طِطُس دے ناں خط
3 اوہناں نُوں یاد دَواندا رہ کہ اوہ حکومتاں تے اِختیار والیاں دے تابع رہن تے اوہناں دا کہنا منن۔ نالے ہر چنگے کم لئی تیار رہن، 2 کسے بارے بُرا بھلا نہ کہن، لڑائی جھگڑا نہ کرن، اپنی گل تے اَڑے نہ رہن سگوں ساریاں نال سمجھداری تے نرمی نال پیش آن۔ 3 یاد رکھ کہ پہلاں اَسی وی بےعقل، نافرمان تے بھٹکے ہوئے ساں۔ طرحاں طرحاں دِیاں خواہشاں تے عیاشی دے غلام ساں۔ بُرائی تے حسد کرنے ساں، گھٹیا انسان ساں تے اِک دُوجے نال نفرت کرنے ساں۔
4 پر جدوں سانوں نجات دین والے خدا نے انساناں لئی اپنا پیار تے مہربانی ظاہر کیتی 5 تے اوہنے سانوں پاک* کر کے نوِیں زندگی دِتی تے اپنی پاک روح دے ذریعے سانوں نواں بنایا۔ ایس طرحاں اوہنے سانوں بچا لیا۔ اوہنے ایہہ ساڈے کسے نیک کم دی وجہ توں نئیں سگوں اپنی رحمدلی دی وجہ توں کیتا۔ 6 اوہنے ساڈے نجاتدہندہ یسوع دے ذریعے دل کھول کے ساڈے تے پاک روح نازل کیتی اے 7 تاکہ سانوں اوہدی عظیم رحمت دے ذریعے نیک ٹھہرایا جائے تے اَسی اپنی امید دے مطابق ہمیشاں دی زندگی دے وارث بنئے۔
8 ایہہ گلاں بھروسے دے لائق نیں۔ مَیں چاہنا واں کہ تُوں ایہناں معاملیاں تے زور دیندا رہویں تاکہ جیہڑے لوک خدا تے ایمان رکھدے نیں، اوہناں دا دھیان چنگے کماں تے لگا رہوے۔ ایہہ گلاں چنگیاں تے انساناں لئی فائدےمند نیں۔
9 پر ایہو جہے لوکاں توں دُور رہ جیہڑے بےوقوفاں وانگوں بحث کرن، نسب نامیاں دی چھانبین کرن تے شریعت بارے لڑائی جھگڑے کرن چ لگے رہندے نیں کیونکہ ایہہ سارے کم بےفائدہ تے فضول نیں۔ 10 جیہڑا بندہ کسے فرقے دی تلیم دیندا اے، اوہنوں خبردار کر۔ جے اوہ نئیں سُن دا تے اوہنوں دُوجی وار خبردار کرن توں بعد اوہدے نال ملنا چھڈ دے 11 کیونکہ ایہو جیہا بندہ سِدھی راہ توں بھٹک گیا اے تے اوہ گُناہ کر کے اپنے آپ نُوں قصوروار ٹھہراندا اے۔
12 جدوں مَیں ارتماس یاں تخِکُس نُوں تیرے کول بھیجاں تے تُوں نیکپُلِس چ میرے کول آن دی پوری کوشش کرِیں کیونکہ مَیں سردی دے موسم چ اوتھے رہن دا فیصلہ کیتا اے۔ 13 تُوں شریعت دے ماہر زیناس نُوں تے اپلّوس نُوں ضرورت دِیاں چیزاں دے دوِیں تاکہ اوہناں نُوں سفر چ کسے شے دی کمی نہ ہووے۔ 14 نالے ساڈے بھین بھراواں نُوں وی ایہہ سکھنا چاہی دا اے کہ اوہ چنگے کماں چ لگے رہن تاکہ جدوں اچانک کوئی لوڑ آ پووے تے اوہ مدد کر سکن تے اوہناں دی خدمت بےفائدہ* نہ ہووے۔
15 میرے نال دے سارے بھین بھراواں وَلّوں تینوں سلام۔ اوہناں سارے مسیحی بھین بھراواں نُوں میرے وَلّوں سلام دوِیں جیہڑے ساڈے ہمایمان نیں تے سانوں پیار کردے نیں۔
میری دُعا اے کہ خدا توانوں ساریاں نُوں اپنی عظیم رحمت بخشے۔