رسولاں دے اعمال
17 فیر پولُس تے سیلاس شہر امفِپُلِس تے شہر اپلونیہ چوں لنگھ کے شہر تھسلُنیکے پونچے جِتھے یہودیاں دی اِک عبادتگاہ وی سی۔ 2 ایس لئی پولُس ہمیشاں وانگوں عبادتگاہ چ گیا تے اوہنے تِن ہفتیاں تک ہر سبت دے دن یہودیاں نُوں تلیم دِتی۔ اوہنے اوہناں نال گل بات کردے ویلے پاک کلام چوں دلیلاں دِتیاں 3 تے حوالے دے دے کے سمجھایا تے ثابت کیتا کہ مسیح لئی دُکھ سہنا تے فیر مُردیاں چوں زندہ ہونا ضروری سی۔ اوہنے ایہہ وی کہیا: ”یسوع ای مسیح اے جدے بارے مَیں توانوں دَس رہیا واں۔“ 4 ایس لئی کجھ یہودی ایمان لے آئے تے پولُس تے سیلاس نال رَل گئے۔ ایہدے علاوہ خدا دی عبادت کرن والے بوہت سارے یونانی لوک تے کئی جانیاںمانیاں عورتاں وی ایمان لے آئیاں۔
5 پر یہودی ایہہ ویکھ کے حسد کرن لگ پئے۔ اوہناں نے بازار چ آوارہ پھرن والے کجھ بھیڑے بندیاں نُوں کٹھا کر کے بِھیڑ بنا لئی تے شہر چ ہلچل مچا دِتی۔ اوہناں نے یاسون دے گھر تے حملہ کیتا کیونکہ اوہ پولُس تے سیلاس نُوں لبھ کے بِھیڑ دے حوالے کرنا چاہندے سن۔ 6 پر جدوں اوہ نہ لبھے تے اوہ یاسون تے کجھ ہور بھراواں نُوں گھسیٹ کے شہر دے حاکماں کول لے گئے۔ فیر اوہناں نے اُچی اُچی کہیا: ”جنہاں* بندیاں نے ساری دُنیا چ ہلچل مچائی ہوئی اے، اوہ ایتھے وی آ گئے نیں۔ 7 ایس یاسون نے اوہناں نُوں اپنے گھر ٹھہرایا اے۔ ایہہ سارے آدمی روم دے بادشاہ* دے حکماں نُوں توڑدے نیں تے یسوع ناں دے کسے بندے نُوں بادشاہ من دے نیں۔“ 8 ایہہ سُن کے ساری بِھیڑ تے شہر دے حاکم بڑے غصے چ آ گئے۔ 9 اوہناں نے یاسون تے دُوجے بھراواں کولوں ضمانت دے طور تے بوہت سارے پیسے لئے تے اوہناں نُوں چھڈ دِتا۔
10 بھراواں نے راتوںرات ای پولُس تے سیلاس نُوں شہر بیریہ گھل دِتا۔ اوتھے پونچ کے اوہ یہودیاں دی عبادتگاہ چ گئے۔ 11 تھسلُنیکے دے یہودیاں نالوں بیریہ دے یہودیاں نُوں سکھن دا بوہتا شوق سی۔ ایس لئی اوہناں نے خدا دے کلام نُوں دِلوں قبول کیتا۔ اوہ ہر روز پاک کلام نُوں بڑے غور نال پڑھدے سن تاکہ ویکھ سکن کہ جیہڑیاں گلاں اوہناں نے سُنیاں نیں، اوہ پاک کلام دے مطابق ہے نیں یاں نئیں۔ 12 ایس لئی اوتھوں دے بوہت سارے لوک ایمان لے آئے جنہاں چ کئی جانیاںمانیاں یونانی عورتاں تے کجھ آدمی وی شامل سن۔ 13 پر جدوں تھسلُنیکے دے یہودیاں نُوں پتہ چلیا کہ پولُس بیریہ چ وی خدا دا کلام سُنا رہیا اے تے اوہ لوکاں نُوں بھڑکان تے ہنگامہ مچان لئی اوتھے وی پونچ گئے۔ 14 ایس لئی بھراواں نے فوراً ای پولُس نُوں سمندر وَل گھل دِتا۔* پر سیلاس تے تیمُتھیُس اوتھے ای رہے۔ 15 کجھ بھرا پولُس نُوں شہر ایتھنز تک چھڈن لئی اوہدے نال گئے۔ جدوں اوہ واپس جان لگے تے پولُس نے اوہناں نُوں کہیا کہ اوہ سیلاس تے تیمُتھیُس نُوں جِنّی چھیتی ہو سکے اوہدے کول گھلن۔
16 جدوں پولُس ایتھنز چ اوہناں دا اِنتظار کر رہیا سی تے اوہنے ویکھیا کہ پورا شہر بُتاں نال بھریا ہویا اے تے اوہنوں بڑا غصہ آیا۔ 17 ایس لئی اوہ لوکاں نُوں دلیلاں دے کے تلیم دین لگ پیا۔ اوہ عبادتگاہ چ یہودیاں نال، خدا دی عبادت کرن والے دُوجے لوکاں نال تے بازار چ جا کے ہر روز لوکاں نال گل بات کردا ہوندا سی۔ 18 پر کجھ اِپِکوری* تے ستوئیکی* عالم اوہدے نال بحث کرن لگ پئے تے کجھ ایہہ کہن لگ پئے: ”ایہہ بکواسی کیہہ کہنا چاہندا اے؟“ تے کجھ ہور کہن لگ پئے: ”لگدا اے کہ ایہہ بندہ دُوجے دیوتاواں بارے دَسن آیا اے۔“ اوہ اِنج ایس لئی کہہ رہے سن کیونکہ پولُس یسوع بارے تے مُردیاں دے جی اُٹھن بارے خوشخبری سُنا رہیا سی۔ 19 ایس لئی اوہ پولُس نُوں پھڑ کے اریوپگس* ناں دی پہاڑی تے لے گئے تے اوہنوں کہیا: ”سانوں دَس کہ تُوں کیہڑی نوِیں تلیم دینا چاہنا ایں؟ 20 تُوں جیہڑیاں نوِیاں گلاں دَس رہیا ایں، اوہ سانوں بڑیاں عجیب لگ رہیاں نیں تے اَسی جاننا چاہنے آں کہ اوہناں دا کیہہ مطلب اے۔“ 21 اصل چ جدوں ایتھنز دے سارے لوک تے اوتھے ٹھہرے ہوئے پردیسی فارغ ہوندے سن تے اوہ نوِیاں نوِیاں گلاں سُنن سُنان چ لگے رہندے سن۔ 22 پولُس نے اریوپگس دے وچکار کھلو کے کہیا:
”ایتھنز دے لوکو، مَیں ویکھیا اے کہ تُسی دُوجے لوکاں نالوں دیوتاواں دا بوہتا ڈر من دے او* 23 کیونکہ جدوں مَیں شہر چوں لنگھ رہیا ساں تے مَیں اوہناں چیزاں تے غور کیتا جنہاں دی تُسی عبادت کردے او۔ نالے مَیں اِک قربانگاہ وی ویکھی جدے تے لکھیا سی: ”اِک انجان خدا لئی۔“ تُسی جیس انجان خدا دی عبادت کردے او، مَیں توانوں اوہدے بارے ای دَس رہیا واں۔ 24 اوسے خدا نے ایہہ دُنیا تے ایہدیاں ساریاں چیزاں بنائیاں نیں۔ اوہی اسمان تے زمین دا مالک اے۔ پر اوہ انساناں دے ہتھاں نال بنے مندراں چ نئیں رہندا۔ 25 نہ ای اوہنوں انساناں کولوں مدد یاں کسے ہور چیز دی لوڑ اے سگوں اوہنے ای انساناں نُوں زندگی، ساہ تے ساریاں چیزاں دِتیاں نیں۔ 26 نالے اوہنے اِک آدمی دے ذریعے ساریاں قوماں پیدا کیتیاں تاکہ اوہ پوری زمین تے وَسن۔ اوہنے کجھ کماں لئی وقت طے کیتا تے ایہہ وی طے کیتا کہ انسان کتھے رہن گے۔ 27 اوہ چاہندا اے کہ انسان اوہدی تلاش کرن۔ جے اوہ اوہنوں لبھن دی پوری کوشش کرن گے تے اوہ اوہناں نُوں مِل جائے گا کیونکہ اصل چ اوہ کسے وی انسان توں دُور نئیں اے۔ 28 اوہدے ای ذریعے اَسی پیدا ہوئے آں تے اوہدے ای سہارے ٹُرنے پھرنے آں تے زندہ واں۔ جیویں تواڈے کجھ شاعراں نے وی کہیا اے: ”اَسی وی اوہدے بچے آں۔“
29 ایس لئی جے اَسی سارے اوہدے بچے آں تے سانوں ایہہ نئیں سوچنا چاہی دا کہ خدا سونے، چاندی یاں پتھر نال بنی کسے شے ورگا اے جنہوں انسان نے اپنی کاریگری تے عقل نال بنایا اے۔ 30 ایہہ سچ اے کہ اِک وقت سی کہ خدا نے اوہناں لوکاں نُوں برداشت کیتا جیہڑے انجانے چ ایہو جہے کم کردے سن۔ پر ہُن اوہ دُنیا دے سارے لوکاں نُوں توبہ کرن لئی کہہ رہیا اے 31 کیونکہ اوہنے اِک دن طے کیتا اے جدوں اوہ اپنے چُنے ہوئے اِک آدمی دے ذریعے اِنصاف نال ساری دُنیا دی عدالت کرے گا۔ خدا نے اوس آدمی نُوں مُردیاں چوں زندہ کر کے سارے لوکاں نُوں ایس گل دی ضمانت دِتی اے کہ اوہ دن ضرور آئے گا۔“
32 جدوں لوکاں نے مُردیاں دے زندہ ہون بارے سُنیا تے اوہناں چوں کجھ پولُس دا مذاق اُڈان لگ پئے جد کہ کجھ نے کہیا: ”اَسی ایہناں گلاں بارے کسے ہور دن سُننا چاہواں گے۔“ 33 ایس لئی پولُس اوتھوں چلا گیا۔ 34 پر کجھ لوک اوہدے نال رَل گئے تے ایمان لے آئے۔ ایہناں چ اریوپگس دی عدالت دا اِک جج دیونیسیُس، دمرِس ناں دی اِک عورت تے کئی ہور لوک وی سن۔