انساناں لئی خدا دا مقصد کیہہ اے؟‏

1.‏ انساناں لئی خدا دا مقصد کیہہ اے؟‏

انساناں لئی خدا دا مقصد بوہت ای شان‌دار اے۔ جدوں خدا نے آدم تے حوا نُوں بنایا تے اوہنے اوہناں نُوں اِک بوہت سوہنے باغ چ رکھیا۔ اوہ چاہندا سی کہ آدم تے حوا اولاد پیدا کرن، ساری زمین نُوں اِک سوہنا باغ بناؤن تے جانوراں دا خیال رکھن۔—‏پیدایش 1:‏28؛ 2:‏8، 9، 15؛ کتاب دے آخر چ نکتہ نمبر 6 نُوں ویکھو۔‏

2.‏ (‏الف)‏ سانوں کیویں پتہ اے کہ خدا اپنا مقصد ضرور پورا کرے گا؟ (‏ب)‏ خدا کیہو جہے لوکاں نُوں زمین تے وَساؤنا چاہندا اے تے کدوں تک؟‏

² تواڈے خیال چ کیہہ انسان فیر توں عدن ورگی سوہنی زمین تے رہ سکن گے؟ یہوواہ خدا نے اپنے کلام چ کہیا اے کہ مَیں ایہدا ارادہ کیتا اے تے مَیں ای اینوں پورا کراں گا۔ (‏یسعیاہ 46:‏9-‏11؛ 55:‏11)‏ یہوواہ خدا واقعی اپنے مقصد نُوں پورا کرے گا تے کوئی اوہنوں روک نئیں سکدا۔ بائبل چ دَسیا گیا اے کہ خدا نے زمین نُوں اینویں ای نئیں بنایا سگوں اِک خاص مقصد نال بنایا اے۔ (‏یسعیاہ 45:‏18)‏ اوہ چاہندا اے کہ انسان ساری زمین تے وَسن۔ پر اوہ کیہو جہے لوکاں نُوں زمین تے وَساؤنا چاہندا اے تے کدوں تک؟ پاک کلام چ لکھیا اے کہ صادق زمین دے وارث ہون گے تے ایہدے تے ہمیشاں ہسدے وَسدے رہن گے۔—‏زبور 37:‏29؛‏ مکاشفہ 21:‏3، 4‏۔‏

3.‏ دُنیا دے حالاتاں نُوں ویکھ کے ساڈے ذہن چ کیہڑا سوال آ سکدا اے؟‏

³ پر اَج کل لوک بیماری تے موت دا شکار ہوندے نیں۔ اوہ لڑدے جھگڑدے تے اِک دُوجے نُوں قتل کردے نیں۔ پر خدا تے ایہہ کدی نئیں سی چاہندا۔ تے فیر ایہہ سب کجھ کیوں ہون لگ پیا؟ ایہدا جواب صرف خدا دے کلام چوں ای مِل سکدا اے۔‏

خدا دا دُشمن

4، 5.‏ (‏الف)‏ عدن دے باغ چ حوا نال کنہے گل کیتی؟ (‏ب)‏ اِک ایماندار بندہ چور کیویں بن سکدا اے؟‏

⁴ بائبل چ خدا دے اِک دُشمن دا ذکر کیتا گیا اے جیہڑا اِبلیس تے شیطان کہلاؤندا اے۔ عدن دے باغ چ شیطان نے ای حوا نال گل کیتی سی پر اوہنے ظاہر ایہہ کیتا کہ جیویں حوا نال اِک سپ گل کر رہیا اے۔—‏مکاشفہ 12:‏9؛‏ پیدایش 3:‏1؛ کتاب دے آخر چ نکتہ نمبر 7 نُوں ویکھو۔‏

⁵ پر سوال ایہہ وے کہ کیہہ شیطان نُوں خدا نے بنایا اے؟ بالکل نئیں۔ زمین نُوں بناؤن توں پہلے خدا نے اسمان تے بوہت سارے فرشتے بنائے سن۔ اوہناں فرشتیاں وچوں اِک فرشتہ اِبلیس بن گیا۔ (‏ایوب 38:‏4، 7)‏ پر اِک فرشتہ بھلا اِبلیس کیویں بن سکدا اے؟ بالکل اونویں ای جیویں اِک ایماندار بندہ چور بن سکدا اے۔ اوہ چور پیدا تے نئیں ہوندا پر شاید اوہدے دل چ اِک ایہو جہی چیز نُوں پاؤن دی خواہش پیدا ہو جاندی اے جیہڑی اصل چ اوہدی نئیں ہوندی۔ فیر اوہ اوس چیز بارے سوچدا رہندا اے تے اوہدی غلط خواہش ودھ دی جاندی اے۔ اخیر جدوں اوہنوں موقع مِلدا اے تے اوہ اوس چیز نُوں چوری کر لیندا اے۔ اِنج اوہ چور بن جاندا اے۔‏‏—‏یعقوب 1:‏13-‏15 نُوں پڑھو؛‏ کتاب دے آخر چ نکتہ نمبر 8 نُوں ویکھو۔‏

6.‏ اِک فرشتہ خدا دا دُشمن کیویں بن گیا؟‏

⁶ جیہڑا فرشتہ اِبلیس بن گیا، اوہدے نال وی اِنج ای ہویا۔ خدا نے آدم تے حوا نُوں کہیا سی کہ اوہ زمین نُوں اپنی اولاد نال بھر دین۔ (‏پیدایش 1:‏27، 28)‏ شاید اوس فرشتے نے سوچیا ہوئے کہ جے انسان یہوواہ دی بجائے میری عبادت کرن تے مزہ ای آ جائے۔ فیر اوہ ایس گل بارے سوچدا رہیا۔ ایس طرحاں اوہدے دل چ اوس چیز دی خواہش ودھ دی گئی جیہڑی اصل چ یہوواہ دی سی۔ اپنی عبادت کراؤن دے چکر چ اوہنے حوا نال جھوٹھ بولیا تے اوہنوں گمراہ کیتا۔ ‏(‏پیدایش 3:‏1-‏5 نُوں پڑھو۔)‏ ایس طرحاں اوہ خدا دا دُشمن بن گیا تے شیطان اِبلیس کہلاؤن لگ پیا۔‏

7.‏ (‏الف)‏ آدم تے حوا تے موت کیوں آئی؟ (‏ب)‏ اَسی کیوں بُڈھے ہوندے تے مرنے آں؟‏

⁷ آدم تے حوا نے اوہ پھل کھا لیا جنہوں کھان توں یہوواہ خدا نے منع کیتا سی۔ (‏پیدایش 2:‏17؛ 3:‏6)‏ خدا دی نافرمانی کرکے اوہ گناہ‌گار بن گئے۔ ایہدا انجام اوہ ای ہویا جو یہوواہ نے دَسیا سی یعنی اوہ مر گئے۔ (‏پیدایش 3:‏17-‏19)‏ آدم تے حوا دے بچے وی موت دا شکار ہوئے کیونکہ اوہ وی گناہ‌گار سن۔ ‏(‏رومیوں 5:‏12 نُوں پڑھو۔)‏ پر آدم تے حوا دے بچے گناہ‌گار کیویں بن گئے؟ ایس گل نُوں سمجھن لئی اِک مثال تے غور کرو۔ فرض کرو کہ تواڈے کول اِک سانچا اے جیہڑا ڈِنگا اے۔ تُسی اوہدے چ جیہڑی وی چیز بناؤ گے اوہ ڈِنگی بنے گی۔ ایسے طرحاں جدوں آدم نے خدا دی نافرمانی کیتی تے اوہ گناہ‌گار بن گیا۔ ایس لحاظ نال اَسی سارے وی گناہ‌گار آں کیونکہ اَسی آدم دی اولاد آں۔ ایس لئی اَسی بُڈھے ہوندے تے مرنے آں۔—‏رومیوں 3:‏23‏؛ کتاب دے آخر چ نکتہ نمبر 9 نُوں ویکھو۔‏

8، 9.‏ (‏الف)‏ شیطان، آدم تے حوا دے ذہن چ کیہڑی گل پاؤنا چاہندا سی؟ (‏ب)‏ یہوواہ خدا نے باغیاں نُوں اوسے ویلے ختم کیوں نئیں سی کیتا؟‏

⁸ شیطان نے آدم تے حوا نُوں خدا دی نافرمانی کرن لئی بھڑکا کے خدا دے خلاف بغاوت شروع کر دِتی۔ اوہ آدم تے حوا دے ذہن چ ایہہ گل پاؤنا چاہندا سی کہ یہوواہ خدا جھوٹھا اے، اوہ اوہناں دا بھلا نئیں چاہندا تے اوہ چنگا حکمران نئیں۔ شیطان اصل چ ایہہ ثابت کرنا چاہندا سی کہ آدم تے حوا نُوں خدا دی رہنمائی دی لوڑ نئیں سگوں اوہناں نُوں آپ فیصلہ کرنا چاہی دا اے کہ اوہناں لئی کیہہ صحی اے تے کیہہ غلط اے۔ ایس صورت چ یہوواہ خدا نے کیہہ کیتا؟ اوہ چاہندا تے باغیاں نُوں اوسے ویلے ختم کر سکدا سی۔ پر کیہہ ایس طرحاں شیطان جھوٹھا ثابت ہو جاندا؟ بالکل نئیں۔‏

⁹ یہوواہ خدا نے باغیاں نُوں فوراً ختم نہ کیتا۔ ایہدی بجائے اوہنے انساناں نُوں حکمرانی کرن دی اجازت دے دِتی تاکہ ایہہ ثابت ہو جائے کہ شیطان جھوٹھا اے تے صرف یہوواہ خدا ای جان دا اے کہ انساناں لئی کیہہ بہتر اے۔ ایہدے بارے اَسی باب نمبر 11 چ ہور سکھاں گے۔ پر تواڈے خیال چ کیہہ آدم تے حوا دا فیصلہ صحی سی؟ کیہہ اوہناں نُوں خدا دا حکم توڑنا چاہی دا سی؟ آدم تے حوا نُوں کسے چیز دی تھوڑ نئیں سی۔ خدا نے اوہناں نُوں خوشیاں بھری زندگی دِتی سی۔ اوہناں کول اِک ودھیا گھر تے دل نُوں سکون دین والا کم سی۔ پر شیطان نے اوہناں نُوں کجھ وی نئیں سی دِتا۔ جے تُسی آدم تے حوا دی تھاں ہوندے تے تُسی کیہہ کردے؟‏

10.‏ اَسی ساریاں نے کیہڑا خاص فیصلہ کرنا اے؟‏

¹⁰ آدم تے حوا وانگوں اَسی وی اِک خاص فیصلہ کرنا اے جدا تعلق ساڈی زندگی نال اے۔ اَسی یاں تے ایہہ فیصلہ کرنا اے کہ اَسی یہوواہ خدا نُوں اپنا حکمران مناں گے، اوہدے حکماں تے چلاں گے تے شیطان نُوں جھوٹھا ثابت کراں گے۔ یاں فیر اَسی ایہہ فیصلہ کرنا اے کہ اَسی شیطان نُوں اپنا حکمران مناں گے۔ (‏زبور 73:‏28؛ امثال 27:‏11 نُوں پڑھو۔‏‏)‏ ایس دُنیا چ بوہت گھٹ لوک خدا دا کہنا من دے نیں۔ پر کیہہ خدا ایس دُنیا دا حکمران ہے؟ نئیں۔ جے اوہ حکمران نئیں تے فیر کون اے؟‏

ایس دُنیا دا حکمران کون اے؟‏

11، 12.‏ (‏الف)‏ شیطان نے یسوع مسیح نُوں جیہڑی گل کہی، اوہدے توں کیہہ پتہ چلدا اے؟ (‏ب)‏ پاک کلام دِیاں کیہڑیاں ایتاں توں پتہ چلدا اے کہ شیطان ایس دُنیا دا حکمران اے؟‏

¹¹ یسوع مسیح نُوں پتہ سی کہ ایس دُنیا دا حکمران کون اے۔ اِک واری شیطان نے یسوع نُوں دُنیا دِیاں ساریاں حکومتاں تے اوہناں دی شان وکھائی تے کہیا کہ جے تُوں گوڈیاں بھار ہو کے اِک وار مینوں سجدہ کریں تے مَیں ایہہ سب کجھ تینوں دے دواں گا۔ (‏متی 4:‏8، 9؛‏ لُوقا 4:‏5، 6‏)‏ ذرا سوچو کہ جے دُنیا دِیاں حکومتاں شیطان دے ہتھ چ نہ ہوندیاں تے کیہہ اوہ یسوع مسیح نُوں کہہ سکدا سی کہ مَیں ایہہ سب کجھ تینوں دے دواں گا؟ نئیں۔ ایس توں پتہ چلدا اے کہ دُنیا دِیاں ساریاں حکومتاں شیطان دِیاں نیں۔‏

¹² شاید تُسی سوچو کہ یہوواہ خدا ایس کائنات دی سب توں طاقت‌ور ہستی اے تے اوہ سارے جہان دا خالق اے تے فیر شیطان ایس دُنیا دا حکمران کیویں ہو سکدا اے؟ (‏مکاشفہ 4:‏11‏)‏ ایہہ سچ اے کہ یہوواہ کائنات دی سب توں طاقت‌ور ہستی اے پر یسوع مسیح نے شیطان نُوں ایس دُنیا دا حاکم کہیا سی۔ (‏یوحنا 12:‏31؛‏ 14:‏30؛‏ 16:‏11‏)‏ پولس رسول نے لکھیا کہ شیطان اِبلیس ایس دُنیا دا خدا اے۔ (‏2-‏کُرنتھیوں 4:‏3، 4‏)‏ فیر یوحنا رسول نے وی لکھیا کہ ساری دُنیا شیطان دے قبضے وچ اے۔—‏1-‏یوحنا 5:‏19‏۔‏

شیطان دی دُنیا نُوں ختم کر دِتا جائے گا

13.‏ سانوں اِک نوِیں دُنیا دی لوڑ کیوں اے؟‏

¹³ دُنیا دے حالات بھیڑے توں بھیڑے ہوندے جا رہے نیں۔ جنگاں، دھوکے‌بازی، نفرت تے ظلم بوہت عام ہو گئے نیں۔ انسان بھانویں جِنّی وی کوشش کر لین، اوہ ایہہ مسئلے حل نئیں کر سکدے۔ پر خدا کر سکدا اے۔ اوہ بوہت چھیتی ہرمجِدّون دی جنگ دے ذریعے بُری دُنیا نُوں ختم کرکے اِک نوِیں دُنیا قائم کرے گا۔ ایس دُنیا چ نیکی دا راج ہوئے گا۔—‏مکاشفہ 16:‏14-‏16‏؛ کتاب دے آخر چ نکتہ نمبر 10 نُوں ویکھو۔‏

14.‏ (‏الف)‏ خدا نے کِنہوں اپنی بادشاہی دا بادشاہ بنایا اے؟ (‏ب)‏ پاک کلام چ یسوع مسیح دے بارے کیہہ دَسیا گیا اے؟‏

¹⁴ یہوواہ خدا نے یسوع مسیح نُوں اپنی بادشاہی دا بادشاہ بنایا اے۔ خدا دے کلام چ کئی ہزار سال پہلے دَسیا گیا سی کہ یسوع مسیح سلامتی دے شاہزادے ہون گے تے اوہناں دی بادشاہی کدی ختم نئیں ہووے گی۔ (‏یسعیاہ 9:‏6، 7)‏ یسوع مسیح نے اپنے شاگرداں نُوں سکھایا کہ اوہ ایہہ دُعا کریا کرن کہ ایہہ بادشاہی آئے۔ اوہناں نے سکھایا کہ اوہ ایہدے لئی اِنج دُعا کریا کرن کہ تیری بادشاہی آئے۔ تیری مرضی جیویں اسمان تے ہو رہی اے اونویں ای زمین تے وی ہووے۔ (‏متی 6:‏10‏)‏ باب نمبر 8 وچ اَسی سکھاں گے کہ خدا دی بادشاہی انساناں دِیاں حکومتاں نُوں ختم کرکے ساری زمین تے حکمرانی کرے گی۔ ‏(‏دانی‌ایل 2:‏44 نُوں پڑھو۔)‏ فیر خدا دی بادشاہی زمین نُوں عدن دے باغ وانگوں سوہنا بنا دَوے گی۔—‏کتاب دے آخر چ نکتہ نمبر 11 نُوں ویکھو۔‏

نوِیں دُنیا آؤن والی اے

15.‏ نوِیں زمین کِنہاں نُوں کہیا گیا اے؟‏

¹⁵ پاک کلام چ لکھیا اے کہ اَسی نویں اسمان تے نوِیں زمین دا انتظار کر رہے آں جِتھے نیکی دا راج ہووے گا۔ (‏2-‏پطرس 3:‏13؛‏ یسعیاہ 65:‏17)‏ پاک کلام چ لفظ زمین کدی کدار لوکاں لئی وی استمال ہویا اے۔ (‏اِستثنا 32:‏1)‏ ایس لئی نوِیں زمین اوہناں لوکاں نُوں کہیا گیا اے جیہڑے خدا دا حکم من دے نیں تے جنہاں توں خدا خوش اے۔‏

16.‏ (‏الف)‏ نوِیں دُنیا چ جان والے لوکاں نُوں کیہہ اِنعام ملے گا؟ (‏ب)‏ ہمیشاں دی زندگی پاؤن لئی سانوں کیہہ کرنا پوے گا؟‏

¹⁶ یسوع مسیح نے وعدہ کیتا سی کہ نوِیں دُنیا چ جان والے لوکاں نُوں ہمیشاں دی زندگی ملے گی۔ ‏(‏مرقس 10:‏30‏)‏ پر ایہہ زندگی پاؤن لئی سانوں کیہہ کرنا پوے گا؟ ایس سوال دا جواب جانن لئی یوحنا 3:‏16 تے یوحنا 17:‏3 نُوں پڑھو۔‏ پر نوِیں دُنیا چ زندگی کیہو جہی ہوئے گی؟ آؤ پاک کلام چوں ایہدی اِک جھلک ویکھئے۔‏

17، 18.‏ اَسی کیویں جاننے آں کہ نوِیں دُنیا چ ہر پاسے امن ہووے گا تے کسے نُوں کوئی خطرہ نئیں ہووے گا؟‏

¹⁷ بُرائی، جنگ تے ظلم نُوں مٹا دِتا جائے گا۔‏ زمین توں بدکار لوکاں دا صفایا کر دِتا جائے گا۔ (‏زبور 37:‏10، 11)‏ خدا جنگاں نُوں بالکل ختم کر دَوے گا۔ (‏زبور 46:‏9؛ یسعیاہ 2:‏4)‏ زمین تے صرف اوہی لوک رہن گے جیہڑے خدا نُوں پیار کردے تے اوہدے حکماں تے چلدے نیں۔ ہر پاسے امن تے سکون ہووے گا۔—‏زبور 72:‏7۔‏

¹⁸ یہوواہ خدا دے بندیاں نُوں کوئی خطرہ نئیں ہوئے گا۔‏ جدوں تک بنی‌اِسرائیل خدا دے حکماں تے چلدے رہے، اوہ خطریاں توں بچے رہے کیونکہ خدا نے اوہناں دی حفاظت کیتی۔ (‏احبار 25:‏18، 19)‏ نوِیں دُنیا چ سانوں کوئی خطرہ نئیں ہوئے گا۔ اَسی ہمیشاں خوش تے سلامت رہواں گے۔‏‏—‏یسعیاہ 32:‏18؛ میکاہ 4:‏4 نُوں پڑھو۔‏

19.‏ سانوں ایہہ یقین کیوں اے کہ نوِیں دُنیا چ کھان پِین دی کوئی تھوڑ نئیں ہووے گی؟‏

¹⁹ کھان پِین دی کوئی تھوڑ نئیں ہوئے گی۔‏ پاک کلام چ دَسیا گیا اے کہ زمین تے پہاڑاں دِیاں چوٹیاں اُتے بوہت سارا اناج اُگے گا۔ (‏زبور 72:‏16)‏ یہوواہ ساڈا خدا سانوں برکت دَوے گا تے زمین اپنی پیداوار دَوے گی۔—‏زبور 67:‏6۔‏

20.‏ سانوں کیویں پتہ اے کہ زمین عدن دے باغ وانگوں سوہنی بن جائے گی؟‏

²⁰ ساری زمین خوب‌صورت بن جائے گی۔‏ سارے لوکاں کول خوب‌صورت گھر تے باغ ہون گے۔ ‏(‏یسعیاہ 65:‏21-‏24؛‏ مکاشفہ 11:‏18 نُوں پڑھو۔)‏ زمین عدن دے باغ وانگوں سوہنی بن جائے گی۔ یہوواہ خدا ساڈی ہر لوڑ نُوں پورا کرے گا۔ اوہدے کلام چ لکھیا اے کہ اوہ اپنی مٹھی کھولدا اے تے ہر جان‌دار دی خواہش پوری کردا اے۔—‏زبور 145:‏16۔‏

21.‏ اَسی کیویں جاننے آں کہ نوِیں دُنیا چ انساناں تے جانوراں نُوں اِک دُوجے توں کوئی خطرہ نئیں ہوئے گا؟‏

²¹ انساناں تے جانوراں نُوں اِک دُوجے توں کوئی خطرہ نئیں ہوئے گا۔‏ جانور انساناں نُوں نقصان نئیں پونچاؤن گے۔ چھوٹے بچیاں نُوں وی اوہناں جانوراں توں کوئی خطرہ نئیں ہوئے گا جیہڑے اَج بوہت خطرناک نیں۔‏‏—‏یسعیاہ 11:‏6-‏9؛ 65:‏25 نُوں پڑھو۔‏

22.‏ یسوع مسیح بیماراں لئی کیہہ کرن گے؟‏

²² کوئی وی بیمار نئیں ہوئے گا۔‏ جدوں یسوع مسیح زمین تے سن تے اوہناں نے بوہت سارے بیماراں نُوں شفا دِتی۔ (‏متی 9:‏35؛‏ مرقس 1:‏40-‏42؛‏ یوحنا 5:‏5-‏9‏)‏ پر نوِیں دُنیا چ اوہ ہر طرحاں دی بیماری نُوں جڑوں ختم کر دین گے۔ فیر کوئی وی انسان ایہہ نئیں کہوے گا کہ مَیں بیمار آں۔—‏یسعیاہ 33:‏24؛ 35:‏5، 6۔‏

23.‏ خدا نے مُردیاں دے بارے کیہہ وعدہ کیتا اے؟‏

²³ مُردیاں نُوں زندہ کر دِتا جائے گا۔‏ خدا نے وعدہ کیتا اے کہ اوہ اوہناں لوکاں نُوں زندہ کرے گا جیہڑے مر گئے نیں۔ پاک کلام چ لکھیا اے کہ خدا نیک تے بُرے دونویں طرحاں دے لوکاں نُوں زندہ کرے گا۔‏‏—‏یوحنا 5:‏28، 29 نُوں پڑھو؛‏ اعمال 24:‏15‏۔‏

24.‏ تُسی عدن ورگی سوہنی زمین تے رہن بارے کیہہ محسوس کردے او؟‏

²⁴ ہُن اَسی ایہہ فیصلہ کرنا اے کہ اَسی یہوواہ خدا دے بارے سکھاں گے تے اوہدی خدمت کراں گے یاں فیر اپنی من‌مانی کراں گے۔ جے اَسی خدا دی خدمت کراں گے تے ساڈا مستقبل بوہت ودھیا ہووے گا۔ اِک واری اِک بندے نے یسوع نُوں کہیا کہ میرے مرن توں بعد تُسی مینوں یاد رکھنا۔ یسوع نے اوہدے نال وعدہ کیتا کہ تُوں میرے نال فردوس چ (‏یعنی عدن ورگی سوہنی زمین تے)‏ ہوویں گا‏۔ (‏لُوقا 23:‏43‏)‏ آؤ، یسوع مسیح دے بارے ہور سکھنے آں تے ویکھنے آں کہ اوہناں دے ذریعے خدا دے شان‌دار وعدے کیویں پورے ہون گے۔‏