یوحنا دی اِنجیل

7 ایہدے بعد یسوع گلیل دا دَورہ کردا رہیا۔ اوہ یہودیہ نُوں نئیں جانا چاہندا سی کیونکہ یہودی*‏ لوک اوہنوں مارنا چاہندے سن۔ 2 پر اوس ویلے یہودیاں دی جھونپڑیاں دی عید*‏ نیڑے سی۔ 3 ایس لئی اوہدے بھراواں نے اوہنوں کہیا:‏ ”‏ایتھوں یہودیہ چلا جا تاکہ تیرے شاگرد وی اوہ کم ویکھ سکن جیہڑے تُوں کرنا ایں 4 کیونکہ جیہڑا بندہ مشہور ہونا چاہندا اے، اوہ چُھپ‌چُھپ کے کم نئیں کردا۔ جے تُوں ایہو جہے کم کرنے ای نیں تے ساری دُنیا دے سامنے کر۔“‏ 5 اصل چ اوہدے بھرا اوہدے تے ایمان نئیں لیائے سن۔ 6 ایس لئی یسوع نے اوہناں نُوں کہیا:‏ ”‏میرا وقت حالے نئیں آیا۔ پر تُسی کسے وی ویلے جا سکدے او۔ 7 دُنیا کول تواڈے توں نفرت کرن دی کوئی وجہ نئیں۔ پر ایہہ میرے توں نفرت کردی اے کیونکہ مَیں گواہی دینا واں کہ ایہدے کم بھیڑے نیں۔ 8 تُسی عید منان لئی جاؤ۔ پر مَیں ایس عید لئی حالے نئیں جاواں گا کیونکہ میرا وقت نئیں آیا۔“‏ 9 اوہناں نُوں ایہہ کہن دے بعد یسوع گلیل چ ای رہیا۔‏

10 پر جدوں اوہدے بھرا عید منان لئی چلے گئے تے بعد چ اوہ وی دُوجیاں توں چُھپ کے گیا۔ 11 ایس لئی یہودی عید دے دوران اوہنوں لبھن لگ پئے تے پچھن لگ پئے:‏ ”‏اوہ بندہ کتھے وے؟“‏ 12 اوتھے موجود لوک یسوع بارے آپس چ کُھسرپُھسر کرن لگ پئے۔ کجھ لوک کہہ رہے سن:‏ ”‏اوہ چنگا بندہ اے“‏ جد کہ کجھ کہہ رہے سن:‏ ”‏اوہ چنگا بندہ نئیں اے۔ اوہ تے لوکاں نُوں گمراہ کردا اے۔“‏ 13 پر یہودیاں*‏ دے ڈر توں کوئی وی کُھلے‌عام اوہدے بارے کجھ نئیں کہہ رہیا سی۔‏

14 جدوں عید دے اَدھے دن لنگھ گئے تے یسوع ہیکل چ جاکے تلیم دین لگ پیا۔ 15 یہودی بڑے حیران ہوئے تے کہن لگ پئے:‏ ”‏ایس بندے کول پاک کلام دا ایناں علم کتھوں آیا؟ ایہہ تے مذہبی سکولاں چ پڑھیا وی نئیں۔“‏ 16 یسوع نے اوہناں نُوں جواب دِتا:‏ ”‏جیہڑی تلیم مَیں دینا واں، اوہ میری نئیں اے سگوں اوہدی اے جنہے مینوں گھلیا اے۔ 17 جے کوئی بندہ خدا دی مرضی تے چلنا چاہندا اے، اوہ جان جائے گا کہ ایہہ تلیم خدا وَلّوں اے یاں میرے وَلّوں اے۔ 18 جیہڑا بندہ اپنی تلیم دیندا اے، اوہ اپنی وڈیائی چاہندا اے۔ پر جیہڑا اپنے گھلن والے دی وڈیائی چاہندا اے، اوہ سچا اے تے اوہدے وچ ذرا وی فریب نئیں ہوندا۔ 19 کیہہ موسیٰ نے توانوں شریعت نئیں دِتی؟ پر تواڈے وچوں کوئی وی اوہدے تے نئیں چلدا۔ تُسی تے مینوں مارنا چاہندے او، پر کیوں؟“‏ 20 لوکاں نے جواب دِتا:‏ ”‏بھلا کون تینوں مارنا چاہندا اے؟ تینوں تے کوئی باغی فرشتہ چِمبڑ گیا اے۔“‏ 21 یسوع نے اوہناں نُوں جواب دِتا:‏ ”‏تُسی میرا اِک کم ویکھ کے ایناں حیران ہو رہے او۔ 22 پر ذرا ایس گل وَل دھیان دَوو کہ موسیٰ نے توانوں ختنہ کرن دا قانون دِتا (‏بھانویں کہ ایہہ رسم موسیٰ توں نئیں سگوں تواڈے پیو دادے توں شروع ہوئی سی)‏ تے تُسی سبت دے دن ختنہ کردے او۔ 23 تُسی ختنے بارے موسیٰ دی شریعت نئیں توڑنا چاہندے، ایس لئی تُسی سبت والے دن وی ختنہ کردے او۔ تے جے مَیں سبت دے دن اِک آدمی نُوں شفا دِتی اے تے تُسی میرے تے کیوں بھڑک رہے او؟ 24 صرف اوس گل دی بِنا تے فیصلہ کرنا چھڈ دَوو جیہڑی توانوں نظر آندی اے سگوں سچائی دی بِنا تے فیصلہ کرو۔“‏

25 فیر یروشلیم چ رہن والے کجھ لوک کہن لگ پئے:‏ ”‏کیہہ ایہہ اوہی بندہ نئیں اے جنہوں ساڈے رہنما مارنا چاہندے نیں؟ 26 پر ویکھو!‏ ایہہ تے کُھلے‌عام تلیم دے رہیا اے تے رہنما ایہنوں کجھ وی نئیں کہہ رہے۔ کِتے اوہناں نُوں یقین تے نئیں ہو گیا کہ ایہہ مسیح اے؟ 27 پر سانوں تے پتہ اے کہ ایہہ بندہ کتھوں آیا اے۔ جدوں مسیح آئے گا تے کسے نُوں وی پتہ نئیں ہوئے گا کہ اوہ کتھوں آیا اے۔“‏ 28 فیر ہیکل چ تلیم دیندے ہوئیاں یسوع نے اُچی آواز چ کہیا:‏ ”‏توانوں پتہ اے کہ مَیں کون آں تے کتھوں آیا واں۔ پر مَیں اپنی مرضی نال نئیں آیا۔ جنہے مینوں گھلیا اے، اوہ سچ مچ ہے وے تے تُسی اوہنوں نئیں جان دے۔ 29 مَیں اوہنوں جاننا واں کیونکہ مَیں اوہدے ناں تے آیا واں تے اوہنے مینوں گھلیا اے۔“‏ 30 اوہدیاں گلاں سُن کے لوک اوہنوں پھڑنا چاہندے سن۔ پر کوئی وی اوہدے تے ہتھ نہ پا سکیا کیونکہ حالے اوہدا ویلا نئیں آیا سی۔ 31 فیر وی بوہت سارے لوک اوہدے تے ایمان لے آئے تے کہن لگ پئے:‏ ”‏ایہہ بندہ اینے معجزے کر رہیا اے، جے ایہہ مسیح نئیں تے فیر ہور کون ہو سکدا اے؟“‏

32 جدوں فریسیاں نے یسوع بارے لوکاں دِیاں ایہہ گلاں سُنیاں تے اوہناں نے تے وڈے کاہناں نے یسوع نُوں پھڑن*‏ لئی سپاہی بھیجے۔ 33 یسوع نے فیر کہیا:‏ ”‏مَیں حالے تھوڑا چِر ہور تواڈے نال آں۔ پر فیر مَیں اوہدے کول چلا جاواں گا جنہے مینوں گھلیا اے۔ 34 تُسی مینوں لبھن دی کوشش کرو گے پر لبھ نئیں سکو گے۔ تے جِتھے مَیں ہونواں گا، اوتھے تُسی نئیں آ سکو گے۔“‏ 35 ایس لئی یہودی آپس چ کہن لگ پئے:‏ ”‏ایہہ بندہ کتھے جان بارے گل کر رہیا اے جِتھے اَسی ایہنوں لبھ نئیں سکاں گے؟ کِتے ایہہ یونانی علاقیاں چ رہن والے یہودیاں کول تے نئیں جانا چاہندا؟ تے کِتے ایہہ یونانیاں نُوں تلیم دین بارے تے گل نئیں کر رہیا؟ 36 اوہدی ایس گل دا کیہہ مطلب اے کہ ”‏تُسی مینوں لبھن دی کوشش کرو گے پر لبھ نئیں سکو گے تے جِتھے مَیں ہونواں گا تُسی اوتھے نئیں آ سکو گے“‏؟“‏

37 فیر عید دے آخری دن جیہڑا سب توں خاص دن سی یسوع نے کھلو کے اُچی آواز چ کہیا:‏ ”‏جے کوئی پیاسا اے تے اوہ میرے کول آئے تے پانی پیوے۔ 38 جیہڑا وی بندہ میرے تے ایمان لیاندا اے، اوہدے تے پاک کلام دی ایہہ گل پوری ہوندی اے:‏ ”‏اوہدے اندروں زندگی دے پانی دا چشمہ وَگن لگ پئے گا۔“‏“‏ 39 یسوع نے ایہہ گل پاک روح بارے کہی سی جیہڑی اوہناں لوکاں نُوں مِلن والی سی جیہڑے اوہدے تے ایمان لیائے سن۔ پر حالے تک لوکاں نُوں پاک روح نئیں ملی سی کیونکہ حالے یسوع دی وڈیائی دا ویلا نئیں آیا سی۔ 40 اوہدی ایہہ گل سُن کے اوتھے کھلوتے کجھ لوک کہن لگ پئے:‏ ”‏واقعی ایہہ بندہ اوہی نبی اے جدے آن بارے پیشین‌گوئی کیتی گئی سی۔“‏ 41 کجھ لوک کہہ رہے سن:‏ ”‏ایہی مسیح اے۔“‏ پر دُوجے کہہ رہے سن:‏ ”‏مسیح گلیل توں تے نئیں آئے گا۔ 42 کیہہ پاک کلام چ ایہہ نئیں لکھیا کہ مسیح داؤد دی نسل توں تے داؤد دے پِنڈ بیت‌لحم توں آئے گا؟“‏ 43 ایس لئی یسوع نُوں لے کے لوکاں وچ پُھٹ پے گئی۔ 44 اوہناں وچوں کجھ یسوع نُوں پھڑنا*‏ چاہندے سن۔ پر کسے نے وی اوہدے تے ہتھ نہ پایا۔‏

45 فیر سپاہی وڈے کاہناں تے فریسیاں کول واپس چلے گئے۔ اوہناں نے سپاہیاں نُوں پچھیا:‏ ”‏تُسی اوہنوں پھڑ کے کیوں نئیں لیائے؟“‏ 46 سپاہیاں نے جواب دِتا:‏ ”‏اَج تک کسے وی انسان نے اوہدے وانگوں تلیم نئیں دِتی۔“‏ 47 پر فریسیاں نے اوہناں نُوں کہیا:‏ ”‏کِتے تُسی وی اوہدیاں گلاں چ تے نئیں آ گئے؟ 48 مذہبی رہنماواں تے فریسیاں وچوں تے کوئی وی اوہدے تے ایمان نئیں لیایا۔ 49 پر جیہڑے لوک اوہدیاں گلاں سُن دے نیں اوہ شریعت نُوں نئیں جان دے تے لعنتی نیں۔“‏ 50 اوہناں رہنماواں وچوں اِک نیکُدیمس وی سی جیہڑا یسوع نُوں پہلاں مِلن وی آیا سی، اوہنے اوہناں نُوں کہیا:‏ 51 ‏”‏ساڈی شریعت دے مطابق کسے وی بندے نُوں اوہدوں تک قصوروار نئیں ٹھہرایا جاندا جدوں تک اوہدی گل سُن کے ایہہ پتہ نہ لایا جائے کہ اوہنے کیہہ کیتا اے۔“‏ 52 اوہناں نے اوہنوں جواب دِتا:‏ ”‏کِتے تُوں وی گلیل توں تے نئیں؟ پاک کلام نُوں دھیان نال پڑھ کے ویکھ، گلیل توں کسے وی نبی نے نئیں آنا۔“‏*‏