عبرانیوں دے ناں خط

6 ایس لئی آؤ، پُختہ بنن دی پوری کوشش کریئے کیونکہ اَسی مسیح بارے بنیادی گلاں سکھ لئیاں نیں۔ سانوں وار وار بنیادی گلاں ای نئیں سکھنیاں چاہی دِیاں*‏ جیویں کہ بھیڑے کماں توں توبہ کرنا، خدا تے ایمان لیانا، 2 بپتسمے دینا، دُوجیاں دے سِر تے ہتھ رکھنا، مُردیاں دا زندہ ہونا تے آخری عدالت بارے تلیم دینا۔ 3 پر خدا دی مدد نال اَسی پُختہ ضرور بن سکنے آں۔‏

4 کجھ لوکاں نُوں پاک کلام دی صحی سمجھ دِتی گئی، اسمان توں نعمت*‏ ملی تے پاک روح نال مسح کیتا گیا۔ 5 نالے اوہناں نے خدا دے شان‌دار کلام تے مستقبل چ مِلن والیاں برکتاں دا مزہ وی چکھیا۔‏*‏ 6 پر اوہ اپنے ایمان تے قائم نئیں رہے۔ اوہناں لوکاں نُوں توبہ وَل لیانا ناممکن اے کیونکہ اوہ خدا دے پُتر نُوں اپنے لئی فیر توں سُولی تے چڑھاندے نیں تے ساریاں دے سامنے بے‌عزت کردے نیں۔ 7 ایہہ لوک اوس زمین وانگوں نیں جدے تے خدا دی برکت دی وجہ توں وار وار بارش پیندی اے۔ فیر زمین اوس پانی نُوں پی کے کسان لئی سبزیاں اُگاندی اے۔ 8 پر جے زمین کنڈیاں والیاں جھاڑیاں اُگاندی اے تے اوس بے‌کار زمین تے چھیتی لعنت کیتی جائے گی تے آخر چ اوہنوں ساڑ دِتا جائے گا۔‏

9 بھانویں کہ مَیں تواڈے نال ایہہ گلاں کر رہیا واں پر میرے پیارے بھراوو، مینوں پورا یقین اے کہ تُسی اوہناں لوکاں نالوں بہتر او جیہڑے ایمان تے قائم نئیں رہے سگوں تُسی نجات پان لئی محنت کر رہے او۔ 10 خدا بے‌اِنصاف نئیں اے۔ اوہ اوس محنت تے محبت نُوں نئیں بُھلے گا جیہڑی تُسی مُقدس لوکاں دی خدمت کر کے اوہدے ناں لئی ظاہر کیتی اے تے ہُن وی کر رہے او۔ 11 پر اَسی چاہنے آں کہ تُسی سارے ایسے طرحاں محنت کردے رہوو تاکہ تواڈی امید آخر تک پکی رہوے۔ 12 تُسی سُست نہ ہو جاؤ سگوں اوہناں لوکاں دی مثال تے عمل کرو جیہڑے اپنے ایمان تے صبر دی وجہ توں وعدیاں دے وارث نیں۔‏

13 جدوں خدا نے ابراہام نال وعدہ کیتا تے اوہنے اپنی ای قسم کھادی کیونکہ اوہدے توں وڈا کوئی نئیں جدی اوہ قسم کھاندا 14 تے کہیا:‏ ”‏مَیں تینوں ضرور برکت دَواں گا تے تیری نسل نُوں بوہت ودھاواں گا۔“‏ 15 ابراہام نال ایہہ وعدہ ایس لئی کیتا گیا کیونکہ اوہنے صبر وکھایا۔ 16 انسان جدوں قسم کھاندے نیں تے اوہ اپنے توں کسے وڈے دی قسم کھاندے نیں۔ اِنج بعد چ جھگڑے نئیں ہوندے کیونکہ اوہناں دی قسم اِک قانونی ضمانت ہوندی اے۔ 17 ایسے طرحاں خدا نے فیصلہ کیتا کہ اوہ وعدے دے وارثاں نُوں ایس گل دا پکا یقین دَوائے گا کہ اوہدا ارادہ*‏ نئیں بدلے گا۔ ایس لئی اوہنے وعدہ کرن دے نال نال قسم کھا کے ضمانت دِتی۔ 18 خدا دا وعدہ تے قسم پتھر تے لکیر نیں تے ایہناں دو گلاں دی وجہ توں ساڈا حوصلہ ودھدا اے کہ اَسی اوس امید تے مضبوطی نال قائم رہیے جیہڑی ساڈے سامنے وے کیونکہ خدا جدی پناہ چ اَسی آ گئے*‏ آں، جھوٹھ نئیں بول سکدا۔ 19 ساڈی امید اِک لنگر وانگوں اے*‏ جیہڑی سانوں ڈانوانڈول نئیں ہون دیندی۔ ایہہ امید پکی تے بھروسے دے لائق اے تے سانوں پردے دے دُوجے پاسے*‏ لے جاندی اے 20 جِتھے ساڈے توں پہلاں یسوع ساڈی خاطر گیا۔ اوہ مَلکی‌صدق وانگوں اعلیٰ کاہن بن گیا اے تے ہمیشاں کاہن رہوے گا۔‏