یوحنا نُوں مِلن والا مُکاشفہ
20 فیر مَیں اِک فرشتے نُوں اسمان توں تھلے آندے ویکھیا۔ اوہدے ہتھ چ اتھاہ گڑھے دی چابی تے اِک وڈی زنجیر سی۔ 2 اوہنے اژدہے، ہاں، اوس پرانے سَپ نُوں یعنی شیطان اِبلیس نُوں پھڑ لیا تے اوہنوں 1000 سال لئی بنھ دِتا۔ 3 فیر اوہنے اژدہے نُوں زور نال اتھاہ گڑھے چ سُٹ دِتا تے اوہدا دروازہ بند کر کے تالا* لا دِتا تاکہ اوہ قوماں نُوں گمراہ نہ کر سکے۔ جدوں 1000سال پورے ہو جان گے تے اوہنوں تھوڑی دیر لئی آزاد کر دِتا جائے گا۔
4 فیر مَیں کجھ لوکاں نُوں تختاں تے بیٹھے ویکھیا جنہاں نُوں عدالت کرن دا اِختیار دِتا گیا سی۔ ایہہ اوہ لوک نیں جنہاں نُوں یسوع تے خدا بارے گواہی دین دی وجہ توں جانوں ماریا گیا سی۔ اوہناں نے وحشی درندے تے اوہدے بُت دی پوجا نئیں کیتی سی تے اپنے متھے تے اپنے ہتھ اُتے اوہناں دا نشان نئیں لوایا سی۔ ایس لئی اوہناں نُوں زندہ کیتا گیا تاکہ اوہ مسیح نال 1000 سال لئی بادشاہواں دے طور تے حکمرانی کرن۔ 5 ایہہ اوہ نیں جنہاں نُوں سب توں پہلاں زندہ کیتا گیا۔ (باقی مُردے اوہدوں تک زندہ نئیں ہوئے جدوں تک 1000 سال پورے نئیں ہو گئے۔) 6 اوہ لوک پاک تے خوش نیں جنہاں نُوں سب توں پہلاں زندہ کیتا جاندا اے کیونکہ اوہناں تے دُوجی موت* دا کوئی وَس نئیں۔ اوہ خدا تے مسیح دے کاہن ہون گے تے 1000 سال تک مسیح نال بادشاہواں دے طور تے حکمرانی کرن گے۔
7 جیویں ای 1000 سال ختم ہون گے شیطان نُوں قید چوں آزاد کیتا جائے گا 8 تے اوہ زمین دے چارے کونیاں چ جا کے قوماں یعنی جوج تے ماجوج نُوں گمراہ کرے گا تے اوہناں نُوں جنگ لئی جمع کرے گا۔ اوہناں لوکاں دی تعداد سمندر دی ریت جِنّی ہوئے گی۔ 9 ایہہ لوک پوری زمین تے پھیل جان گے تے مُقدس لوکاں دے خیمیاں تے خدا دے پیارے شہر نُوں گھیر لین گے۔ پر اسمانوں اَگ نازل ہوئے گی تے اوہناں نُوں ساڑ کے سواہ کردے گی۔ 10 اوہناں نُوں گمراہ کرن والے اِبلیس نُوں اَگ تے گندھک دی اوس جھیل چ سُٹیا جائے گا جدے چ وحشی درندے تے جھوٹھے نبی نُوں سُٹیا گیا سی۔ اوہناں نُوں ہمیشاں ہمیشاں تک دن رات تڑفایا جائے گا۔*
11 فیر مَیں چِٹے رنگ دا اِک بوہت وڈا تخت ویکھیا جدے تے خدا بیٹھا ہویا سی۔ زمین تے اسمان اوہدے سامنیوں غائب ہو گئے تے اوہناں دا ناں نشان مٹ گیا۔ 12 مَیں تخت دے سامنے اوہناں سارے چھوٹے تے وڈے لوکاں* نُوں کھلوتے ہوئے ویکھیا جیہڑے مر گئے سن۔ نالے کتاباں کھولیاں گئیاں۔ فیر اِک ہور کتاب کھولی گئی یعنی زندگی دی کتاب۔ اوہناں لوکاں دی عدالت اوہناں کتاباں چ لکھیاں ہوئیاں گلاں تے اوہناں دے کماں دے مطابق کیتی گئی۔ 13 سمندر، موت تے قبر نے اوہناں مُردیاں نُوں آزاد کر دِتا جیہڑے اوہناں دے قبضے چ سن۔ اوہناں وچوں ہر اِک دی عدالت اوہناں دے کماں دے مطابق کیتی گئی۔ 14 موت تے قبر نُوں اَگ دی جھیل چ سُٹ دِتا گیا۔ اَگ دی جھیل دا اشارہ دُوجی موت وَل اے۔ 15 جدا وی ناں زندگی دی کتاب چ نئیں لکھیا سی، اوہنوں اَگ دی جھیل چ سُٹ دِتا گیا۔