یہوواہ دے گواہ یسوع مسیح دی موت دی یاد گیری دُوجیاں توں فرق طریقے نال کیوں مناندے نیں؟‏

اَسی مسیح دی موت دی یادگیری بالکل اُنج ای منانے آں جیویں بائبل چ ایہنوں منان دا حکم دِتا گیا اے۔ مسیح دی موت دی یادگیری نُوں”‏ عشاِئے‌ربانی“‏ یاں یسوع مسیح دا آخری کھانا وی کہیا جاندا اے۔ (‏1-‏کُرنتھیوں 11:‏20‏؛‏کنگ جیمز ورشن‏)‏ بوہت سارے دُوجے فرقے مسیح دی موت دی یادگیری جیہڑے طریقیاں نال مناندے نیں اوہ بائبل دے مطابق نئیں۔‏

مسیح دی موت دی یادگیری منان دا مقصد

یسوع مسیح دی موت دی یادگیری منا کے اَسی یسوع لئی تے اوہدی اوس قربانی لئی شکرگزاری وکھانے آں جیہڑی اوہنے ساڈے لئی دِتی اے۔ (‏متی 20:‏28؛‏ 1-‏کُرنتھیوں 11:‏24‏)‏ ایہہ عبادت نہ تے سیکرامنٹ اے تے نہ ای ایہنوں منان نال سانوں گُناہواں توں معافی مِلدی اے۔‏a پاک کلام چ دَسیا گیا اے کہ گُناہواں توں معافی کسے مذہبی رسم نُوں منان توں نئیں مِلدی سگوں صرف یسوع مسیح تے ایمان لیان توں مِلدی اے۔—‏رومیوں 3 :‏25؛‏ 1-‏یوحنا 2:‏1، 2‏۔‏

مسیح دی موت دی یادگیری سال چ کِنّی وار منانی چاہی دی اے؟‏

یسوع مسیح نے شاگرداں نُوں اپنی یادگیری منان دا حکم تے دِتا سی پر اوہنے ایہہ نئیں دَسیا سی کہ ایہہ سال چ کِنّی وار منانی چاہی دی اے۔ (‏لُوقا 22:‏19‏)‏ کجھ لوک مسیح دی موت دی یادگیری نُوں ہر مہینے مناندے نیں، جد کہ دُوجے ایہنوں ہر ہفتے، ہر روز یاں فیر دن چ کئی وار مناندے نیں۔ کجھ لوک تے جدوں اوہناں دا دل چاہوے اوہدوں مناندے نیں۔‏b ایس گل نُوں سمجھن لئی آؤ کجھ گلاں تے غور کریئے۔‏

جیس دن یسوع مسیح نے شاگرداں نُوں یادگیری منان دا حکم دِتا اوہ یہودیاں دی عیدِفسح دا دن سی تے اوسے دن بعد چ یسوع فوت ہو گیا۔ (‏متی 26:‏1، 2‏)‏ ایہہ کوئی اِتفاق نئیں سی۔ پاک کلام چ دَسیا گیا اے کہ یسوع مسیح دی قربانی اوس میمنے دی قربانی وانگوں اے جنہوں عیدِفسح تے قربان کیتا جاندا سی۔ (‏1-‏کُرنتھیوں 5:‏7، 8‏)‏ عیدِفسح سال چ اِک وار منائی جاندی سی۔ (‏خروج 12:‏1-‏6؛ احبار 23:‏5)‏ ایسے طرحاں یسوع مسیح دے شاگرد اوہدی موت دی یادگیری نُوں سال چ اِک وار ای مناندے سن۔ تے یہوواہ دے گواہ وی پاک کلام دی ہدیت دے مطابق اِنج ای کردے نیں۔‏

تریخ تے وقت

جیس موقعے تے یسوع مسیح نے یادگیری منان دا حکم دِتا اوہدے توں اَسی نہ صرف ایہہ سمجھ جا نیں آں کہ سانوں یادگیری عبادت سال چ کِنّی واری منانی چاہی دی اے سگوں سانوں ایہہ وی پتہ چلدا اے کہ ایہنوں کیس تریخ تے کیہڑے وقت تے منانا چاہی دا اے۔ یسوع نے اپنی یادگیری منان دا حکم33 عیسوی چ نیسان دے مہینے دی 14 تریخ نُوں سورج ڈُبن دے بعد دِتا سی۔ (‏متی 26:‏18-‏20،‏ 26‏)‏ ایس لئی یسوع دے شاگرد ہر سال ایس تریخ تے ایسے وقت تے اوہدی یادگیری مناندے سن تے اوہناں وانگوں اَج اَسی وی اِنج ای کر نے آں۔‏

جیس دن یسوع نے اپنی موت دی یادگیری منان دا حکم دِتا اوس دن جمعہ سی پر ہر سال 14 نیسان ہفتے دے کسے وی دن تے آ سکدی اے۔ ایہہ جانن لئی کہ 14 نیسان ساڈے کیلنڈر دے مطابق ہفتے دے کیس دن تے آئے گی اَسی اوہی طریقہ استمال کر نے آں جیہڑا یسوع دے زمانے چ استمال ہوندا سی۔ اَسی اوہ طریقہ استمال نئیں کردے جیہڑا اَج کل یہودی کیلنڈر بنان لئی استمال کیتا جاندا اے۔‏c

روٹی تے مے

یادگیری منان دا حکم دیندے ویلے یسوع نے اوہ بے‌خمیری روٹی تے مے استمال کیتی سی جیہڑی فسح دے کھانے چوں بچ گئی سی۔ (‏متی 26:‏26-‏28‏)‏ یسوع دی مثال تے عمل کردے ہوئیاں اَسی وی اوہدی موت دی یادگیری منان لئی بے‌خمیری روٹی تے خالص مے استمال کر نے آں۔اَسی نہ تے انگوراں دا رَس استمال کرنے آں تے نہ ای ایہو جہی مے جدے چ مصالحے یاں کوئی ہور شے ملائی گئی ہووے۔‏

کجھ فرقے ایس موقعے لئی جیہڑی روٹی استمال کردے نیں اوہدے چ خمیر ہوندا اے پر پاک کلام چ خمیر اکثر گُناہ تے ناپاکی وَل اشارہ کرن لئی استمال کیتا گیا اے۔ (‏لُوقا 12:‏1؛‏ 1-‏کُرنتھیوں 5:‏6-‏8؛‏ گلتیوں 5:‏7-‏9‏)‏ ایسے لئی یسوع دے کامل بدن وَل اشارہ کرن لئی صرف ایہو جہی روٹی استمال کیتی جا سکدی اے جدے چ نہ تے خمیر تے نہ ای کسے ہور شے دی ملاوٹ ہووے۔ (‏1-‏پطرس 2:‏22‏)‏ کجھ چرچ سمجھدے نیں کہ پاک کلام چ مے پین توں بالکل منع کیتا گیا اے۔ ایسے لئی اوہ عشاِئے‌ربانی لئی انگوراں دا رَس استمال کر دے نیں۔ پر ایہہ گل بائبل دے مطابق نئیں اے۔—‏1-‏تیمُتھیُس 5:‏23‏۔‏

روٹی تے مے یسوع دا حقیقی بدن تے خون نئیں

یادگیری عبادت چ استمال ہون والی بے‌خمیری روٹی تے مے یسوع مسیح دے بدن تے خون وَل اشارہ کردی اے۔ کجھ لوکاں دا خیال اے کہ معجزے دے ذریعے روٹی یسوع مسیح دا بدن تے مے اوہدا خون بن جاندی اے۔ پر ایہہ سچ نئیں اے۔ آؤ ویکھئے کہ پاک کلام چ ایہدے بارے کیہہ دَسیا گیا اے۔‏

• پاک کلام چ خون استمال کرن توں منع کیتا گیا اے، ایس لئی جے یسوع نے شاگرداں نُوں اپنا خون پین لئی کہیا ہوندا تے اصل چ اوہ خدا دے قانون نُوں توڑ رہیا ہوندا۔ (‏پیدائش 9:‏4؛‏ اعمال 15:‏28، 29‏)‏ ایہہ کدی نئیں ہو سکدا کہ یسوع دُوجیاں نُوں کوئی ایہو جیہا کم کرن لئی کہوے جیہڑا خدا دے حکماں دے خلاف اے۔ ایس لئی اَسی یقین رکھ سکنے آں کہ یسوع نے شاگرداں نُوں اپنا خون پین لئی بالکل نئیں کہیا ہوئے گا۔—‏یوحنا 8:‏28، 29‏۔‏

• یسوع مسیح نے کہیا سی کہ اوہدا خون بوہت سارے لوکاں لئی بہایا جائے گا یعنی اوہ چھیتی ای اپنی جان قربان کرے گا۔ جے اوہدے شاگرد واقعی اوہدا خون پی رہے ہوندے تے ایہدا مطلب ایہہ ہوندا کہ اوہدی قربانی ہو چُکی اے نہ کہ ہون والی اے۔—‏متی 26:‏28‏۔‏

• یسوع مسیح نے صرف اِک ای وار اپنی جان قربان کیتی۔ (‏عبرانیوں 9:‏25، 26‏)‏ جے یادگیری عبادت دے دوران روٹی تے مے واقعی یسوع دے بدن تے خون چ بدل جاندے نیں تے فیر ایہدا مطلب ایہہ ہویا کہ اوہدی قربانی وار وار ہوندی اے۔‏

• یسوع مسیح نے کہیا سی کہ میری یاد چ اِنج کریا کرو۔ اوہنے ایہہ نئیں سی کہیا کہ مینوں وار وار قربان کریا کرو۔—‏1-‏کُرنتھیوں 11:‏24‏۔‏

کجھ لوکاں دا خیال اے کہ روٹی تے مے یسوع دے بدن تے خون چ بدل جاندے نیں۔ اوہ ایس گل نُوں ثابت کرن لئی بائبل دِیاں کجھ ایتاں استمال کردے نیں۔ مثال لئی، کجھ بائبل ترجمیاں چ متی 26:‏28 دا ترجمہ اِنج کیتا گیا اے:‏ ایہہ میرا خون اے‏۔ کجھ عالماں دا خیال اے کہ یسوع دی ایس گل دا ترجمہ اِنج وی کیتا جا سکدا اے:‏ ایہدا مطلب میرا خون اے‏، یاں ایہہ میرے خون وَل اشارہ کردی اے‏۔ پر ایس ایت چ یسوع مسیح نے ایہہ گل علامتی معنیاں چ کیتی سی جیویں کہ اوہ اکثر کردا ہوندا سی۔—‏متی 13:‏34، 35‏۔‏

مسیح دی موت دی یادگیری تے کون روٹی تے مے چوں کھا تے پی سکدا اے؟‏

جدوں یہوواہ دے گواہ یسوع مسیح دی موت دی یادگیری مناندے نیں تے اوہناں وچوں صرف کجھ ای لوک روٹی تے مے چوں کھاندے تے پیندے نیں۔ ایہدی کیہہ وجہ اے؟‏

یسوع نے اپنا خون بہا کے اِک نواں عہد قائم کیتا۔ ایس عہد نے اوس عہد دی جگہ لے لئی جیہڑا خدا نے بنی‌اِسرائیل نال کیتا سی۔ (‏عبرانیوں 8:‏10-‏13‏)‏ جیہڑے لوک ایس نویں عہد چ شامل نیں صرف اوہی روٹی تے مے چوں کھا تے پی سکدے نیں۔ ایس نویں عہد چ سارے مسیحی شامل نئیں۔ صرف اوہی مسیحی شامل نیں جیہڑے خدا وَلّوں اسمان تے بلا‌ئے گئے نیں۔ (‏عبرانیوں 9:‏15؛‏ لُوقا 22:‏20‏)‏ ایہہ مسیحی اسمان تے یسوع مسیح نال حکمرانی کرن گے۔ بائبل چ دَسیا گیا اے کہ ایہناں دی کل تعداد 1 لکھ 44 ہزار اے۔—‏لُوقا 22:‏28-‏30؛‏ مکاشفہ 5:‏9، 10؛‏ 14:‏1،‏ 3‏۔‏

پاک کلام چ اوہناں مسیحیاں نُوں چھوٹا گلّہ کہیا گیا اے جیہڑے یسوع نال اسمان تے حکمرانی کرن گے۔ باقی مسیحی اوس وڈی بِھیڑ دا حصہ ہون گے جنہاں نُوں زمین تے ہمیشاں دی زندگی ملے گی۔ (‏لُوقا 12:‏32؛‏ مکاشفہ 7:‏9، 10‏)‏ ایس لئی جیہڑے مسیحی زمین تے ہمیشاں دی زندگی دی امید رکھدے نیں اوہ یادگیری دی عبادت چ روٹی تے مے چوں نئیں کھاندے پیندے پر اوہ ایہدے تے حاضر ہو کے یسوع مسیح دی قربانی لئی دلوں قدر ضرور ظاہر کردے نیں۔—‏1-‏یوحنا 2:‏2‏۔‏