رومیوں دے ناں خط
6 فیر کیہہ ایہدا مطلب ایہہ وے کہ اَسی گُناہ کردے رہیے تاکہ سانوں خدا دی عظیم رحمت ہور زیادہ ملے؟ 2 بالکل نئیں! ہُن جے اَسی گُناہ کرن دے لحاظ نال مر گئے* آں تے فیر ایہہ کیویں ہو سکدا اے کہ اَسی گُناہ کردے رہیے؟ 3 کیہہ توانوں نئیں پتہ کہ بپتسمہ لے کے اَسی سارے یسوع مسیح نال اِک مُٹھ ہو گئے آں تے اَسی اوہدی موت چ بپتسمہ* لیا اے؟ 4 اوہدی موت چ بپتسمہ لے کے اَسی اوہدے نال دفن ہو گئے ساں۔ نالے جیویں باپ دی شاندار طاقت دے ذریعے مسیح مُردیاں چوں زندہ ہو کے نوِیں زندگی گزار رہیا اے، اونویں ای اَسی وی نوِیں زندگی گزاریئے۔ 5 اَسی مسیح نال اِک مُٹھ آں کیونکہ اوہدے وانگوں اَسی وی اِک لحاظ نال مر گئے آں تے اوہدے وانگوں سانوں زندہ وی کیتا جائے گا۔ 6 اَسی جاننے آں کہ ساڈی پرانی شخصیت* مسیح نال سُولی* تے ٹنگ دِتی گئی سی تاکہ ساڈے گُناہگار جسم دا ساڈے تے کوئی وَس نہ چلے تے اَسی گُناہ دے غلام نہ رہیے 7 کیونکہ جیہڑا بندہ مر جاندا اے، اوہدے گُناہ معاف ہو جاندے نیں۔*
8 جے اَسی مسیح نال مر گئے آں تے سانوں یقین اے کہ اَسی اوہدے نال جیاں گے وی۔ 9 اَسی جاننے آں کہ مسیح ہُن مُردیاں چوں زندہ ہو گیا اے تے اوہ فیر کدی نئیں مرے گا کیونکہ ہُن موت دا اوہدے تے کوئی وَس نئیں رہیا۔ 10 اوہ ایس لئی مریا سی تاکہ گُناہ نُوں اِکو وار ہمیشاں لئی ختم کر دَوے۔ ہُن اوہ ایس لئی جی رہیا اے تاکہ خدا دی مرضی پوری کرے۔ 11 ایسے طرحاں یاد رکھو کہ تُسی وی گُناہ دے لحاظ نال مر گئے او* پر مسیح یسوع دے شاگرد ہون دے ناتے خدا دی مرضی پوری کرن لئی جی رہے او۔
12 ایس لئی گُناہ نُوں اپنے جسم* تے حکمرانی نہ کرن دَوو تے ایہدیاں خواہشاں دے غلام نہ بنو۔ 13 نالے اپنے جسم نُوں گُناہ دے حوالے کر کے بُرائی کرن دا ذریعہ* نہ بنو سگوں اپنے جسم نُوں خدا دے حوالے کر کے نیکی کرن دا ذریعہ بنو۔ تُسی اپنے آپ نُوں خدا دے حضور پیش کرو کیونکہ پہلاں تُسی اوہدی نظر چ مُردہ سو پر ہُن زندہ ہو گئے او۔ 14 توانوں گُناہ دے غلام نئیں ہونا چاہی دا کیونکہ تُسی ہُن شریعت تے نئیں چلدے سگوں توانوں خدا دی عظیم رحمت ملی اے۔
15 فیر کیہہ ایہدا مطلب ایہہ وے کہ اَسی گُناہ کردے رہیے کیونکہ اَسی شریعت تے نئیں چلدے سگوں سانوں خدا دی عظیم رحمت ملی اے؟ بالکل نئیں! 16 کیہہ توانوں نئیں پتہ کہ جے تُسی کسے دے فرمانبردار ہوندے او تے تُسی اوہدے غلام ہوندے او؟ ایس لئی تُسی یاں تے گُناہ دے غلام او جدی وجہ توں موت آندی اے یاں فیر خدا* دے غلام او جدی وجہ توں توانوں نیک ٹھہرایا جائے گا۔ 17 پر خدا دا شکر اے کہ تُسی گُناہ دے غلام نئیں رہے سگوں تُسی دِلوں اوس تلیم نُوں من دے او جیہڑی توانوں خدا وَلّوں ملی اے۔ 18 تُسی گُناہ دی غلامی توں آزاد ہو کے نیکی دے غلام بن گئے او۔ 19 مَیں توانوں ایہہ گلاں اسان لفظاں چ سمجھا رہیا واں کیونکہ تُسی عیبدار او۔ پہلاں تُسی اپنے جسم دِیاں خواہشاں دے غلام بن کے ناپاک تے بھیڑے کم کردے سو۔ پر ہُن تُسی خدا دی مرضی دے غلام بنو تاکہ تُسی نیک تے پاک کم کرو 20 کیونکہ جدوں تُسی گُناہ دے غلام سو تے توانوں نیکی کرن دی کوئی پرواہ نئیں سی۔
21 پر گُناہ دی غلامی کرن دا نتیجہ کیہہ نکلیا؟ تُسی ایہو جہے کم کردے سو جنہاں بارے سوچ کے ہُن توانوں شرم آندی اے تے جنہاں دا انجام موت اے۔ 22 پر ہُن تُسی گُناہ دی غلامی توں آزاد ہو گئے او تے خدا دے غلام بن گئے او۔ ایس لئی تُسی پاک کم کردے او جنہاں دا انعام ہمیشاں دی زندگی اے۔ 23 گُناہ دی مزدوری موت اے۔ پر خدا دی نعمت ہمیشاں دی زندگی اے جیہڑی اوہ ساڈے مالک مسیح یسوع دے ذریعے دیندا اے۔