ساڈے لئی چنگا اے کہ اَسی بھین بھراواں دے نیڑے جائیے

1، 2.‏ یہوواہ دی نظر چ کیہڑی گل اہم اے تے اوہ ساڈے کولوں کیہہ چاہندا اے؟‏

یہوواہ دی نظر چ کجھ گلاں بوہت اہم نیں۔ ایہناں وچوں اِک گل ایہہ وے کہ اَسی دُوجیاں نال کیویں پیش آنے آں۔ یسوع نے سانوں سکھایا اے کہ سانوں اپنے گوانڈھی نال اُنج ای پیار کرنا چاہی دا اے جیویں اَسی اپنے آپ نال کرنے آں۔ (‏متی 22:‏37-‏39‏)‏ ساڈے گوانڈھیاں چ اوہ لوک وی شامل نیں جیہڑے ساڈے ہم‌ایمان نئیں نیں۔ جدوں اَسی ایہو جہے لوکاں لئی وی پیار وکھانے آں تے اَسی یہوواہ دی مثال تے عمل کر رہے ہنے آں کیونکہ ”‏اوہ اپنا سورج چنگے تے بھیڑے دونواں تے چمکاندا اے تے نیک تے بدکار دونواں تے مینہ پاندا اے۔“‏—‏متی 5:‏45‏۔‏

² ایہدے چ کوئی شک نئیں کہ یہوواہ سارے انساناں نال پیار کردا اے۔ اوہ خاص طور تے اوہناں لوکاں نال پیار کردا اے جیہڑے اوہدے حکماں تے عمل کردے نیں۔ (‏یوحنا 14:‏21‏)‏ اوہ چاہندا اے کہ اَسی وی اوہدے وانگوں بنئے۔ ایس لئی اوہ سانوں ہلاشیری دیندا اے کہ اَسی وی اپنے ہم‌ایماناں نال ‏”‏دل دِیاں گہرائیاں توں محبت“‏ کرئیے تے اوہناں نال پیار کرئیے۔ (‏1-‏پطرس 4:‏8؛‏ رومیوں 12:‏10‏)‏ ایہہ ایہو جہی محبت اے جیہڑی اَسی اپنے کسے رشتے‌دار یاں قریبی دوست نال کرنے آں۔‏

3.‏ سانوں محبت بارے کیہڑی گل یاد رکھنی چاہی دی اے؟‏

³ جیس طرحاں اَسی اپنے باغ چ لگے پودیاں دا خیال رکھنے آں تاکہ اوہ ودھ سکن ایسے طرحاں سانوں ایس گل دا وی خیال رکھنا چاہی دا اے کہ اَسی اپنے دل چ اپنے بھین بھراواں لئی محبت نُوں ودھاندے رہیے۔ پولُس نے ایہدے بارے ایہہ نصیحت کیتی:‏ اِک دُوجے نال بھین بھراواں وانگوں پیار کردے رہوو۔ (‏عبرانیوں 13:‏1‏)‏ یہوواہ چاہندا اے کہ اَسی بھین بھراواں لئی اپنی محبت نُوں ہور ودھائیے۔ ایس مضمون چ اَسی ویکھاں گے کہ سانوں اپنے ہم‌ایماناں دے ہور نیڑے کیوں ہونا چاہی دا اے تے اَسی اِنج کیویں کر سکنے آں۔‏

سانوں اِک دُوجے دے ہور نیڑے کیوں ہونا چاہی دا اے؟‏

4.‏ زبور 133:‏1 دے مطابق اَسی کیہہ کر سکنے آں تاکہ اَسی اوس ایکے دی قدر کرئیے جیہڑا ساڈے چ پایا جاندا اے؟ (‏تصویراں نُوں وی ویکھو۔)‏

⁴ زبور 133:‏1 نُوں پڑھو۔‏ اَسی وی ایس زبور نُوں لکھن والے بندے وانگوں ایہہ مننے آں کہ یہوواہ نال محبت کرن والے لوکاں نال دوستی کرنا بڑی چنگی تے خوشی دی گل اے۔ پر جیویں اِک بندہ اوس ہرے بھرے درخت دی خوب‌صورتی نُوں نظرانداز کرن لگ پیندا اے جنہوں اوہ ہر روز ویکھدا اے اوسے طرحاں ہو سکدا اے کہ اَسی اوس ایکے دی خوب‌صورتی نُوں نظر انداز کرن لگ پئیے جیہڑا ساڈے چ پایا جاندا اے۔ اِنج ایس لئی ہو سکدا اے کیونکہ اَسی ہفتے چ کئی وار اپنے بھین بھراواں نُوں ملنے آں۔ تے فیر اَسی کیہہ کر سکنے آں تاکہ اَسی اپنے دل چ اپنے بھین بھراواں لئی محبت نُوں ودھاندے رہیے؟ جے اَسی وقت کڈھ کے ایس گل تے سوچ وچار کراں گے کہ ساڈا ہر بھین بھرا کلیسیا لئی تے ساڈے لئی کِنّاں خاص اے تے اَسی اوہدے لئی اپنی محبت نُوں ودھا سکاں گے۔‏

5.‏ جدوں لوک ویکھدے نیں کہ اَسی اِک دُوجے نال کِنّی محبت کرنے آں تے اوہناں تے کیہہ اثر ہوندا اے؟‏

⁵ جیہڑے لوک ساڈی عبادت تے پہلی وار آندے نیں، اوہناں وچوں کجھ لوک ایہہ ویکھ کے بڑے متاثر ہوندے نیں کہ اَسی اِک دُوجے نال کِنّی محبت کرنے آں۔ کدی کدار تے اوہ ایس محبت نُوں ویکھ کے ای سمجھ جاندے نیں کہ اوہناں نے یسوع دے سچے شاگرداں نُوں لبھ لیا اے۔ یسوع نے کہیا سی:‏ ”‏جے تواڈے چ پیار ہووے گا تے ایہدے توں ای ساریاں نُوں پتہ چلے گا کہ تُسی میرے شاگرد او۔“‏ (‏یوحنا 13:‏35‏)‏ ذرا چترا دی مثال تے غور کرو جیہڑی یونیورسٹی چ پڑھدی اے۔ اوہ یہوواہ دے گواہواں کولوں بائبل کورس کر رہی سی۔ جدوں اوہنوں بائبل کورس کران والی بھین نے کنونشن تے آن دی دعوت دِتی تے اوہ خوشی نال اوتھے جان لئی تیار ہو گئی۔ پہلے دن دی کنونشن تے جان توں بعد چترا نے اوس بھین نُوں کہیا:‏ ”‏میرے امی‌ابو نے مینوں کدی گلے نئیں لایا۔ پر ایس کنونشن تے مینوں اِکو ای دن 52 لوک گلے ملے۔ یہوواہ نے اپنے خاندان دے ذریعے مینوں اپنی محبت دا احساس دَوایا اے۔ مَیں وی اوہدے خاندان دا حصہ بننا چاہنی آں۔“‏ چترا یہوواہ دی خدمت چ اَگے ودھدی رہی تے 2024 چ اوہنے بپتسمہ لے لیا۔ واقعی، جدوں لوک ساڈے چنگے کماں نُوں ویکھدے نیں جنہاں چ بھین بھراواں لئی محبت وکھانا وی شامل اے تے اکثر اوہناں دے دل چ وی یہوواہ دی عبادت کرن دی خواہش پیدا ہوندی اے۔—‏متی 5:‏16‏۔‏

6.‏ بھین بھراواں دے نیڑے رہن نال سانوں کیہہ فائدہ ہوندا اے؟‏

⁶ اپنے بھین بھراواں دے نیڑے رہن نال اَسی محفوظ رہنے آں۔ پولُس نے اپنے ہم‌ایماناں نُوں کہیا:‏ ہر دن اِک دُوجے دی حوصلہ‌افزائی کردے رہوو تاکہ تواڈے وچوں کسے دا دل گُناہ دی دھوکھا دین والی طاقت توں سخت نہ ہو جائے۔ (‏عبرانیوں 3:‏13‏)‏ کدی کدار جدوں اَسی اینے بے‌حوصلہ ہو جانے آں کہ ساڈے قدم سدھی راہ توں بھٹکن لگ پیندے نیں تے یہوواہ ساڈے کسے بھین بھرا دے دل چ ایہہ گل پا سکدا اے کہ اوہ ساڈی مدد کرے۔ (‏زبور 73:‏2، 17، 23)‏ ایس مدد تے حوصلہ‌افزائی توں سانوں واقعی بڑا فائدہ ہوندا اے۔‏

7.‏ محبت تے ایکے دا آپس چ کیہہ تعلق اے؟ (‏کُلسّیوں 3:‏13، 14‏)‏

⁷ اَسی ایہو جہے لوکاں چ شامل آں جیہڑے اِک دُوجے لئی محبت وکھان دی پوری کوشش کردے نیں۔ (‏1-‏یوحنا 4:‏11‏)‏ ایس وجہ توں سانوں بڑیاں برکتاں مِلیاں نیں۔ مثال لئی، جے سانوں اِک دُوجے نال شکایت ہوندی اے تے محبت دی وجہ توں اَسی ”‏اِک دُوجے دی برداشت“‏ کرنے آں۔ ‏(‏کُلسّیوں 3:‏13، 14 نُوں پڑھو؛‏ اِفسیوں 4:‏2-‏6‏)‏ ایس طرحاں بھین بھراواں نال ساڈا ایکا قائم رہندا اے۔ ایہدے علاوہ، عبادتاں دا ماحول وی بڑا چنگا رہندا اے۔ ایہہ ماحول زمین تے کسے ہور گروپ یاں عبادت چ ویکھن نُوں نئیں مِلدا۔‏

اِک دُوجے دی عزت کرو

8.‏ یہوواہ ساڈی مدد کیویں کردا اے تاکہ ساڈا ایکا قائم رہوے؟‏

⁸ پوری دُنیا چ یہوواہ دے گواہواں دا ایکا کسے معجزے توں گھٹ نئیں اے۔ یہوواہ ساڈی مدد کردا اے کہ اَسی عیب‌دار ہون دے باوجود اپنا ایکا قائم رکھئے۔ (‏1-‏کُرنتھیوں 12:‏25‏)‏ بائبل چ لکھیا اے:‏ خدا نے توانوں سکھایا اے کہ اِک دُوجے نال پیار کرو۔ (‏1-‏تھسلُنیکیوں 4:‏9‏)‏ اصل چ یہوواہ اپنے کلام دے ذریعے سانوں دَسدا اے کہ سانوں اِک دُوجے دے ہور نیڑے جان لئی کیہہ کجھ کرن دی لوڑ اے۔ یہوواہ کولوں سکھن لئی ضروری اے کہ اَسی اوہدے کلام چ پائی جان والی تلیم دا گہرائی نال مطالعیا کرئیے تے سکھیاں ہوئیاں گلاں تے عمل کرئیے۔ (‏عبرانیوں 4:‏12؛‏ یعقوب 1:‏25‏)‏ یہوواہ دے گواہ اِنج ای کرن دی پوری کوشش کردے نیں۔‏

9.‏ اِک دُوجے دی عزت کرن بارے اَسی رومیوں 12:‏9-‏13 توں کیہہ سکھنے آں؟‏

⁹ کلام دے ذریعے اَسی اِک دُوجے دے ہور نیڑے کیویں جا سکنے آں؟ ویکھو کہ پولُس نے ایہدے بارے رومیوں 12:‏9-‏13 چ کیہہ کہیا؟ ‏(‏ایہناں ایتاں نُوں پڑھو۔)‏ غور کرو کہ ایہناں ایتاں چ اوہنے کہیا کہ اِک دُوجے دی عزت کرن چ پہل کرو۔ ایہدا کیہہ مطلب اے؟ ایہدا مطلب اے کہ سانوں فرق فرق طریقیاں نال اپنے بھین بھراواں لئی محبت وکھان چ پہل کرنی چاہی دی اے جیویں کہ اوہناں نُوں معاف کرنا تے اوہناں لئی مہمان‌نوازی تے مہربانی وکھانا۔ (‏اِفسیوں 4:‏32‏)‏ سانوں ایس گل دا اِنتظار نئیں کرنا چاہی دا کہ بھین بھرا ساڈے نیڑے آن سگوں سانوں آپ اوہناں دے نیڑے جان دی کوشش کرنی چاہی دی اے۔ اِنج اَسی ویکھ سکھاں گے کہ یسوع دی ایہہ گل بالکل سچی اے:‏ ”‏دوجیاں کولوں کجھ لین دی بجائے اوہناں نُوں کجھ دے کے زیادہ خوشی مِلدی اے۔“‏—‏اعمال 20:‏35‏۔‏

10.‏ اَسی دُوجیاں لئی عزت وکھان چ محنتی کیویں بن سکنے آں؟ (‏تصویر نُوں وی ویکھو۔)‏

¹⁰ ایہہ بڑی دلچسپ گل اے کہ جدوں پولُس نے کہیا کہ اَسی اِک دُوجے دی عزت کرن چ پہل کرئیے تے ایہدے فوراً بعد اوہنے سانوں ایہہ نصیحت کیتی کہ اَسی محنتی ہوئیے تے سُستی نہ کرئیے۔ جیہڑا بندہ محنتی ہوندا اے، اوہ پوری وا لا کے تے لگن نال کم کردا اے۔ اَمثال 3:‏27، 28 چ سانوں ایہہ ہلاشیری دِتی گئی اے:‏ جے تواڈے وَس چ وے تے اوہناں لوکاں دا بھلا کرن توں پچھے نہ ہٹو جنہاں دا بھلا کرنا چاہی دا اے۔ جدوں اَسی ویکھنے آں کہ کسے نُوں مدد دی لوڑ اے تے سانوں فوراً اوہدی مدد کرنی چاہی دی اے۔ سانوں اِنج کرن چ سُستی نئیں کرنی چاہی دی تے نہ ای ایہہ سوچنا چاہی دا اے کہ کوئی ہور اوہناں دی مدد کر دَوے گا۔—‏1-‏یوحنا 3:‏17، 18‏۔‏

11.‏ ہور کیہڑے طریقے نال اَسی بھین بھراواں دے نیڑے جا سکنے آں؟‏

¹¹ اَسی ہور کیہڑے طریقیاں نال دوجیاں لئی عزت وکھا سکنے آں؟ اِنج کرن دا اِک طریقہ ایہہ وے کہ جدوں کوئی ساڈا دل دُکھاندا اے تے جِنّی چھیتی ہو سکے، اَسی اوہنوں معاف کر دَئیے۔ اِفسیوں 4:‏26 چ لکھیا اے:‏ ”‏سورج ڈُبن توں پہلاں اپنا غصہ تُھک دَوو۔“‏ اِنج کرنا ضروری کیوں اے؟ 27 ایت چ دَسیا گیا اے کہ اِنج کرن نال اَسی ”‏اِبلیس نُوں موقع“‏ نئیں دَواں گے۔ یہوواہ نے اپنے کلام چ سانوں وار وار ایہہ کہیا اے کہ اَسی اِک دُوجے نُوں معاف کرئیے۔ کُلسّیوں 3:‏13 توں سانوں ایہہ ہلاشیری مِلدی اے کہ اَسی ”‏اِک دُوجے نُوں دِلوں معاف“‏ کردے رہیے۔ ایہہ اپنے بھین بھراواں دے ہور نیڑے جان دا اِک بہترین طریقہ اے۔ اِنج کرن نال اَسی ”‏اپنا ایکا مضبوط رکھن دی پوری کوشش“‏ کراں گے جیہڑا سانوں پاک روح دے ذریعے مِلدا اے۔ (‏اِفسیوں 4:‏3‏)‏ جے سادے لفظاں چ کہیے تے معاف کرن نال یہوواہ دے بندیاں وچ صلح تے ایکا ودھدا اے۔‏

12.‏ دوجیاں نُوں معاف کرن چ یہوواہ ساڈی مدد کیویں کردا اے؟‏

¹² ایہہ سچ اے کہ کدی کدار سانوں اوہناں لوکاں نُوں معاف کرنا مشکل لگدا اے جیہڑے ساڈا دل دُکھاندے نیں۔ پر یہوواہ دی پاک روح دی مدد نال اَسی دُوجیاں نُوں معاف کر سکنے آں۔ پاک کلام چ اِک دُوجے نُوں معاف کرن تے محنتی ہون دی نصیحت کرن توں بعد ایہہ کہیا گیا اے کہ اَسی پاک روح نال پخ دے رہیے۔ یہوواہ دی پاک روح ساڈے اندر صحی کم کرن دا جوش تے جذبہ پیدا کردی اے۔ (‏رومیوں 12:‏11‏)‏ ایہدا مطلب اے کہ یہوواہ دی پاک روح اِک دُوجے نال پیار کرن تے اِک دُوجے نُوں دِلوں معاف کرن چ وی ساڈی مدد کردی اے۔ ایس لئی سانوں پورے دل نال یہوواہ کولوں اوہدی پاک روح لئی دُعا کرنی چاہی دی اے۔—‏لُوقا 11:‏13‏۔‏

تواڈے چ اختلاف نئیں ہونا چاہی دا

13.‏ کیہڑیاں گلاں دی وجہ توں ساڈے چ اختلاف پیدا ہو سکدا اے؟‏

¹³ ساڈی کلیسیا چ ہر طرحاں دے لوک نیں۔ ساڈے ساریاں دا رہن‌سہن اِک دُوجے توں فرق اے۔ (‏1-‏تیمُتھیُس 2:‏3، 4‏)‏ ایس لئی ساڈے وچوں ہر اِک فرق فرق معاملیاں بارے فرق سوچ رکھدا اے جیویں کہ کپڑے، سجن سنورن، علاج تے تفریح دے معاملے چ۔ (‏رومیوں 14:‏4؛‏ 1-‏کُرنتھیوں 1:‏10‏)‏ یہوواہ نے سانوں سکھایا اے کہ اَسی اِک دُوجے نال پیار کرئیے ایس لئی سانوں خبردار رہنا چاہی دا اے کہ اَسی اپنی پسند تے رائے دوجیاں تے نہ تھوپئے تے نہ ای ایہہ سوچئے کہ ساڈی پسند تے ساڈی رائے دُوجیاں توں بہتر اے۔—‏فِلپّیوں 2:‏3‏۔‏

14.‏ سانوں ہمیشاں کیہہ کرن دی کوشش کرنی چاہی دی اے تے کیوں؟‏

¹⁴ اَسی دوجیاں دا حوصلہ ودھان تے اوہناں نُوں تازہ‌دم کرن نال کلیسیا چ تفرقے پیدا ہون توں روک سکنے آں۔ (‏1-‏تھسلُنیکیوں 5:‏11‏)‏ پچھلے کجھ عرصے دے دوران ایہو جہے لوک کلیسیا چ واپس آ گئے نیں جنہاں نے یہوواہ دی خدمت کرنی چھڈ دِتی سی یاں جنہاں نُوں کلیسیا چوں کڈھ دِتا گیا سی۔ اَسی دِلوں اوہناں نُوں جی آیاں نُوں کہنے آں۔ (‏2-‏کُرنتھیوں 2:‏8‏)‏ اِک بھین دی گل تے غور کرو جیہڑی تقریباً 10 سال توں یہوواہ توں دُور سی۔ پر فیر اوہ کلیسیا چ واپس آ گئی۔اوہ کہندی اے:‏ ”‏ساریاں نے مسکرا کے تے میرے نال ہتھ ملا کے مینوں جی آیاں نُوں کہیا۔“‏ (‏اعمال 3:‏19‏)‏ جدوں بھین بھراواں نے ایہناں چھوٹے چھوٹے طریقیاں نال اوس بھین لئی محبت وکھائی تے ایہدا اوہدے تے کیہہ اثر ہویا؟ اوہ کہندی اے:‏ ”‏مینوں بالکل اِنج لگیا جیویں یہوواہ چاہندا اے کہ مَیں فیر توں خوش رہواں۔“‏ جدوں اَسی دوجیاں دا حوصلہ ودھانے آں تے اِک لحاظ نال یسوع ساڈے ذریعے اوہناں لوکاں نُوں تازہ‌دم کردا اے جیہڑے ”‏بھار تھلے دبے“‏ نیں۔—‏متی 11:‏28، 29‏۔‏

15.‏ اَسی ہور کیہڑے طریقے نال اپنے ایکے نُوں مضبوط کر سکنے آں؟ (‏تصویر نُوں وی ویکھو۔)‏

¹⁵ اَسی اپنیاں گلاں نال وی اپنے ایکے نوں ودھا سکنے آں۔ ایوب 12:‏11 چ لکھیا اے:‏ جیویں کن گلاں نُوں پرکھ لیندے نیں اونویں ای زبان کھانے دا سواد چکھ دی اے۔ جیویں اِک چنگا کھانا پکان والا بندہ دوجیاں نُوں کھانا پیش کرن توں پہلاں ہمیشاں ایہہ ویکھدا اے کہ کھانا مزےدار ہے کہ نئیں اوسے طرحاں سانوں وی کوئی گل کہن توں پہلاں ایہہ سوچنا چاہی دا اے کہ کیہہ ایہہ گل کرنا صحی ہوئے گا یاں نئیں۔ (‏زبور 141:‏3)‏ ساڈا مقصد ایہہ ہونا چاہی دا اے کہ ساڈیاں گلاں توں دوجیاں نُوں تازگی تے حوصلہ ملے تے سنن والیاں نُوں ”‏فائدہ ہووے۔“‏—‏اِفسیوں 4:‏29‏۔‏

16.‏ خاص طور تے کنہاں نُوں ایہہ خیال رکھنا چاہی دا اے کہ اوہناں دِیاں گلاں توں دوجیاں دا حوصلہ ودھے؟‏

¹⁶ شوہراں تے ماں پیو نُوں خاص طور تے ایس گل دا دھیان رکھنا چاہی دا اے کہ اوہ ایہو جہی گل بات کرن جدے توں دُوجیاں دا حوصلہ ودھے۔ (‏کُلسّیوں 3:‏19،‏ 21؛‏ طِطُس 2:‏4‏)‏ کلیسیا دے بزرگاں نُوں وی یہوواہ دِیاں بھیڈاں دی دیکھ‌بھال کردے ہوئے اوہناں نال ایس طریقے نال گل بات کرنی چاہی دی اے جدے توں اوہناں دا حوصلہ ودھے تے اوہناں نُوں تازگی محسوس ہوئے۔ (‏یسعیاہ 32:‏1، 2؛‏ گلتیوں 6:‏1‏)‏ بائبل چ لکھی ایس گل نُوں ہمیشاں یاد رکھو:‏ صحی ویلے تے کہی گل بڑی ودھیا ہوندی اے۔—‏اَمثال 15:‏23۔‏

‏”‏سچے دل نال کجھ کر کے“‏ اپنے پیار دا ثبوت دَوو

17.‏ اَسی دِلوں اپنے بھین بھراواں لئی محبت کیویں ظاہر کر سکنے آں؟‏

¹⁷ یوحنا رسول نے سانوں ہلاشیری دِتی کہ اَسی ”‏بس گلی‌باتی نئیں سگوں سچے دل نال کجھ کر کے اپنے پیار دا ثبوت“‏ دَئیے۔ (‏1-‏یوحنا 3:‏18‏)‏ اَسی دِلوں اپنے بھین بھراواں نال محبت کرنا چاہنے آں۔ اَسی اِنج کیویں کر سکنے آں؟ جِنّاں زیادہ اَسی اپنے ہم‌ایماناں نال وقت گزاراں گے اوناں ای زیادہ اَسی اوہناں دے نیڑے ہو جاواں گے تے ساڈے دل چ اوہناں لئی محبت ودھ جائے گی۔ ایہو جہے موقعے لبھو جنہاں چ تُسی اپنے بھین بھراواں نال وقت گزار سکدے او، جیویں کہ عبادتاں تے مُنادی دے دوران۔ ایہدے علاوہ، اوہناں نال دُوجے موقعیاں تے وی مِلن لئی وقت کڈھو۔ اِنج کرن نال ایہہ گل ثابت ہوئے گی کہ یہوواہ نے سانوں ایہہ سکھایا اے کہ اَسی اِک دُوجے نال پیار کرئیے۔ (‏1-‏تھسلُنیکیوں 4:‏9‏)‏ ایہدے علاوہ اَسی ایس گل دا وی تجربہ کر سکاں گے:‏ ایہہ کِنّی چنگی تے خوشی دی گل اے کہ بھرا مل جُل کے رہن۔—‏زبور 133:‏1۔‏