تھسلُنیکیوں دے ناں پہلا خط

1 مَیں پولُس، سِلوانُس*‏ تے تیمُتھیُس نال مِل کے ایہہ خط تھسلُنیکے دی کلیسیا نُوں لکھ رہیا واں جیہڑی ساڈے باپ خدا تے مالک یسوع مسیح نال اِک مُٹھ اے۔‏

دُعا اے کہ خدا توانوں عظیم رحمت تے سلامتی بخشے۔‏

2 اَسی اپنیاں دُعاواں چ تواڈے ساریاں دا ذکر کردے ویلے ہمیشاں خدا دا شکر کرنے آں 3 کیونکہ اَسی اپنے خدا تے باپ دے حضور ہمیشاں یاد رکھنے آں کہ تُسی ایمان دی وجہ توں کِنّاں کم کیتا اے تے محبت دی وجہ توں کِنّی محنت کیتی اے۔ نالے تُسی ساڈے مالک یسوع مسیح تے امید رکھن دی وجہ توں مشکلاں نُوں کِنّے صبر نال برداشت کیتا اے۔ 4 بھراوو، اَسی جاننے آں کہ خدا توانوں پیار کردا اے تے اوہنے توانوں چُنیا اے 5 کیونکہ جدوں اَسی تواڈے چ خوش‌خبری دی مُنادی کیتی تے اَسی صرف گلاں ای نئیں کیتیاں سگوں اَسی طاقت، پاک روح تے پورے یقین نال توانوں پیغام سُنایا۔ تُسی ایہہ وی جان دے او کہ اَسی تواڈے لئی کیہہ کجھ کیتا اے۔ 6 تُسی ساڈی تے ساڈے مالک دی مثال تے عمل کیتا کیونکہ تُسی سخت ظلم سہن دے باوجود خدا دے کلام نُوں اوس خوشی نال قبول کیتا جیہڑی پاک روح دے ذریعے مِلدی اے 7 تے اِنج تُسی مقدونیہ تے اخیہ چ اپنے سارے ہم‌ایماناں لئی چنگی مثال قائم کیتی۔‏

8 اصل چ تُسی یہوواہ دا کلام نہ صرف مقدونیہ تے اخیہ چ پھیلایا سگوں خدا اُتے تواڈے ایمان دا چرچا ہر جگہ ہو رہیا اے۔ ایس لئی سانوں ہور کجھ کہن دی لوڑ نئیں 9 کیونکہ لوک آپ دَس رہے نیں کہ اَسی جدوں پہلی وار تواڈے کول آئے تے تُسی کیویں اپنے بُتاں نُوں چھڈ کے زندہ تے سچے خدا دے غلام بن گئے 10 تے تُسی اوہدے پُتر یسوع دا اِنتظار کر رہے او جیہڑا اسمانوں آئے گا تے جنہوں خدا نے مُردیاں چوں زندہ کیتا۔ یسوع ای سانوں خدا دے آن والے قہر توں بچائے گا۔‏