 7 فیر مَیں قربانگاہ دے کولوں کسے نُوں ایہہ کہندے سُنیا: ”اَے بےحد طاقت والے یہوواہ خدا، تُوں سچائی تے اِنصاف نال عدالت کرنا ایں۔“
8 چوتھے فرشتے نے اپنا کٹورا سورج تے ڈولھیا تے سورج نُوں اپنی تیز دُھپ* نال لوکاں نُوں ساڑن دی اجازت دِتی گئی۔ 9 اوس تیز دُھپ نال لوک سڑ گئے۔ پر فیر وی اوہناں نے نہ تے توبہ کیتی تے نہ ای خدا دی وڈیائی کیتی سگوں اوہناں نے خدا دے ناں دے خلاف کُفر بکیا جدے کول ایہہ آفتاں لیان دی طاقت اے۔
10 پنجویں فرشتے نے اپنا کٹورا وحشی درندے دے تخت تے ڈولھیا جدی وجہ توں اوہدی بادشاہی تے نھیرا چھا گیا تے لوک تکلیف دے مارے دَنداں نال اپنیاں زباناں وڈھن لگ پئے۔ 11 پر اوہناں نے اپنے کماں توں توبہ نئیں کیتی سگوں اوہ اپنی تکلیف تے پھوڑیاں دی وجہ توں اسمان دے خدا دے خلاف کُفر بکن لگ پئے۔
12 چھیویں فرشتے نے اپنا کٹورا وڈے دریا فرات چ ڈولھیا تے اوہدا پانی سُک گیا تاکہ مشرق دے بادشاہواں لئی راہ تیار ہو جائے۔
13 فیر مَیں ویکھیا کہ اژدہے، وحشی درندے تے جھوٹھے نبی دے مُونہہ چوں تِن ناپاک پیغام* نکل رہے نیں جیہڑے ویکھن چ ڈڈوؤاں ورگے سن۔ 14 اصل چ ایہہ پیغام باغی فرشتیاں وَلّوں نیں تے وڈیاں وڈیاں نشانیاں وکھاندے نیں۔ نالے پوری زمین دے بادشاہواں تک پونچ جاندے نیں تاکہ اوہناں نُوں بےحد طاقت رکھن والے خدا دے عظیم دن دی جنگ لئی جمع کرن۔
15 فیر مَیں کسے نُوں کہندے سُنیا: ”ویکھو! مَیں چور وانگوں آ رہیا واں۔ خوش اے اوہ بندہ جیہڑا جاگدا رہندا اے تے اپنے کپڑے پائی رکھدا اے تاکہ لوک اوہنوں ننگا پھردا نہ ویکھن تے اوہنوں شرمندگی نہ سہنی پووے۔“
16 زمین دے بادشاہواں نُوں اوس جگہ جمع کیتا گیا جنہوں عبرانی چ ہرمجِدّون* کہندے نیں۔
17 ستویں فرشتے نے اپنا کٹورا ہوا تے ڈولھیا۔ فیر ہیکل چ تخت توں کسے نے اُچی آواز چ کہیا: ”ہُن سب پورا ہو گیا اے!“* 18 فیر بجلی چمکی، آوازاں تے گرجاں سُنائی دِتیاں تے اِک بوہت وڈا زلزلہ آیا۔ جدوں توں انسان زمین تے نیں، اوہدوں توں ایناں وڈا تے زوردار زلزلہ کدی نئیں آیا۔ 19 وڈے شہر *دے تِن حصے ہو گئے تے قوماں دے شہر تباہ ہو گئے۔ خدا نے وڈے بابل نُوں یاد کیتا تاکہ اوہنوں اپنے قہر دے پیالے چوں غصے دی مے پیائے۔ 20 نالے سارے جزیرے ڈُب گئے تے پہاڑ غائب ہو گئے۔ 21 فیر لوکاں اُتے اسمان توں تقریباً 20، 20 کلو دے اولے ڈِگے تے بڑی تباہی مچی جدی وجہ توں لوکاں نے خدا دے خلاف کُفر بکیا۔