یوحنا دی اِنجیل
12 فسح دی عید توں چھ دن پہلاں یسوع بیتعنیاہ آ گیا جِتھے لعزر رہندا سی جنہوں یسوع نے زندہ کیتا سی۔ 2 کجھ لوکاں نے اوتھے یسوع لئی شام نُوں اِک دعوت رکھی۔ مارتھا مہماناں دی خدمت کر رہی سی تے لعزر یسوع نال بہہ کے کھانا کھا رہیا سی۔ 3 اوہدوں مریم پتھر دی اِک شیشی چ جٹاماسی دا خالص خوشبودار تیل* لے کے آئی جیہڑا بوہت مہنگا سی۔ اوہنے اوہ تیل یسوع دے پیراں تے ملیا تے اپنے والاں نال اوہدے پیراں نُوں پُونجیا۔ اوس تیل دی خوشبو سارے گھر چ پھیل گئی۔ 4 پر اوہدے اِک شاگرد یہوداہ اِسکریوتی نے جیہڑا اوہنوں دھوکھا دین والا سی کہیا: 5 ”کیہہ ایہہ چنگا نہ ہوندا کہ ایس تیل نُوں 300 دینار* دا ویچ کے پیسے غریباں چ وَنڈ دِتے جاندے؟“ 6 اوہنے ایہہ گل ایس لئی نئیں کہی سی کیونکہ اوہنوں غریباں دی فکر سی سگوں اوہ چور سی۔ اصل چ اوہدے کول پیسیاں دا ڈبہ ہوندا سی جدے وچوں اوہ پیسے چوری کردا ہوندا سی۔ 7 یسوع نے کہیا: ”اوہنوں کجھ نہ کہوو۔ اوہنے میرے جسم تے تیل مل کے ایہنوں دفنان لئی پہلاں توں ای تیار کر دِتا اے۔ 8 غریب تے ہمیشاں تواڈے نال رہن گے۔ پر مَیں تواڈے نال ہمیشاں نئیں رہواں گا۔“
9 اوس ویلے بوہت سارے یہودیاں نُوں پتہ چلیا کہ یسوع بیتعنیاہ آیا ہویا اے۔ ایس لئی اوہ اوتھے آئے تاکہ اوہ صرف یسوع نُوں ای نئیں سگوں لعزر نُوں وی ویکھن جنہوں اوہنے مُردیاں چوں زندہ کیتا سی۔ 10 ایہہ ویکھ کے وڈے کاہناں نے لعزر نُوں وی مارن دا منصوبہ بنایا 11 کیونکہ اوہدی وجہ توں ای بوہت سارے یہودی بیتعنیاہ جا رہے سن تے یسوع تے ایمان لیا رہے سن۔
12 اگلے دن، عید منان لئی آئے ہوئے بوہت سارے لوکاں نُوں پتہ چلیا کہ یسوع یروشلیم آن والا اے۔ 13 ایس لئی اوہ کھجور دِیاں ٹاہنیاں لے کے یسوع نُوں مِلن آئے تے اُچی اُچی کہن لگ پئے: ”اَے خدا، ساڈی دُعا اے ایہنوں نجات دے۔ مبارک اے اِسرائیل دا بادشاہ جیہڑا یہوواہ دے ناں تے آندا اے!“ 14 فیر یسوع نُوں اِک جوان کھوتا نظر آیا تے اوہ اوہدے اُتے بہہ گیا۔ ایہدے بارے لکھیا گیا سی: 15 ”اَے صیون دی دھیئے، نہ ڈر۔ ویکھ، تیرا بادشاہ اِک کھوتی دے بچے اُتے بہہ کے آ رہیا اے۔“ 16 شاگرداں نُوں پہلاں تے ایہہ گلاں سمجھ نہ آئیاں۔ پر جدوں یسوع نُوں اوہدی شان مِل گئی تے شاگرداں نُوں یاد آیا کہ لوکاں نے یسوع لئی ایہہ سب کجھ اوہناں گلاں دے مطابق ای کیتا سی جیہڑیاں پاک کلام چ اوہدے بارے لکھیاں ہوئیاں سن۔
17 یسوع نے بوہت سارے لوکاں دے سامنے لعزر نُوں مُردیاں چوں زندہ کر کے قبر توں باہر بلایا سی۔ اوہناں نے جو کجھ ویکھیا سی اوہدے بارے اوہ دُوجیاں نُوں دَسدے رہے۔ 18 ایس طرحاں بوہت سارے لوکاں نے یسوع دے ایس معجزے بارے سُنیا تے اوہ وی یسوع نُوں مِلن آئے۔ 19 ایس لئی فریسی اِک دُوجے نُوں کہن لگ پئے: ”ساڈا تے کوئی وَس ای نئیں چل رہیا۔ ویکھو، ساری دُنیا اوہدے مغر لگ گئی اے۔“
20 عید دے ایس موقعے تے کجھ یونانی لوک وی عبادت کرن لئی آئے ہوئے سن۔ 21 اوہ فِلپّس کول آئے جیہڑا گلیل دے بیتصیدا توں سی۔ اوہناں نے اوہنوں درخاست کیتی: ”بھرا جی، سانوں یسوع نال ملواؤ۔“ 22 فِلپّس نے ایہدے بارے اندریاس نال گل کیتی تے اوہناں دونواں نے آ کے یسوع نُوں دَسیا۔
23 پر یسوع نے اوہناں نُوں جواب دِتا: ”انسان دے بیٹے* دی وڈیائی دا ویلا آ گیا اے۔ 24 مَیں توانوں سچ کہنا واں، جدوں تک کنک دا دانہ زمین چ جا کے مر نئیں جاندا، اوہدوں تک اوہ اِک ای دانہ رہندا اے۔ پر جدوں اوہ مر جاندا اے تے اوہدے توں بوہت سارے دانے نکلدے نیں۔ 25 جنہوں اپنی جان پیاری اے، اوہ ایہنوں گنوا بیٹھے گا۔ پر جیہڑا ایس دُنیا چ اپنی جان نال نفرت کردا اے، اوہ ایہنوں بچا لوے گا تے ہمیشاں دی زندگی پائے گا۔ 26 جیہڑا بندہ میری خدمت کرنا چاہندا اے، اوہ میرے پچھے پچھے آئے تے جِتھے مَیں ہوواں گا، اوتھے اوہ وی ہوئے گا۔ جیہڑا بندہ میری خدمت کردا اے، باپ اوہنوں مان بخشے گا۔ 27 مَیں ہُن بڑا پریشان آں تے مَیں ہور کیہہ کہواں؟ اَے باپ، مینوں ایس اوکھی گھڑی توں بچا۔ پر مینوں پتہ اے کہ مَیں ایس گھڑی توں لنگھنا ای اے کیونکہ مَیں ایسے لئی آیا واں۔ 28 اَے باپ، اپنے ناں دی وڈیائی کر۔“ فیر اسمان توں آواز آئی: ”مَیں ایہدی وڈیائی کیتی اے تے دُبارہ وی کراں گا۔“
29 ایہہ سُن کے اوتھے کھلوتے لوک کہن لگ پئے: ”بدّل گرجے نیں۔“ کجھ ہور لوکاں نے کہیا: ”کسے فرشتے نے اوہدے نال گل کیتی اے۔“ 30 یسوع نے کہیا: ”ایہہ آواز میرے لئی نئیں سگوں تواڈے لئی آئی اے۔ 31 ہُن ایس دُنیا دی عدالت ہو رہی اے تے دُنیا دے حاکم نُوں کڈھ دِتا جائے گا۔ 32 پر جدوں مینوں سُولی* تے چڑھایا جائے گا تے مَیں بوہت سارے لوکاں نُوں اپنے وَل کِھچاں گا۔“ 33 اِنج یسوع نے دَسیا کہ اوہ کیہو جہی موت مرے گا۔ 34 لوکاں نے اوہنوں کہیا: ”اَسی تے سُنیا اے کہ شریعت چ ایہہ لکھیا اے کہ مسیح ہمیشاں زندہ رہوے گا۔ فیر تُوں کیویں کہہ سکنا ایں کہ انسان دے بیٹے* نُوں سُولی تے چڑھایا جائے گا؟ انسان دا بیٹا ہے کون؟“ 35 یسوع نے اوہناں نُوں کہیا: ”چانن بس ہور تھوڑی دیر لئی تواڈے وچ اے۔ جدوں تک تواڈے کول چانن اے، ایہدے چ چلو تاکہ نھیرا توانوں گھیر نہ لوے۔ نھیرے چ چلن والے بندے نُوں پتہ ای نئیں ہوندا کہ اوہ کِدھر جا رہیا اے۔ 36 جدوں تک تواڈے کول چانن اے، ایہدے تے ایمان ظاہر کردے رہوو تاکہ تُسی چانن دے پُتر بن جاؤ۔“
ایہہ گلاں کہن دے بعد یسوع اوتھوں چلا گیا تے اوہناں توں لُک گیا۔ 37 بھانویں کہ اوہنے اوہناں دے سامنے بوہت سارے معجزے کیتے سن پر فیر وی اوہ اوہدے تے ایمان نئیں لیائے۔ 38 اِنج یسعیاہ نبی دی ایہہ گل پوری ہوئی: ” اَے یہوواہ، ساڈیاں گلاں سُن کے کون ایمان لیایا اے؟ تے یہوواہ دی طاقت* کِنہاں اُتے ظاہر کیتی گئی اے؟“ 39 اوہ ایس لئی ایمان نئیں لیائے کیونکہ یسعیاہ نبی نے ایہہ وی کہیا سی: 40 ”اوہنے اوہناں دِیاں اَکھاں نُوں اَنھا کر دِتا اے تے اوہناں دے دِلاں نُوں سخت کر دِتا اے تاکہ اوہ اپنیاں اَکھاں نال ویکھ نہ سکن تے اپنے دِلاں نال سمجھ نہ سکن تے اوہ اوہدے وَل واپس نہ آ جان تے اوہ اوہناں نُوں شفا نہ دَوے۔“ 41 یسعیاہ نے ایہہ گلاں ایس لئی کہیاں سن کیونکہ اوہنے مسیح دی شان ویکھی سی تے اوہدے بارے دَسیا سی۔ 42 بوہت سارے لوک ایتھوں تک کہ یہودیاں دے کئی رہنما وی اوہدے تے ایمان لیائے۔ پر اوہ اپنا ایمان ظاہر نئیں کردے سن کیونکہ اوہناں نُوں ڈر سی کہ کِتے فریسی اوہناں نُوں عبادتگاہ چوں کڈھ نہ دین۔ 43 اوہ خدا وَلّوں عزت پان دی بجائے انساناں وَلّوں عزت پانا زیادہ پسند کردے سن۔
44 پر یسوع نے اُچی آواز چ کہیا: ”جیہڑا میرے تے ایمان لیاندا اے، اوہ صرف میرے تے ای نئیں سگوں اوہدے تے وی ایمان لیاندا اے جنہے مینوں گھلیا اے۔ 45 تے جیہڑا مینوں ویکھدا اے، اوہ اوہنوں وی ویکھدا اے جنہے مینوں گھلیا اے۔ 46 مَیں دُنیا دا چانن بن کے آیا واں تاکہ جیہڑا میرے تے ایمان لیائے، اوہ نھیرے چ نہ رہوے۔ 47 پر جیہڑا میریاں گلاں سُن کے اوہناں تے عمل نئیں کردا، مَیں اوہنوں قصوروار نئیں ٹھہراندا کیونکہ مَیں دُنیا نُوں قصوروار ٹھہران نئیں سگوں ایہنوں بچان آیا واں۔ 48 جیہڑا مینوں ردّ کردا اے تے میریاں گلاں نُوں قبول نئیں کردا، اوہنوں قصوروار ٹھہرایا جائے گا۔ جیہڑیاں گلاں مَیں کہیاں نیں، اوہی اوہنوں آخری دن قصوروار ٹھہران گیاں 49 کیونکہ مَیں جو وی کہنا واں، اوہ اپنے وَلّوں نئیں کہندا سگوں باپ نے مینوں گھلیا اے۔ تے مَیں اوہی کہنا واں تے اوہی سکھانا واں جیویں اوہنے مینوں حکم دِتا اے۔ 50 نالے مینوں پتہ اے کہ اوہدے حکم من کے ہمیشاں دی زندگی مِلدی اے۔ ایس لئی مَیں جیہڑیاں وی گلاں کہنا واں، بالکل اُنج ای کہنا واں جیویں باپ نے مینوں سکھائیاں نیں۔“