اہم سوال

کیہہ زبور 12:‏7 چ لکھی ایہہ گل کہ تُوں اوہناں دی حفاظت کریں گا، مصیبت‌زدہ لوکاں وَل اشارہ کردی اے جنہاں دا ذکر 5 ایت چ ہویا اے یاں یہوواہ دِیاں گلاں وَل جنہاں دا ذکر 6 ایت چ ہویا اے؟‏

زبور 12 دِیاں پہلیاں کجھ ایتاں توں پتہ چلدا اے کہ 7 ایت چ جیہڑی گل لکھی اے، اوہ لوکاں وَل اشارہ کردی اے۔‏

زبور 12:‏1-‏4 چ دَسیا گیا اے کہ وفادار لوک دُنیا چوں ختم ہو گئے نیں۔ ہُن ذرا زبور 12:‏5-‏7 تے غور کرو جنہاں بارے سوال چ گل ہوئی اے۔‏

5 ایت چ دَسیا گیا اے کہ خدا مصیبت‌زدہ لوکاں لئی کیہہ کرے گا۔ اوہ اوہناں نُوں بچائے گا۔‏

6 ایت چ دَسیا گیا اے کہ یہوواہ دِیاں گلاں پاک نیں بالکل چاندی وانگوں۔ یہوواہ دے سارے بندے اوہدے کلام بارے اِنج ای محسوس کردے نیں۔—‏زبور 18:‏30؛ 119:‏140۔‏

ہُن آؤ اگلی ایت یعنی زبور 12:‏7 تے غور کرئیے جتھے لکھیا اے:‏ اَے یہوواہ!‏ تُوں اوہناں دی حفاظت کریں گا؛ تُوں اوہناں چوں ہر اِک نُوں ایس پُشت توں ہمیشاں بچا کے رکھیں گا۔ ایس ایت چ لفظ ”‏اوہناں“‏ دا اشارہ کدے وَل اے؟‏

6 ایت چ یہوواہ دِیاں گلاں دا ذکر ہویا اے ایس لئی کجھ لوکاں نُوں لگدا اے کہ 7 ایت چ لفظ ”‏اوہناں“‏ یہوواہ دِیاں گلاں وَل اشارہ کردا اے۔ تے اَسی جاننے آں کہ خدا نے ہمیشاں اپنے کلام نُوں محفوظ رکھیا اے، اوس ویلے وی جدوں مخالفاں نے ایہنوں مٹان دی پوری کوشش کیتی سی۔—‏یسعیاہ 40:‏8؛‏ 1-‏پطرس 1:‏25‏۔‏

پر ایہہ گل وی سچ اے کہ 5 ایت دے مطابق یہوواہ اپنے بندیاں دی وی حفاظت کردا اے۔ یہوواہ نے پہلاں وی اِنج کیتا تے آن والے وقت چ وی اوہ مصیبت‌زدہ لوکاں دی مدد کرے گا تے اوہناں نُوں بچائے گا۔—‏ایوب 36:‏15؛ زبور 6:‏4؛ 31:‏1، 2؛ 54:‏7؛ 145:‏20۔‏

تے فیر 7 ایت چ لفظ ”‏اوہناں“‏ دا اشارہ کنہاں وَل اے؟‏

ایس پورے زبور تے غور کرن نال پتہ چلدا اے کہ لفظ ”‏اوہناں“‏ دا اشارہ لوکاں وَل اے۔‏

زبور 12:‏1 چ داؤد یہوواہ دے وفادار بندیاں دی گل کر رہیا اے جنہاں نال بھیڑے لوک جھوٹھ بولدے نیں۔ فیر اَسی اَگے پڑھنے آں کہ یہوواہ بُریاں گلاں کرن والے لوکاں دے خلاف کاروائی کرن لئی اُٹھے گا۔ ایس زبور چ سانوں یقین دَوایا گیا اے کہ اَسی یہوواہ دی ایس گل تے بھروسا رکھ سکنے آں کہ اوہ اپنے بندیاں دی مدد کرے گا کیونکہ اوہدیاں گلاں پاک نیں۔‏

تے 7 ایت چ دَسیا گیا اے کہ یہوواہ اوہناں یعنی مصیبت‌زدہ لوکاں دی بھیڑے لوکاں توں حفاظت کرے گا۔‏

جیس عبرانی لفظ دا ترجمہ ”‏اوہناں“‏ کیتا گیا اے، اوہ عبرانی صحیفیاں دِیاں بھروسے‌مند کاپیاں چ استمال ہویا اے۔ ”‏سپتواجنتا“‏ عبرانی صحیفیاں دا یونانی زبان چ سب توں پہلاں ترجمہ سی۔ ایہدے وچ زبور 12:‏7 چ دو وار لفظ ”‏سانوں“‏ استمال ہویا اے جدے توں پتہ چلدا اے کہ ایہدے چ مصیبت‌زدہ لوکاں دی گل ہو رہی اے۔ آخر وچ 7 ایت چ دَسیا گیا اے کہ یہوواہ ہر اِک نُوں یعنی اپنے ہر وفادار بندے نُوں ایس پُشت یعنی بھیڑے لوکاں توں بچائے گا۔ (‏زبور 12:‏7، 8)‏ عبرانی صحیفیاں دے ارامی زبان دے اِک ترجمے وچ 7 ایت دے دُوجے حصے چ لفظ ”‏اوہناں“‏ استمال ہویا اے۔ اوتھے لکھیا اے:‏ تُوں اَے خداوند نیک لوکاں نُوں بچائیں گا؛ تُوں ہمیشاں تک بُری پُشت توں اوہناں دی حفاظت کریں گا۔ ایہہ ایس گل دا اِک ہور ثبوت اے کہ زبور 12:‏7 چ لفظ ”‏اوہناں“‏ خدا دِیاں گلاں وَل اشارہ نئیں کردا۔‏

ایہناں گلاں دی بنیاد تے سانوں ایہہ امید مِلدی اے کہ یہوواہ اپنے وفادار بندیاں لئی کاروائی کرے گا۔‏