یوحنا دا دُوجا خط
1 مَیں بزرگ ایہہ خط چُنی ہوئی بھین* تے اوہدے بچیاں دے ناں لکھ رہیا واں۔ مَیں توانوں ساریاں نُوں دلوں پیار کرنا واں تے صرف مَیں ای نئیں سگوں اوہ سارے وی جنہاں نے سچائی سکھی اے۔ 2 اَسی توانوں ایس لئی پیار کرنے آں کیونکہ ساڈے چ سچائی اے جیہڑی ہمیشاں ساڈے دلاں چ رہوے گی۔ 3 ساڈے خدا یعنی باپ تے اوہدے پُتر یسوع مسیح وَلّوں سانوں سچائی تے محبت مِلدی رہوے گی تے ایہدے نال نال سانوں اوہناں وَلّوں عظیم رحمت، مہربانی تے سلامتی وی مِلدی رہوے گی۔
4 مَیں ایہہ سُن کے بڑا خوش آں کہ تیرے کجھ بچے سچائی دی راہ تے چل رہے نیں جیویں کہ سانوں باپ وَلّوں حکم ملیا اے۔ 5 ایس لئی میرئیے بھینے،* مَیں تینوں درخاست کرنا واں کہ اَسی سارے اِک دُوجے نال پیار کرئیے۔ (مَیں توانوں کسے نویں حکم بارے نئیں لکھ رہیا سگوں ایہہ اوہی حکم اے جیہڑا سانوں شروع توں ملیا اے۔) 6 پیار کرن دا مطلب ایہہ وے کہ اَسی خدا دے حکماں تے چلئیے۔ جیویں تُسی شروع توں ای سُنیا اے، اوہدا حکم ایہہ وے کہ تُسی پیار دی راہ تے چلدے رہوو۔ 7 بوہت سارے دھوکھےباز دُنیا چ آ گئے نیں جیہڑے ایہہ گل نئیں من دے کہ یسوع مسیح انسان بن کے آیا سی۔ تے جیہڑا ایہہ نئیں من دا اوہی دھوکھےباز تے مسیح دا مخالف اے۔
8 ایس لئی چوکس رہوو کہ کِتے تُسی اوہ چیزاں گنوا نہ بیٹھو جنہاں نُوں پان لئی اَسی محنت کیتی اے سگوں تُسی پورا انعام پاؤ۔ 9 جیہڑا انسان مسیح دی تلیم دے مطابق چلن دی بجائے ایہدی حد نُوں پار کر جاندا اے، اوہنوں خدا قبول نئیں کردا۔ پر جیہڑا انسان مسیح دی تلیم دے مطابق چلدا رہندا اے، اوہنوں باپ وی قبول کردا اے تے بیٹا وی۔ 10 جے کوئی تواڈے کول آندا اے تے ایہہ تلیم نئیں دیندا تے اوہنوں نہ تے اپنے گھر وَڑھن دَوو تے نہ ای اوہنوں سلام کرو 11 کیونکہ جیہڑا اوہنوں سلام کردا اے، اوہ اوہدے بھیڑے کماں چ شامل ہوندا اے۔
12 مَیں تواڈے نال ہور وی بڑیاں گلاں کرنا چاہنا واں پر خط* دے ذریعے نئیں سگوں مینوں امید اے کہ مَیں تواڈے کول آواں گا تے اَسی آمنے سامنے بہہ کے گل کراں گے تاکہ تواڈی خوشی ہور وی ودھ جائے۔
13 تیری چُنی ہوئی بھین دے بچیاں وَلّوں تینوں سلام۔