وڈی مصیبت کیہہ اے؟‏

پاک کلام دا جواب

وڈی مصیبت دے دوران اِک ایہو جیہا مشکل دَور شروع ہوئے گا جدا انساناں نے پہلاں کدی سامنا نئیں کیتا۔ پاک کلام چ دَسیا گیا اے کہ وڈی مصیبت ”‏آخری زمانے“‏ چ آئے گی۔ (‏2-‏تیمُتھیُس 3:‏1؛‏ دانی‌ایل 12:‏4)‏ مرقس 13:‏19 دے مطابق ”‏اوہ دن ایہو جہی مصیبت دے ہون گے جیہڑی خدا دی بنائی ہوئی دُنیا دے شروع توں لے کے ہُن تک نہ کدی آئی اے تے نہ ای دُبارہ کدی آئے گی۔“‏—‏دانی‌ایل 12:‏1؛‏ متی 24:‏21، 22‏۔‏

وڈی مصیبت دے دوران کیہہ کجھ ہوئے گا؟‏

• جھوٹھے مذہباں نُوں ختم کر دِتا جائے گا۔‏ دُنیا دِیاں حکومتاں اقوامِ‌متحدہ نُوں ایہہ اِختیار دین گیاں کہ اوہ اوہناں ساری مذہبی تنظیماں نُوں ختم کر دَوے جیہڑیاں خدا بارے سچائی نئیں سکھاندیاں۔ (‏مُکاشفہ 17:‏1،‏ 5؛‏ 18:‏9، 10،‏ 21‏)‏ اِنج خدا دی مرضی دے مطابق جھوٹھے مذہباں نُوں بڑی تیزی نال ختم کر دِتا جائے گا۔—‏مُکاشفہ 17:‏3،‏ 15-‏18‏۔‏a

• سچے مذہب تے حملہ ہوئے گا۔‏ قوماں یعنی فرق فرق مُلک تے حکومتاں مِل کے اوہناں لوکاں نُوں ختم کرن دی کوشش کرن گیاں جیہڑے سچے خدا دی عبادت کردے نیں۔ حِزقی‌ایل دی کتاب چ ایہناں قوماں نُوں ”‏ماجوج دا جوج“‏ کہیا گیا اے۔ پر خدا اپنے بندیاں نُوں تباہ نئیں ہون دَوے گا سگوں اوہناں نُوں بچا لوے گا۔—‏حِزقی‌ایل 38:‏1، 2، 9-‏12، 18-‏23۔‏

• زمین تے رہن والیاں دی عدالت ہوئے گی۔‏ یسوع مسیح سارے انساناں دی عدالت کرے گا تے ”‏لوکاں نُوں اُنج ای اِک دُوجے توں وَکھ کرے گا جیویں چرواہا بھیڈاں نُوں بکریاں توں وَکھ کردا اے۔“‏ (‏متی 25:‏31-‏33‏)‏ ہر اِک دی عدالت ایس بنیاد تے کیتی جائے گی کہ کیہہ اوہنے یسوع دے اوہناں بھراواں دا ساتھ دِتا یاں نئیں جیہڑے اوہدے نال اسمان تے حکمرانی کرن گے۔—‏متی 25:‏34-‏46‏۔‏

• خدا دی بادشاہی دے حکمراناں نُوں جمع کیتا جائے گا۔‏ خدا نے اپنے جنہاں وفادار لوکاں نُوں اسمان تے مسیح نال حکمرانی کرن لئی چُنیا اے، زمین تے اوہناں دی زندگی ختم ہو جائے گی تے اوہناں نُوں اسمان تے زندگی دِتی جائے گی۔—‏متی 24:‏31؛‏ 1-‏کُرنتھیوں 15:‏50-‏53؛‏ 1-‏تھسلُنیکیوں 4:‏15-‏17‏۔‏

• ہرمجدون دی جنگ ہوئے گی۔‏ مُکاشفہ 16 باب دے مطابق ایہہ ”‏بے‌حد طاقت رکھن والے خدا دے عظیم دن دی جنگ اے“‏ تے ایس جنگ نُوں ”‏یہوواہ دا دن“‏ وی کہیا گیا اے۔ (‏مُکاشفہ 16:‏14،‏ 16؛‏ یسعیاہ 13:‏9؛‏ 2-‏پطرس 3:‏12‏)‏ یسوع مسیح جنہاں لوکاں دے خلاف فیصلہ سُنائے گا، اوہناں نُوں ختم کر دِتا جائے گا۔ (‏صفنیاہ 1:‏18؛‏ 2-‏تھسلُنیکیوں 1:‏6-‏10‏)‏ ایس تباہی چ اوس سَت سراں والے وحشی درندے نُوں وی ختم کر دِتا جائے گا جدا اشارہ دُنیا دے سیاسی نظام یعنی انساناں دِیاں ساریاں حکومتاں وَل اے۔—‏مُکاشفہ 19:‏19-‏21‏۔‏

وڈی مصیبت دے بعد کیہہ کجھ ہوئے گا؟‏

• شیطان تے باغی فرشتیاں نُوں قید کر دِتا جائے گا۔‏ اِک طاقت‌ور فرشتہ شیطان تے باغی فرشتیاں نُوں ”‏اتھاہ گڑھے“‏ چ سُٹ دَوے گا۔ (‏مُکاشفہ 20:‏1-‏3‏)‏ اتھاہ گڑھا اِک قید وانگوں اے جتھے شیطان تے باغی فرشتیاں نُوں بنھ کے رکھیا جائے گا تاکہ اوہ کسے نُوں گمراہ نہ کر سکن۔—‏مُکاشفہ 20:‏7‏۔‏

• مسیح ہزار سال لئی حکمرانی شروع کرے گا۔‏ خدا دی بادشاہی ہزار سال دی حکمرانی شروع کرے گی جدے دوران انساناں نُوں بے‌شمار برکتاں ملن گیاں۔ (‏مُکاشفہ 5:‏9، 10؛‏ 20:‏4،‏ 6‏)‏ لوکاں دی اِک وڈی بِھیڑ وڈی مصیبت چوں بچ نکلے گی تے اوہ شان‌دار دن ویکھے گی جدوں مسیح دی ہزار سال دی حکمرانی شروع ہوئے گی۔—‏مُکاشفہ 7:‏9،‏ 14؛‏ زبور 37:‏9-‏11۔‏