سبق نمبر 40
اَسی خدا دے حضور پاک صاف کیویں رہ سکنے آں؟
تُسی ویکھیا ہوئے گا کہ جدوں اِک ماں اپنے بچے نُوں سکول جان لئی تیار کردی اے تے اوہ اوہنوں چنگی طرحاں نواندی دھواندی اے تے اوہنوں صاف ستھرے کپڑے پواندی اے۔ ایہدے نال نہ صرف بچہ صحتمند رہندا اے سگوں دُوجیاں نُوں وی ایہہ پتہ چلدا اے کہ اوہدے ماں پیو اوہدی بڑی ودھیا دیکھبھال کردے نیں۔ ایسے طرحاں ساڈا اسمانی باپ یہوواہ وی چاہندا اے کہ اَسی پاک صاف رہیے۔ اوہ چاہندا اے کہ اَسی جسمانی طور تے وی پاک رہیے تے ساڈی سوچ، بولچال تے کم وی پاک صاف ہون۔ جدوں اَسی پاک صاف رہنے آں تے سانوں وی خوشی ہوندی اے تے یہوواہ دی وی وڈیائی ہوندی اے۔
1. اَسی جسمانی طور تے پاک صاف کیویں رہ سکنے آں؟
یہوواہ نے اپنے بندیاں نُوں حکم دِتا اے کہ اوہ پاک ہون۔ (1-پطرس 1:16) پاک ہون دا مطلب ایہہ وے کہ اَسی جسمانی طور تے وی پاک ہوئیے تے اپنی سوچ، بولچال تے کماں نُوں وی پاک رکھئے۔ جسمانی طور تے پاک رہن لئی ضروری اے کہ اَسی ہر روز نہائیے تے اپنے کپڑے، گھر تے گڈی نُوں وی صاف ستھرا رکھئے۔ سانوں اپنیاں عبادتگاہواں نُوں وی صاف ستھرا رکھنا چاہی دی اے۔ جے اَسی صاف ستھرے رہواں گے تے ساڈے خدا یہوواہ دی وڈیائی ہوئے گی۔—2-کُرنتھیوں 6:3، 4۔
2. پاک صاف رہن لئی سانوں کیہڑیاں عادتاں توں بچنا چاہی دا اے؟
بائبل چ سانوں نصیحت کیتی گئی اے کہ اَسی اپنے جسم تے اپنی سوچ نُوں ہر طرحاں دی ناپاکی توں پاک کرئیے۔ (2-کُرنتھیوں 7:1) ایس لئی اَسی ہر ایہو جہی چیز توں بچنے آں جدے نال ساڈے جسم نُوں نقصان ہو سکدا اے یاں ساڈی سوچ خراب ہو سکدی اے۔ ساڈی سوچ یہوواہ نُوں پسند آنی چاہی دی اے ایس لئی اَسی گندے خیالاں توں بچنے آں۔ (زبور 104:34) نالے اَسی اپنی گل بات نُوں وی پاک صاف رکھن دی کوشش کرنے آں۔—کُلسّیوں 3:8 نُوں پڑھو۔
پر کیہڑیاں چیزاں ساڈے جسم تے سوچ نُوں ناپاک کر سکدیاں نیں؟ کجھ چیزاں نال ساڈے جسم نُوں نقصان ہو سکدا اے جیویں کہ سگریٹ، گٹکا، پان چھالیہ تے کئی ہور نشے والیاں چیزاں۔ ایہناں چیزاں توں دُور رہ کے اَسی صحتمند رہنے آں تے زندگی دی نعمت لئی قدر ظاہر کرنے آں۔ کجھ عادتاں نال ساڈی سوچ خراب ہوندی اے جیویں کہ گندیاں تصویراں ویکھنا یاں اپنے ہتھاں نال اپنے جنسی حصیاں نُوں چھیڑنا وغیرہ۔ (زبور 119:37؛ اِفسیوں 5:5) ایہناں عادتاں تے قابو پانا مشکل لگ سکدا اے پر یہوواہ ساڈیاں کوششاں چ برکت پا سکدا اے۔—یسعیاہ 41:13 نُوں پڑھو۔
ہور سوچوچار لئی
ایس گل تے غور کرو کہ ساڈے جسمانی طور تے پاک صاف رہن نال یہوواہ دی وڈیائی کیویں ہوندی اے۔ نالے ویکھو کہ اَسی بھیڑیاں عادتاں کیویں چھڈ سکنے آں۔
3. جسمانی طور تے پاک صاف رہ کے اَسی یہوواہ دی وڈیائی کرنے آں
پرانے زمانے چ یہوواہ خدا نے اِسرائیلیاں نُوں صفائی ستھرائی بارے قانون دِتے سن۔ اوہناں توں سانوں پتہ چلدا اے کہ اوہ پاک صاف رہن بارے کیہہ سوچدا اے۔ خروج 19:10 تے 30:17-19 نُوں پڑھو تے فیر ایہناں سوالاں تے گل بات کرو:
ایہناں ایتاں دے مطابق صفائی ستھرائی بارے یہوواہ دی سوچ کیہہ اے؟
تُسی جسمانی طور تے پاک صاف رہن لئی کیہہ کجھ کر سکدے او؟
صاف ستھرا رہن لئی کوشش کرنی پیندی اے تے ایہدے لئی وقت وی کڈھنا پیندا اے۔ پر اَسی بھانویں امیر ہوئیے یاں غریب تے بھانویں جِتھے وی رہندے ہوئیے، اَسی صاف ستھرے رہ سکنے آں۔ ویڈیو چلاؤ تے فیر ایس سوال تے گل بات کرو:
جدوں لوک ویکھدے نیں کہ اَسی اپنیاں چیزاں نُوں صاف ستھرا رکھنے آں تے ایہدے توں یہوواہ دی وڈیائی کیویں ہوندی اے؟
4. بھیڑیاں عادتاں نُوں چھڈ دَوو
یہوواہ خدا کسے وی بھیڑی عادت نُوں چھڈن چ ساڈی مدد کر سکدا اے۔
جے توانوں سگریٹ پین یاں کوئی ہور نشہ کرن دی عادت اے تے توانوں پتہ ہوئے گا کہ ایس عادت توں جان چھڈانا بڑا مشکل ہوندا اے۔ تُسی ایس بارے کیہہ کر سکدے او؟ سوچو کہ ایس عادت توں توانوں کِنّاں نقصان ہو رہیا اے۔ متی 22:37-39 نُوں پڑھو تے فیر گل بات کرو کہ سگریٹ پین یاں کوئی ہور نشہ کرن دی وجہ توں . . .
یہوواہ نال تواڈے رشتے تے کیہہ اثر پے سکدا اے؟
گھر دے جیاں یاں دوستاں نال تواڈے رشتے تے کیہہ اثر پے سکدا اے؟
ایس گل دا پکا ارادہ کرو کہ تُسی اپنی بھیڑی عادت نُوں چھڈن دی پوری کوشش کرو گے۔a ویڈیو چلاؤ۔
فِلپّیوں 4:13 نُوں پڑھو تے فیر ایس سوال تے گل بات کرو:
باقاعدگی نال دُعا کرن، بائبل پڑھن تے عبادتاں تے جان نال بھیڑیاں عادتاں نُوں چھڈن دی طاقت کیویں مِلدی اے؟
5. بھیڑے کماں تے گندے خیالاں دا مقابلہ کرو
کُلسّیوں 3:5 نُوں پڑھو تے فیر ایہناں سوالاں تے گل بات کرو:
سانوں کیویں پتہ اے کہ گندیاں تصویراں ویکھنا، فون تے گندے میسج تے ویڈیوز بھیجنا تے اپنے ہتھاں نال اپنے جنسی حصیاں نُوں چھیڑنا یہوواہ دی نظر چ بوہت ای بھیڑے کم نیں؟
تواڈے خیال چ یہوواہ نے سانوں ایہہ کیوں کہیا اے کہ اَسی اپنی سوچ، بولچال تے کماں نُوں پاک صاف رکھئے؟
ویکھو کہ اَسی گندے خیالاں دا مقابلہ کیویں کر سکنے آں۔ ویڈیو چلاؤ۔
یسوع مسیح نے اِک مثال دے ذریعے سمجھایا کہ سانوں پاک صاف رہن لئی ٹھوس قدم چُکنے چاہی دے نیں۔ متی 5:29، 30 نُوں پڑھو تے فیر ایس سوال تے گل بات کرو:
یسوع ایہہ نئیں کہہ رہیا سی کہ سانوں اپنے جسم نُوں تکلیف دینی چاہی دی اے سگوں اوہ ایہہ دَس رہیا سی کہ سانوں ٹھوس قدم چُکنے پے سکدے نیں۔ سو فیر اِک بندہ گندے خیالاں نُوں قابو چ رکھن لئی کیہڑے ٹھوس قدم چُک سکدا اے؟
جے تُسی گندے خیالاں تے قابو پان دی کوشش کر رہے او تے یہوواہ ایہدے توں بوہت خوش اے۔ زبور 103:13، 14 نُوں پڑھو تے فیر ایس سوال تے گل بات کرو:
جے تُسی کسے بھیڑی عادت تے قابو پان دی کوشش کر رہے او تے فیر ایہہ ایتاں توانوں اپنی کوشش نُوں جاری رکھن دا حوصلہ کیویں دیندیاں نیں؟
ہار نہ منو
شاید تُسی کوئی بھیڑا کم چھڈ دِتا اے۔ پر فیر وی کدی نہ کدی اوہ کم کرن نُوں تواڈا دل کردا اے۔ جے تواڈے کولوں اوہ کم ہو وی جاندا اے تے ہار نہ منو۔ کوشش جاری رکھو۔ ذرا سوچو کہ دوڑ چ حصہ لین والا اِک کھیڈاری جے دوڑدے دوڑدے ڈِگ پوے تے ایہدا مطلب ایہہ نئیں کہ اوہ ہار گیا اے۔ نالے ایہدا مطلب ایہہ وی نئیں کہ اوہنوں ہُن نویں سِرے توں دوڑ شروع کرنی پئے گی۔ ایسے طرحاں کسے کم نُوں چھڈن توں بعد جے تُسی اوہ کم دُبارہ کر لیندے او تے ایہدا مطلب ایہہ نئیں کہ تُسی ہار گئے او۔ نالے ایہدا مطلب ایہہ وی نئیں کہ ہُن توانوں نویں سِرے توں کوشش کرنی پئے گی۔ کدی کدار ساڈے کولوں اوہ کم دُبارہ ہو سکدا اے جیہڑا اَسی چھڈ دِتا سی۔ پر ہار نہ منو۔ یہوواہ دی مدد نال تُسی جت جاؤ گے۔
کجھ لوکاں دی رائے: ”میں اپنی عادت نئیں چھڈ سکدا۔“
کیہڑیاں ایتاں دے ذریعے تُسی سمجھا سکدے او کہ یہوواہ دی مدد نال بھیڑیاں عادتاں نُوں چھڈیا جا سکدا اے؟
خلاصہ
اَسی اپنے جسم، سوچ تے کماں نُوں پاک صاف رکھن نال یہوواہ نُوں خوش کر سکنے آں۔
دہرائی
پاک صاف رہنا ضروری کیوں اے؟
تُسی جسمانی طور تے پاک صاف کیویں رہ سکدے او؟
تُسی اپنے کماں تے سوچ نُوں پاک کیویں رکھ سکدے او؟
ہور جانن لئی
ایس ویڈیو چ ویکھو کہ پیسے دھیلے دی تنگی دے باوجود تُسی صاف ستھرے رہن لئی کیہہ کر سکدے او۔
ایس مضمون چ پڑھو کہ تُسی سگریٹ چھڈن لئی کیہہ کر سکدے او۔
ایس مضمون چ پڑھو کہ گندیاں تصویراں تے فلماں ویکھن دا کیہہ نقصان ہوندا اے۔
ایس مضمون چ ویکھو کہ اِک بندے نے گندیاں تصویراں ویکھن دی عادت تے کیویں قابو پایا۔
a ایس سبق دے ”ہور جانن لئی“ والے حصے چ اِک مضمون دِتا گیا اے جدا موضوع اے، ”سگریٹنوشی چھوڑنا ممکن ہے۔“ ایس مضمون چ بھیڑیاں عادتاں نُوں چھڈن بارے کجھ ودھیا مشورے دِتے گئے نیں۔