‏”‏الفا تے اومیگا“‏کون اے یاں ایہہ کیہہ اے؟‏

پاک کلام دا جواب

‏”‏الفا تے اومیگا“‏ یہوواہ خدا وَل اشارہ کردا اے جیہڑا لامحدود قدرت دا مالک اے۔ پاک کلام چ ایہہ اِصطلا‌ح تِن وار ی استمال ہوئی اے۔—‏مکاشفہ 1:‏8؛‏ 21:‏6؛‏ 22:‏13‏۔‏a

خدا اپنے آپ نُوں ”‏الفا تے اومیگا“‏ کیوں کہندا اے؟‏

‏”‏الفا“‏ یونانی حروفِ تہجی (‏جیویں کہ ساڈی زبان چ ا، ب، پ ہوندی اے)‏ د ا پہلا حرف اے تے ”‏اومیگا“‏ اوہدا آخری حرف اے۔ بائبل دا اوہ حصہ جنہوں اَج کل نواں عہدنامہ کہیا جاندا اے یونانی زبان چ لکھیا گیا۔ ایہدے چ مکاشفہ دی کتاب وی شامل اے۔ یونانی حروفِ تہجی کیونکہ ایہناں حرفاں نال شروع تے ختم ہوندی اے ایس لئی ایہناں حرفاں توں ظاہر ہوندا اے کہ صرف یہوواہ ای شروع تے آخر اے۔ (‏مکاشفہ 21:‏6‏)‏ اوہ لامحدود قدرت دا مالک اے جیہڑا ا شروع توں اے تے ہمیشاں ہمیشاں تک رہوے گا۔ صرف اوہ ای اِک ایہو جہی ہستی اے جیہڑی ازل توں ابد تک اے۔—‏زبور 90:‏2۔‏

‏”‏اوّل تے آخر“‏ کدے وَل اشارہ کردا اے؟‏

پاک کلام چ ایہہ اِصطلا‌ح صرف یہوواہ خدا تے اوہدے پُتر یسوع مسیح لئی استمال ہوئی اے پر فرق فرق معنیاں چ۔ ذرا ایہناں مثالاں تے غور کرو:‏

• یسعیاہ 44:‏6 چ یہوواہ خدا نے آکھیا:‏ مَیں ای اوّل تے مَیں ای آخر آں تے میرے سوا کوئی خدا نئیں۔ ایس ایت چ یہوواہ خدا نے ایس گل تے زور دِتا اے کہ شروع توں اوہ ای سچا خدا اے تے اوہدے علاوہ ہور کوئی خدا نئیں۔ (‏اِستثنا 4:‏35، 39)‏ ایس لئی ایس ایت چ اِصطلا‌ح اوّل تے آخر دا اوہی مطلب اے جیہڑا الفا تے اومیگا دا اے۔‏

• ایہدے علاوہ مکاشفہ 1:‏17، 18 تے 2:‏8 چ وی اِصطلا‌ح اوّل [‏یونانی لفظ ”‏پروتوس“‏ نہ کہ الفا]‏تے آخر [‏یونانی لفظ ”‏ایسخاتوس“‏ نہ کہ اومیگا]‏ استمال ہوئی اے۔ ایہناں ایتاں دے سیاق‌وسباق توں پتہ چلدا اے کہ ایتھے اِصطلا‌ح ”‏اوّل تے آخر“‏ اوس بندے وَل اشارہ کردی اے جیہڑا مر گیا سی پر بعد چ اوہنوں زندہ کیتا گیا۔ ایس لئی ایہناں ایتاں چ ایہہ اِصطلا‌ح خدا لئی استمال نئیں ہوئی کیونکہ اوہ کدی مر نئیں سکدا۔ (‏حبقوق 1:‏12)‏b یسوع مسیح فوت ہویا سی تے اوہنوں مُردیاں چوں زندہ وی کیتا گیا سی۔ (‏اعمال 3:‏13-‏15‏)‏ یسوع اوہ پہلا انسان سی جنہوں زندہ کر کے اسمان تے غیرفانی زندگی دِتی گئی سی تے ہُن اوہ اوتھے ہمیشاں ہمیشاں تک زندہ رہوے گا۔ (‏مکاشفہ 1:‏18؛‏ کُلسّیوں 1:‏18‏)‏ نالے یسوع ای اوہ ہستی اے جیہڑی سارے مُردیاں نُوں زندہ کرے گی۔ (‏یوحنا 6:‏40،‏ 44‏)‏ ایہدے علاوہ یسوع ای اوہ آخری انسان سی جنہوں یہوواہ نے آپ زندہ کیتا سی۔ (‏اعمال 10:‏40‏)‏ اِنج یسوع مسیح بارے ایہہ کہنا بالکل صحی اے کہ اوہ ”‏اوّل تے آخر“‏ اے۔‏

کیہہ مکاشفہ 22:‏13 توں ایہہ ثابت ہوندا اے کہ یسوع مسیح ”‏الفا تے اومیگا“‏ اے؟‏

نئیں۔ مکاشفہ 22:‏13 توں صاف صاف پتہ نئیں چلدا کہ ایس ایت چ کون گل کر رہیا اے کیونکہ ایس پورے باب چ فرق فرق بندے گل کر رہے نیں۔ مکاشفہ دی کتاب دے ایس باب بارے گل کردے ہوئیاں پروفیسر وِلیم بارکلے نے لکھیا:‏ ”‏لگدا اے کہ ایس باب چ دَسیاں گئیاں گلاں نُوں ترتیب نال نئیں لکھیا گیا۔ ایس لئی ایہہ یقین نال نئیں کہیا جا سکدا اے کہ کیہڑی گل کیہڑا بندہ کر رہیا اے۔“‏ (‏دی ریویلیشن آف جان،‏ جِلد 2، ریوائزڈ ایڈیشن، صفحہ نمبر 223)‏ ایس لئی مکاشفہ 22:‏13 چ ”‏الفا تے اومیگا“‏ یہوواہ خدا ای اے جدے لئی ایہہ لقب مکاشفہ دی کتاب چ باقی تھانواں تے وی استمال ہویا اے۔‏