عبرانیوں دے ناں خط

2 ایس لئی ضروری اے کہ اَسی اوہناں گلاں تے ہور وی زیادہ دھیان دَئیے جیہڑیاں اَسی سُنیاں نیں تاکہ ایہہ نہ ہوئے کہ اَسی ہولی ہولی ایمان دی راہ توں بھٹک جائیے۔ 2 فرشتیاں دے ذریعے دِتا گیا کلام*‏ سچا ثابت ہویا تے اِنصاف دے مطابق گُناہ‌گار تے نافرمان لوکاں نُوں سزا دِتی گئی۔ 3 ایس لئی جے اَسی اپنی شان‌دار نجات دی قدر نئیں کراں گے تے فیر اَسی وی سزا توں نئیں بچاں گے۔ نجات دے اوس پیغام بارے سب توں پہلاں ساڈے مالک نے دَسیا تے جنہاں لوکاں نے اوہدی گل سُنی، اوہناں نے اوس پیغام بارے سانوں گواہی دِتی۔ 4 نالے خدا نے وی ظاہر کیتا کہ اوہناں دی گواہی سچی اے کیونکہ اوہنے اپنی مرضی مطابق اپنے خادماں نُوں پاک روح دِتی تاکہ اوہ فرق فرق نشانیاں تے معجزے وکھان تے حیران کرن والے کم کرن۔‏

5 خدا نے اوس آن والی دُنیا*‏ نُوں فرشتیاں دے تابع نئیں کیتا جدے بارے اَسی گل کر رہے آں 6 سگوں اِک گواہ نے پاک کلام چ لکھیا:‏ ”‏انسان کیہہ اے کہ تُوں اوہنوں یاد رکھیں تے انسان دا بیٹا کیہہ اے کہ تُوں اوہدا خیال رکھیں؟ 7 تُوں اوہنوں جیہڑا عہدہ دِتا، اوہ فرشتیاں توں تھوڑا ای گھٹ سی۔ تُوں اوہدے سِر اُتے عزت تے شان دا تاج رکھیا تے اپنے ہتھاں نال بنائیاں ہوئیاں چیزاں تے اوہنوں اِختیار دِتا۔ 8 تُوں ساریاں چیزاں اوہدے پیراں تھلے کر دِتیاں۔“‏ جدوں خدا نے سارا کجھ اوہدے تابع کر دِتا تے فیر کوئی وی ایہو جہی چیز نئیں سی جیہڑی اوہدے تابع نہ ہوئے۔ پر اَسی حالے نئیں ویکھ سکدے کہ ساریاں چیزاں اوہدے تابع ہو گئیاں نیں۔ 9 پر اَسی ایہہ ضرور ویکھ سکنے آں کہ یسوع نُوں عزت تے شان دا تاج ملیا اے کیونکہ اوہنے دردناک موت سہی۔ جدوں یسوع زمین تے آیا تے اوہدا عہدہ فرشتیاں نالوں تھوڑا ای گھٹ سی تے اوہنے خدا دی عظیم رحمت دے ذریعے سارے انساناں دی خاطر موت نُوں گلے لایا۔‏*‏

10 ساریاں چیزاں توں خدا دی وڈیائی ہوندی اے کیونکہ سب کجھ اوہدے ذریعے ای بنیا اے تے اوہ چاہندا سی کہ بوہت سارے پُتراں نُوں شان‌دار رُتبہ ملے۔ ایس لئی ضروری سی کہ اوہناں دی نجات دا عظیم رہنما تکلیف سہہ کے ہر لحاظ نال قابل*‏ بنے۔ 11 خدا ساریاں دا باپ اے یعنی یسوع دا وی جیہڑا پاک کردا اے تے اوہناں دا وی جنہاں*‏ نُوں پاک کیتا جا رہیا اے۔ ایس لئی یسوع اوہناں نُوں بھرا کہن چ شرمندگی محسوس نئیں کردا 12 جیویں کہ اوہنے کہیا:‏ ”‏مَیں اپنے بھراواں سامنے تیرے ناں دا اعلان کراں گا۔ مَیں کلیسیا چ گیت گا کے تیری وڈیائی کراں گا۔“‏ 13 نالے اوہنے کہیا:‏ ”‏مَیں خدا تے بھروسا کراں گا۔“‏ اوہنے ایہہ وی کہیا:‏ ”‏ویکھو، مَیں تے اوہ چھوٹے بچے جیہڑے یہوواہ نے مینوں دِتے۔“‏

14 اوہ ”‏چھوٹے بچے“‏ انسان نیں،‏*‏ ایس لئی اوہنوں وی انسان بننا پیا تاکہ اوہ اپنی موت دے ذریعے اِبلیس نُوں ختم کرے جیہڑا موت لیا سکدا اے 15 تے اوہناں ساریاں نُوں آزاد کرے جیہڑے ایس ڈر دی غلامی چ زندگی جی رہے نیں کہ اوہ مر جان گے۔ 16 یسوع اصل چ فرشتیاں دی نئیں سگوں ابراہام دی نسل دی مدد کر رہیا اے۔ 17 ایس لئی ضروری سی کہ اوہ ہر لحاظ نال اپنے ”‏بھراواں“‏ ورگا بنے تاکہ اوہ اِک ایہو جیہا اعلیٰ کاہن بن سکے جیہڑا رحم تے وفاداری نال خدا دی خدمت کردا اے۔ نالے ایس لئی وی ضروری سی کہ اوہ لوکاں دے گُناہواں دی معافی لئی قربانی*‏ دَوے تاکہ اوہناں دی خدا نال صلح ہو سکے۔ 18 اوہنے اوہدوں بڑی تکلیف سہی جدوں اوہنوں اَزمایا گیا۔ ایس لئی اوہ اوہناں دی مدد کر سکدا*‏ اے جیہڑے اَزمیشاں دا سامنا کر رہے نیں۔‏