عبرانیوں دے ناں خط
13 اِک دُوجے نال بھین بھراواں وانگوں پیار کردے رہوو۔ 2 مہماننوازی کرنا* نہ بُھلو کیونکہ مہماننواز ہون دی وجہ توں کجھ لوکاں نے انجانے چ فرشتیاں دی خدمت کیتی۔ 3 اوہناں نُوں یاد رکھو جیہڑے قید چ نیں تے سمجھو کہ تُسی وی اوہناں نال قید او۔ نالے اوہناں نُوں وی یاد رکھو جنہاں نال بھیڑا سلوک ہو رہیا اے تے سمجھو کہ تُسی وی اوہناں نال ظلم سہہ رہے او۔* 4 شادی دا بندھن ساریاں دی نظر چ پاک* ہووے تے میاں بیوی اِک دُوجے دے وفادار رہن* کیونکہ خدا جنسیبدکاری کرن والے لوکاں* دی عدالت کرے گا۔ 5 تواڈی زندگی توں ظاہر ہوئے کہ تُسی پیسے نال پیار نئیں کردے سگوں تواڈے کول جو کجھ وی اے، تُسی اوہدے تے راضی او کیونکہ خدا نے وعدہ کیتا اے: ”مَیں تیرا ساتھ کدی نئیں چھڈاں گا تے کدی وی تیری مدد کرن توں پچھے نئیں ہٹاں گا۔“ 6 ایس لئی اَسی پورے یقین نال کہہ سکنے آں کہ ”یہوواہ میرا مددگار اے، مَیں نئیں ڈراں گا۔ انسان میرا کیہہ وگاڑ سکدا اے؟“
7 اوہناں دی مثال نُوں یاد رکھو جیہڑے تواڈی پیشوائی کر رہے نیں تے جنہاں نے توانوں خدا دا کلام سُنایا اے۔ اوہناں دے چنگے چالچلن دے نتیجیاں تے غور کرو تے اوہناں ورگا ایمان ظاہر کرو۔
8 یسوع مسیح کل وی اوہی سی، اَج وی اوہی اے تے ہمیشاں اوہی رہوے گا۔*
9 تُسی طرحاں طرحاں دی عجیب تلیم دی وجہ توں گمراہ نہ ہووو سگوں اپنے دِلاں نُوں خدا دی عظیم رحمت دے ذریعے مضبوط کرو۔ ایہہ رحمت کھان پین دِیاں رویتاں نالوں زیادہ اہم اے کیونکہ رویتاں نُوں بوہتی اہمیت دین والیاں نُوں کوئی فائدہ نئیں ہوندا۔
10 خدا نے ساڈے لئی اِک ایہو جہی قربانگاہ دا بندوبست کیتا اے جدے توں اوہناں لوکاں نُوں کھان دا حق نئیں اے جیہڑے خیمے چ پاک خدمت کردے نیں۔ 11 اعلیٰ کاہن گُناہ دی قربانی لئی جیہڑے جانوراں دا خون خیمے دے پاک ترین کمرے چ لجاندا اے، اوہناں دِیاں لاشاں نُوں خیمے توں باہر ساڑیا جاندا اے۔ 12 ایسے طرحاں یسوع نے وی اپنی قربانی شہروں باہر دِتی تاکہ لوکاں نُوں اپنے خون دے ذریعے پاک کرے۔ 13 ایس لئی آؤ، اَسی وی اوہدے کول شہروں باہر* جائیے تے اوہدے وانگوں بےعزتی سہئے 14 کیونکہ ساڈے کول ایہو جیہا کوئی شہر نئیں جیہڑا قائم رہوے گا سگوں اَسی اوس شہر دا بےتابی نال اِنتظار کر رہے آں جیہڑا قائم کیتا جائے گا۔ 15 آؤ، اَسی یسوع دے ذریعے خدا دی حمد تے تعریف کر کے ہمیشاں اوہدے اَگے قربانیاں چڑھائیے یعنی اپنے مُونہوں ساریاں سامنے اوہدے ناں دا اعلان کریئے۔* 16 نالے بھلائی کرنا تے اپنیاں چیزاں نال دُوجیاں دی مدد کرنا نہ بُھلو کیونکہ خدا ایہو جہیاں قربانیاں توں بوہت خوش ہوندا اے۔
17 اوہناں دے فرمانبردار تے تابعدار ہووو جیہڑے تواڈی پیشوائی کردے نیں کیونکہ اوہناں نُوں تواڈی دیکھبھال کرن دی ذمےداری دِتی گئی اے تے اوہناں نُوں ایہدا حساب دینا پووے گا۔ جے تُسی اوہناں دی گل منو گے تے اوہ خوشی نال تواڈی دیکھبھال کرن گے۔ پر جے تُسی نئیں منو گے تے اوہ بےدل ہو سکدے نیں* جدے توں تواڈا ای نقصان ہوئے گا۔
18 اَسی خدا دے حضور صاف ضمیر نال خدمت کر رہے آں تے ہر معاملے چ ایمانداری توں کم لینا چاہنے آں۔ ایس لئی ساڈے لئی دُعا کردے رہوو۔ 19 پر خاص طور تے ایس بارے دُعا کرو کہ مَیں چھیتی تواڈے کول آواں۔
20 خدا نے بھیڈاں دے عظیم چرواہے یعنی ساڈے مالک یسوع نُوں مُردیاں چوں زندہ کیتا جنہے خدا دے حضور ہمیشاں قائم رہن والے عہد دا خون پیش کیتا۔ دُعا اے کہ اِطمینان دین والا خدا 21 توانوں پوری طرحاں ایس قابل بنائے کہ تُسی اوہدی مرضی تے چل سکو۔ اوہ یسوع مسیح دے ذریعے ساڈے چ ایہو جہے کم کرن دی خواہش پیدا کردا اے جیہڑے اوہنوں پسند نیں۔ خدا دی وڈیائی ہمیشاں ہمیشاں تک ہوندی رہوے۔ آمین۔
22 بھراوو، مَیں تواڈا حوصلہ ودھان لئی ایہہ چھوٹا جیہا خط لکھیا اے۔ میری درخاست اے کہ تُسی ایہدے چ لکھیاں گلاں تے ضرور دھیان دَوو۔ 23 مَیں توانوں دَسنا چاہنا واں کہ ساڈے بھرا تیمُتھیُس نُوں رِہا کر دِتا گیا اے۔ جے اوہ چھیتی آ گیا تے اَسی دونویں توانوں مِلن آواں گے۔
24 تواڈی پیشوائی کرن والے بھراواں نُوں تے سارے مُقدس لوکاں نُوں میرا سلام۔ اِٹلی دے بھین بھرا وی توانوں سلام کہندے نیں۔
25 دُعا اے کہ خدا تواڈے ساریاں تے عظیم رحمت کردا رہوے۔