کُلسّیوں دے ناں خط
4 مالکو، اپنے غلاماں نال صحی تے چنگا سلوک کرو۔ یاد رکھو کہ اسمان چ تواڈا وی اِک مالک ہے وے۔
2 دُعا کرن چ لگے رہوو تے ایس معاملے چ چوکس رہوو تے شکرگزاری کردے رہوو۔ 3 نالے ساڈے لئی وی دُعا کرو کہ خدا اپنے کلام دی مُنادی کرن لئی راہ کھولے تاکہ اَسی مسیح بارے مُقدس راز دی مُنادی کر سکئے۔ اصل چ مَیں ایسے وجہ توں قید آں۔ 4 نالے ایہہ وی دُعا کرو کہ مَیں ایس راز بارے صاف صاف گل کر سکاں جیویں کہ مینوں کرنی وی چاہی دی اے۔
5 غیر ایمان لوکاں* نال پیش آندے ویلے سمجھداری نال کم لوو تے اپنے وقت نُوں وی سمجھداری نال استمال* کرو۔ 6 جیویں لُون کھانے نُوں سوادی بناندا اے، اوسے طرحاں تواڈیاں گلاں وی ہمیشاں دل نُوں چنگیاں لگن والیاں ہون۔ فیر توانوں پتہ ہوئے گا کہ تُسی ہر بندے نُوں کیویں جواب دینا اے۔
7 تخِکُس توانوں میرے بارے سب کجھ دَسے گا جیہڑا میرا پیارا بھرا تے ساڈے نال مالک دا وفادار خادم تے غلام اے۔ 8 مَیں اوہنوں تواڈے کول ایس لئی گھل رہیا واں تاکہ اوہ توانوں ساڈا حال چال دَسے تے تواڈے دِلاں نُوں تسلی دَوے۔ 9 اوہ میرے وفادار تے پیارے بھرا اُنیسمس نال آ رہیا اے جیہڑا تواڈے علاقے دا ای اے۔ اوہ دونویں توانوں ایتھوں دی ساری خبر دین گے۔
10 ارِسترخس جیہڑا میرے نال قید اے، توانوں سلام کہہ رہیا اے تے مرقس وی جیہڑا برنباس دا رشتےدار اے، (ایہہ اوہی مرقس اے جدے بارے مَیں توانوں ہدیت کیتی سی کہ جے اوہ تواڈے کول آئے تے اوہنوں خوشی نال ملنا۔) 11 تے یسوع وَلّوں وی سلام جنہوں یُوستُس کہیا جاندا اے۔ ایہہ اوہناں بھراواں وچوں نیں جنہاں دا ختنہ ہویا اے۔ صرف ایہی بھرا خدا دی بادشاہی دا کم کرن چ میری مدد کر رہے نیں تے ایہناں نے مینوں بڑی تسلی دِتی اے۔ 12 مسیح یسوع دے غلام اِپَفراس وَلّوں سلام جیہڑا تواڈے علاقے دا اے۔ اوہ ہمیشاں تواڈے لئی دِلوں دُعا کردا اے تاکہ تُسی خدا دی مرضی مطابق آخر تک پُختہ رہوو تے اوہدے حضور پورے ایمان نال کھڑے رہ سکو۔ 13 مَیں ایس گل دا گواہ واں کہ اوہ تواڈی تے اوہناں بھراواں دی خاطر بڑی محنت کر رہیا اے جیہڑے لودیکیہ تے ہیراپُلِس چ رہندے نیں۔
14 ساڈے پیارے بھرا تے حکیم لُوقا تے دیماس وَلّوں توانوں سلام۔ 15 میرے وَلّوں لودیکیہ دے بھین بھراواں نُوں تے بھین نِمفاس تے اوہدے گھر جمع ہون والی کلیسیا نُوں سلام۔ 16 جدوں تُسی ایہہ خط پڑھ لوو تے فیر اِنتظام کرو کہ ایہہ لودیکیہ دی کلیسیا چ وی پڑھیا جائے۔ نالے جیہڑا خط لودیکیہ دی کلیسیا نُوں بھیجیا گیا اے، اوہ تواڈی کلیسیا چ وی پڑھیا جائے۔ 17 نالے ارخِپُس نُوں کہوو: ”اوس خدمت تے دھیان دے جیہڑی تُوں مالک دے شاگرد دے طور تے قبول کیتی اے تاکہ تُوں اوہنوں چنگی طرحاں پورا کر سکیں۔“
18 مَیں پولُس اپنے ہتھیں توانوں سلام لکھ رہیا واں۔ یاد رکھو کہ مَیں زنجیراں چ بنھیا ہویا واں۔ خدا دی عظیم رحمت تواڈے تے ہووے۔