کُرنتھیوں دے ناں پہلا خط
16 مُقدس لوکاں لئی عطیات جمع کرن بارے جیہڑیاں ہدیتاں مَیں گلتیہ دی کلیسیاواں نُوں دِتیاں سن، تُسی وی اوہناں تے عمل کرو۔ 2 ہر ہفتے دے پہلے دن تواڈے چوں ہر اِک اپنی اپنی کمائی مطابق تھوڑے جہے پیسے الگ کر لوے تاکہ جدوں مَیں تواڈے کول آواں تے اوس ویلے عطیات جمع کرن دی ضرورت نہ پووے۔ 3 تُسی مینوں اِک خط چ کجھ بھروسےمند بھراواں دے ناں لکھ کے گھلو۔ فیر جدوں مَیں آواں گا تے مَیں تواڈے دل کھول کے دِتے گئے عطیات اوہناں بھراواں دے ہتھ یروشلم گھلاں گا۔ 4 جے ضرورت پئی تے مَیں وی اوہناں نال یروشلم چلا جاواں گا۔
5 پر تواڈے کول آن توں پہلاں مَیں مقدونیہ جاواں گا کیونکہ مَیں اودھروں لنگھ کے ای آنا اے۔ 6 شاید مَیں تواڈے کول کجھ عرصے لئی رہواں تے شاید سردیاں وی تواڈے نال ای گزاراں۔ فیر جدوں مَیں جاواں گا تے مینوں چھڈن لئی تُسی تھوڑی دُور تک میرے نال آ جانا۔ 7 مَیں نئیں چاہندا کہ مَیں توانوں بس تھوڑی دیر لئی ملاں سگوں جے یہوواہ نے چاہیا تے مَیں تواڈے نال زیادہ وقت وی گزاراں گا۔ 8 پر پنتِکُست دی عید تک مَیں اِفسس چ ای رہواں گا 9 کیونکہ ایتھے مینوں خدا دی زیادہ خدمت کرن دا موقع ملیا اے۔* پر بوہت سارے لوک میرے کم دے خلاف وی نیں۔
10 جے تیمُتھیُس تواڈے کول آئے تے تُسی اوہدا ساتھ دینا تاکہ اوہنوں کسے طرحاں دی پریشانی نہ ہوئے کیونکہ میرے وانگوں اوہ وی یہوواہ دی خدمت کر رہیا اے۔ 11 مَیں نئیں چاہندا کہ کوئی وی اوہدی بےقدری کرے۔ جدوں اوہ میرے کول آن لئی نکلے تے تُسی اوہنوں خیریت نال گھل دینا کیونکہ مَیں دُوجے بھراواں دے نال اوہدا اِنتظار کر رہیا واں۔
12 مَیں ساڈے بھرا اپلّوس دا بوہت حوصلہ ودھایا کہ اوہ دُوجے بھراواں نال تواڈے کول آئے۔ اوہنے تواڈے کول آن دا حالے کوئی ارادہ نئیں کیتا۔ پر موقع مِلن تے اوہ ضرور آئے گا۔
13 چوکس رہوو، ایمان تے قائم رہوو، دلیر تے مضبوط بنو۔ 14 تُسی ہر کم محبت نال کرو۔
15 بھراوو، تُسی جان دے او کہ ستفناس تے اوہدے گھر والے اخیہ چ سب توں پہلاں شاگرد بنے* تے اوہناں نے پوری لگن نال مُقدس لوکاں دی خدمت کیتی۔ ایس لئی مَیں توانوں تاکید کرنا واں کہ 16 ایہو جہے بھراواں دے تابع رہوو تے اوہناں لوکاں دے وی جیہڑے ایہناں بھراواں نال مِل کے سخت محنت تے خدمت کردے نیں۔ 17 مَیں خوش آں کہ ستفناس، فرتوناتُس تے اخیکُس میرے کول نیں کیونکہ اوہناں نے ایتھے آ کے تواڈی کمی نُوں پورا کر دِتا اے۔ 18 اوہناں نے میرا تے تواڈا بڑا حوصلہ ودھایا اے۔* ایس لئی ایہو جہے بھراواں دی قدر کرو۔
19 آسیہ دِیاں کلیسیاواں وَلّوں توانوں سلام۔ اکوِلہ تے پرِسکہ* تے اوہناں دے گھر جمع ہون والی کلیسیا وَلّوں وی توانوں مسیحی پیار تے سلام۔ 20 سارے بھراواں وَلّوں توانوں سلام۔ اِک دُوجے نُوں گلے مِل کے* سلام کرو۔
21 مَیں پولُس، اپنے ہتھیں توانوں سلام لکھ رہیا واں۔
22 جیہڑا انسان ساڈے مالک نال پیار نئیں کردا، اوہدے تے لعنت ہوئے۔ اَے ساڈے مالک یسوع، جلدی آ۔ 23 مالک یسوع دی عظیم رحمت تواڈے ساریاں تے ہووے۔ 24 توانوں ساریاں نُوں جیہڑے مسیح یسوع نال اِک مُٹھ او، میرے وَلّوں پیار۔