کیہہ تُسی فرمانبردار رہوو گے؟‏

1.‏ ساڈے لئی کدی کدار فرمانبردار رہنا مشکل کیوں ہوسکدا اے؟‏

کیہہ توانوں کدی کدی فرمانبردار رہنا مشکل لگدا اے؟ بادشاہ داؤد نُوں وی اِنج ای لگیا سی۔ ایس لئی اوہنے دُعا چ یہوواہ نُوں کہیا:‏ میرے اندر خواہش پیدا کر کہ مَیں تیری گل مناں۔ (‏زبور 51:‏12)‏ داؤد یہوواہ نُوں بوہت پیار کردا سی۔ پر فیر وی اوہنوں کدی کدی یہوواہ دی گل مننا مشکل لگدا سی تے کدی کدی سانوں وی اِنج ا ی لگدا اے۔ پر کیوں؟ پہلی گل ایہہ وے کہ پیدائشی طور تے ای ساڈے اندر نافرمانی کرن دی فطرت ہوندی اے۔ دُوجی گل ایہہ وے کہ جیویں شیطان نے یہوواہ دے خلاف بغاوت کیتی، اوہ سانوں وی اِنج کرن تے اُکساندا اے۔ (‏2-‏کُرنتھیوں 11:‏3‏)‏ تیجی گل ایہہ وے کہ ساڈے آلے دوالے بغاوت دی سوچ پھیلی ہوئی اے جیہڑی نافرمانی دے پُتراں تے اثر کر رہی اے۔ (‏اِفسیوں 2:‏2‏)‏ ایس لئی جے اَسی چاہنے آں کہ اَسی یہوواہ تے اوہناں لوکاں دے فرمانبردار رہیے جنہاں نُوں اوہنے اِختیار دِتا اے تے ایہہ بوہت ضروری اے کہ اَسی نہ صرف گُناہ کرن دی اپنی فطرت نال لڑیئے سگوں نافرمانی کرن دے دباؤ دا وی مقابلہ کریئے جیہڑا شیطان تے ایہہ دُنیا ساڈے تے پاندی اے۔‏

2.‏ فرمانبردار رہن دا کیہہ مطلب اے؟ (‏یعقوب 3:‏17‏)‏

² یعقوب 3:‏17 نُوں پڑھو۔‏ یعقوب نے یہوواہ دے اِلہام نال لکھیا کہ سمجھ‌دار لوک فرمانبردار ہوندے نیں۔ سوچو کہ ایہدا کیہہ مطلب اے۔ ایہدا مطلب اے کہ سانوں خوشی نال اوہناں لوکاں دی فرمانبرداری کرن لئی تیار رہنا چاہی دا اے جنہاں نُوں یہوواہ نے کسے حد تک اِختیار دِتا اے۔ پر ایہہ وی سچ اے کہ یہوواہ ساڈے کولوں ایہہ توقع نئیں کردا کہ اَسی اوہناں لوکاں دی وی گل منیے جیہڑے سانوں اوہدے حکماں دے خلاف جان لئی کہندے نیں۔—‏اعمال 4:‏18-‏20‏۔‏

3.‏ یہوواہ دی نظر چ ایہہ گل اینی اہم کیوں اے کہ اَسی اوہناں لوکاں دے فرمانبردار رہیے جنہاں نُوں اوہنے اِختیار دِتا اے؟‏

³ شاید سانوں یہوواہ دا فرمانبردار رہنا کسے انسان دے فرمانبردار رہن نالوں زیادہ اسان لگے کیونکہ یہوواہ جیہڑیاں ہدیتاں دیندا اے، اوہ بالکل صحی ہوندیاں نیں۔ (‏زبور 19:‏7)‏ پر انساناں بارے ایہہ گل نئیں کہی جا سکدی۔ ایہدے باوجود ساڈے اسمانی باپ نے ماں پیو، حکومتاں تے کلیسیا دے بزرگاں نُوں اِک حد تک اِختیار دِتا اے۔ (‏امثال 6:‏20؛‏ 1-‏تھسلُنیکیوں 5:‏12؛‏ 1-‏پطرس 2:‏13، 14‏)‏ جدوں اَسی اوہناں دے تابع‌دار رہنے آں تے اصل چ اَسی یہوواہ دی تابع‌داری کر رہے ہنے آں۔ آؤ ایس گل تے غور کرنے آں کہ بھانویں سانوں کدی کدار اوہناں دی گل مننا مشکل لگے پر فیر وی اَسی اوہناں دے فرمانبردار کیویں رہ سکنے آں۔‏

اپنے ماں پیو دے فرمانبردار رہوو

4.‏ بوہت سارے بچے اپنے ماں پیو دی نافرمانی کیوں کردے نیں؟‏

⁴ اَج نوجواناں دے آلے دوالے ایہو جہے نوجوان نیں جیہڑے اپنے ماں باپ دے نافرمان نیں۔ (‏2-‏تیمُتھیُس 3:‏1، 2‏)‏ اوہ اپنے ماں پیو دی نافرمانی کیوں کردے نیں؟ اوہناں نُوں لگدا اے کہ اوہناں دے ماں پیو اوہناں نُوں جو کرن لئی کہندے نیں، اوہ آپ نئیں کردے۔ کجھ نوجوان سوچدے نیں کہ اوہناں دے ماں پیو اوہناں تے کجھ زیادہ ای سختی کر دے نیں یاں اوہناں دے مشورے بوہت پرانے نیں تے ہُن زمانہ بدل گیا اے۔ جے تُسی نوجوان او تے کیہہ توانوں وی اِنج ای لگدا اے؟ بوہت سارے نوجواناں نُوں یہوواہ دے ایس حکم تے عمل کرنا مشکل لگدا اے:‏ اپنے ماں پیو دے فرمانبردار رہوو کیونکہ ایہہ مالک دی نظر چ صحی اے۔ (‏اِفسیوں 6:‏1‏)‏ کیہڑی چیز اپنے ماں پیو دے فرمانبردار رہن چ تواڈی مدد کر سکدی اے؟‏

5.‏ یسوع نے اپنے ماں پیو دے فرمانبردار رہن دی اِک ودھیا مثال کیویں قائم کیتی؟ (‏لُوقا 2:‏46-‏52‏)‏

⁵ یسوع فرمانبردار رہن دی بہترین مثال اے۔ نوجوانو، تُسی اوہدے کولوں اپنے ماں پیو دے فرمانبردار رہنا سکھ سکدے او۔ (‏1-‏پطرس 2:‏21-‏24‏)‏ یسوع بے‌عیب سی پر اوہدے ماں پیو عیب دار سن۔ پر فیر وی اوہنے اوس ویلے وی اوہناں لئی عزت ظاہر کیتی جدوں اوہناں کولوں غلطیاں ہوئیاں تے اوہناں نے اوہنوں غلط سمجھیا۔ (‏خروج 20:‏12)‏ مثال لئی، ذرا اوس واقعے تے غور کرو جدوں یسوع 12 سال دا سی۔ ‏(‏لُوقا 2:‏46-‏52 نُوں پڑھو۔)‏ عید دے بعد جدوں یوسف تے مریم اپنے خاندان نال گھر واپس جا رہے سن تے یسوع یروشلیم چ ای رہ گیا۔ ایہہ یوسف تے مریم دی ذمے‌داری سی کہ اوہ ایس گل دا دھیان رکھدے کہ سارے بچے اوہناں دے نال نیں یاں نئیں۔ پر جدوں اوہناں نُوں یسوع مل گیا تے مریم نے اوہدے تے اِلزام لایا کہ اوہدی وجہ توں ای ساری مشکل کھڑی ہوئی اے۔ یسوع ایہہ کہہ سکدا سی کہ ایہہ نااِنصافی اے۔ پر ایہدی بجائے اوہنے اپنے ماں پیو نُوں بڑے احترام نال جواب دِتا۔ بھانویں کہ یوسف تے مریم اوہدیاں گلاں دا مطلب نئیں سمجھے پر فیر وی اوہ اوہناں دا فرمانبردار رہیا۔‏

6، 7.‏ کیہڑیاں گلاں نوجواناں دی مدد کر سکدیاں نیں کہ اوہ اپنے ماں پیو دے فرمانبردار رہن؟‏

⁶ نوجوانو، کیہہ توانوں اوہدوں اپنے ماں پیو دے فرمانبردار رہنا مشکل لگدا اے جدوں اوہناں کولوں غلطیاں ہوندیاں نیں یاں اوہ توانوں غلط سمجھدے نیں؟ ایس صورتحال چ اوہناں دے فرمانبردار رہن چ کیہڑی چیز تواڈی مدد کر سکدی اے؟ سب توں پہلاں ایہہ سوچو کہ یہوواہ ایس معاملے بارے کیہہ سوچدا اے۔ بائبل چ لکھیا اے کہ جدوں تُسی اپنے ماں پیو دا کہنا من‌دے او تے ایہہ مالک نُوں پسند آندا اے۔ (‏کُلسّیوں 3:‏20‏)‏ جدوں تواڈے امی ابو توانوں صحی طرحاں نئیں سمجھ پاندے یاں اوہ ایہوجہے اصول بناندے نیں جنہاں تے عمل کرنا اسان نئیں ہوندا تے یہوواہ نُوں ایس گل دا پتہ ہوندا اے۔ پر ایہدے باوجود جدوں تُسی اوہناں دا کہنا من‌دے او تے اوہ تواڈے توں خوش ہوندا اے۔‏

⁷ دُوجی گل ایہہ وے کہ اپنے امی ابو دے جذبات بارے سوچو۔ جدوں تُسی اوہناں دی گل من‌دے او تے اوہ خوش ہوندے نیں تے اوہناں دا تواڈے تے بھروسا ودھدا اے۔ (‏امثال 23:‏22-‏25)‏ اِنج تواڈا اوہناں دے نال رشتہ وی مضبوط ہو سکدا اے۔ بیلجیئم چ رہن والا اِک بھرا جدا ناں الیگزینڈر اے، اوہ کہندا اے:‏ ”‏جدوں مَیں اپنے امی ابو دا کہنا مننا شروع کیتا تے اوہناں دے نال میرا رشتہ بہترہو گیا تے مَیں اوہناں دے ہور نیڑے ہو گیا۔“‏b تیجی گل ایہہ وے کہ سوچو کہ جے تُسی ہُن اپنے ماں پیو دے فرمانبردار رہوو گے تے توانوں بعد چوں کیہڑے فائدے ہون گے۔ برازیل چ رہن والا اِک بھرا پاؤلو کہندا اے:‏ ”‏اپنے ماں پیو دا کہنا منن نال مَیں یہوواہ تے اوہناں لوکاں دا فرمانبردار رہنا سکھیا جنہاں نُوں اوہنے اِختیار دِتا اے۔“‏ خدا دے کلام چ ماں پیو دے فرمانبردار رہن دی اِک بڑی چنگی وجہ دَسی گئی اے۔ ایہدے چ لکھیا اے کہ اِنج تُسی سلامت رہوو گے تے زمین تے تواڈی عمر لمی ہووے گی۔—‏اِفسیوں 6:‏2، 3‏۔‏

8.‏ بوہت سارے نوجوان کیس وجہ توں اپنے ماں پیو دے فرمانبردار رہندے نیں؟‏

⁸ بوہت سارے نوجواناں نے ویکھیا اے کہ جدوں اوہناں نے اپنے ماں پیو دا کہنا منیا تے ایہدے کِنّے چنگے نتیجے نکلے۔ برازیل چ رہن والی اِک بھین جدا ناں لوئیزا اے، اوہنوں شروع شروع چ ایہہ گل سمجھ نئیں آندی سی کہ اوہدے امی ابو نے اوہنوں فون رکھن دی اجازت کیوں نئیں دِتی جد کہ اوہدی عمر دے سارے لوکاں کول موبائل سی۔ پر فیر اوہنوں احساس ہویا کہ اوہدے امی ابو اصل چ اوہنوں خطریاں توں بچا رہے سن۔ اوہ کہندی اے:‏ ”‏ہُن مینوں اپنے امی ابو دی گل مننا مشکل نئیں لگدا کیونکہ مَیں سمجھ گئی آں کہ اوہ مینوں جو وی کہندے نیں، اوہ میری آزادی نُوں کھون لئی نئیں سگوں میری حفاظت لئی ہوندا اے۔“‏ امریکہ چ رہن والی اِک نوجوان بھین جدا ناں الزبتھ اے، اوہنوں حالے وی کدی کدار اپنے ماں پیو دی گل مننا مشکل لگدا اے۔ اوہ کہندی اے:‏ ”‏مینوں جدوں وی ایہہ گل سمجھ نئیں آندی کہ میرے امی ابو نے کوئی اصول کیوں بنایا اے تے مَیں اوس ویلے بارے سوچنی آں جدوں اوہناں دے بنائے کسے اصول نُوں منن دی وجہ توں مینوں فائدہ ہویا سی۔“‏ آرمینیا چ رہن والی اِک بھین مونیکا کہندی اے کہ جدوں وی اوہنے اپنے امی ابو دی گل منی تے ایہدے چنگے نتیجے نکلے۔‏

حکومت دے تابع‌دار رہوو

9.‏ حکومت دے قانوناں نُوں منن بارے بوہت سارے لوکاں دی کیہہ سوچ اے؟‏

⁹ بوہت سارے لوک من‌دے نیں کہ حکومتاں دا ہونا ضروری اے تے سانوں اوہناں دے بنائے کجھ قانوناں نُوں مننا چاہی دا اے۔ (‏رومیوں 13:‏1‏)‏ پر اوہی لوک اوہناں قانوناں نُوں نئیں مننا چاہندے جیہڑے اوہناں نُوں پسند نئیں یاں اوہناں دی نظر چ ناجائز نیں۔ ذرا ٹیکس دین بارے سوچو۔ یورپ دے اِک ملک چ بوہت سارے لوک ایہہ سوچدے نیں کہ جے حکومت بوہت زیادہ ٹیکس لاندی اے تے اوہنوں بھرنا ضروری نئیں۔ ایہی وجہ اے کہ اوتھوں دے لوک اوہ سارے ٹیکس نئیں بھردے جیہڑے اوہناں تے لاگو ہوندے نیں۔‏

10.‏ اَسی حکومت دے اوہناں قانوناں نُوں وی کیوں مننے آں جیہڑے سانوں صحی نئیں لگدے؟‏

¹⁰ بائبل چ دَسیا گیا اے کہ حکومتاں انساناں تے مصیبتاں لیاندیاں نیں، ایہہ شیطان دے ہتھ چ نیں تے ایہناں نُوں چھیتی ختم کر دِتا جائے گا۔ (‏زبور 110:‏5، 6؛ واعظ 8:‏9؛‏ لُوقا 4:‏5، 6‏)‏ پر ایہدے چ ایہہ وی دَسیا گیا اے کہ جیہڑا بندہ ایہناں دی مخالفت کردا اے، اوہ خدا دے اِنتظام دی مخالفت کردا اے۔ ایہہ حکومتاں فی‌الحال خدا دی اجازت نال ای قائم نیں تے اوہ چاہندا اے کہ اَسی ایہناں دے فرمانبردار رہیے۔ ایس لئی ایہہ بوہت ضروری اے کہ اَسی اوہناں دا حق ادا کردے رہیے جدے چ ٹیکس دینا، حکومتاں دا احترام کرنا تے ایہناں دے تابع‌دار رہنا شامل اے۔ (‏رومیوں 13:‏1-‏7‏)‏ ہوسکدا اے کہ سانوں لگے کہ کسے قانون نُوں مننا مشکل اے یاں فیر ایہہ ناجائز اے یاں ایہنوں منن نال اَسی پیسے دی تنگی دا سامنا کراں گے۔ پر جدوں تک ایہہ حکومتاں سانوں یہوواہ دے حکماں دے خلاف کجھ کرن لئی نئیں کہندیاں، اَسی اوہناں دے تابع‌دار رہنے آں کیونکہ یہوواہ چاہندا اے کہ اَسی اِنج کریئے۔—‏اعمال 5:‏29‏۔‏

11، 12.‏ یوسف تے مریم نے حکومت لئی فرمانبرداری کیویں ظاہر کیتی تے ایہدے کیہڑے نتیجے نکلے؟ (‏لُوقا 2:‏1-‏6‏)‏ (‏تصویراں نُوں وی ویکھو۔)‏

¹¹ اَسی فرمانبردار رہن بارے یوسف تے مریم کولوں بوہت کجھ سکھ سکنے آں۔ اوہ اوس ویلے وی حکومت دے فرمانبردار رہے جدوں اوہناں لئی اِنج کرنا مشکل سی۔ ‏(‏لُوقا 2:‏1-‏6 نُوں پڑھو۔)‏ جدوں مریم دا نواں مہینہ چل رہیا سی تے اوہدوں حکومت نے اِک ایہو جیہا حکم دِتا جنہوں مننا یوسف تے مریم لئی بوہت مشکل سی۔ روم دے بادشاہ اوگوستُس نے ایہہ حکم دِتا کہ سارے لوک مردم‌شماری لئی اپنے اپنے شہر جان۔ ایس لئی یوسف تے مریم نُوں وی پہاڑی علاقے چ 150 کلو میٹر (‏93 میل)‏ دا سفر کر کے بیت‌لحم جانا سی۔ ایہہ سفر بوہت مشکل سی، خاص کر مریم لئی۔ اوہ ماں تے بچے دی صحت بارے فکرمند ہون گے۔ جے مریم نُوں سفر دے دوران ای درداں لگ جاندیاں تے فیر کیہہ ہوندا؟ اوہدے پیٹ چ اوہ بچہ پل رہیا سی جنہے اَگے چل کے مسیح بننا سی۔ کیہہ ایس وجہ توں اوہ حکومت دا حکم منن توں اِنکار کر سکدے سن؟‏

¹² ایہناں ساریاں فکراں دے باوجود یوسف تے مریم نے حکومت دا کہنا منیا۔ یہوواہ وی اوہناں دی فرمانبرداری توں خوش ہویا تے اوہنے اوہناں دا خیال رکھیا۔ مریم صحی سلامت بیت لحم پہنچ گئی، اوہنے اِک صحت‌مند بچے نُوں جنم دِتا، ایتھوں تک کہ بائبل دی پیشین‌گوئی نُوں وی پورا کرن چ مدد کیتی۔—‏میکاہ 5:‏2۔‏

13.‏ جدوں اَسی حکومت دے فرمانبردار رہنے آں تے ایہدا ساڈے بھین بھراواں نُوں کیہہ فائدہ ہوندا اے؟‏

¹³ جدوں اَسی حکومت دی فرمانبرداری کرنے آں تے ایہدے توں سانوں وی فائدہ ہوندا اے تے دُوجیاں نُوں وی۔ پر کیویں؟ اِک فائدہ تے ایہہ وے کہ اَسی سزا توں بچ جانے آں۔ (‏رومیوں 13:‏4‏)‏ ایہدے علاوہ جدوں یہوواہ دا اِک گواہ حکومت دا فرمانبردار رہندا اے تے حکومت ساڈے سارے ہم‌ایماناں بارے اچھی سوچ رکھدی اے۔ مثال لئی، کئی سال پہلاں نائیجیریا چ ساڈی اِک عبادت‌گاہ چ عبادت دے دوران فوجی اندر وڑھ آئے۔ اوہ اوہناں لوکاں نُوں لبھ رہے سن جیہڑے ٹیکس دین بارے حکومت دے خلاف احتجاج کر رہے سن۔ پر اوہناں دے وڈے افسر نے اوہناں نُوں ایہہ کہہ کے اوتھوں جان لئی کہیا کہ ”‏یہوواہ دے گواہ ہمیشہ ٹیکس دیندے نیں۔“‏ جدوں وی تُسی حکومت دے کسے حکم نُوں من‌دے او تے حکومت دی نظر چ یہوواہ دے گواہواں دی عزت ودھدی اے تے ایسے عزت دی وجہ توں ہوسکدا اے کہ کدی تواڈے کسے ہم‌ایمان نُوں وی مدد ملے۔—‏متی 5:‏16‏۔‏

14.‏ کیہڑے کماں دی وجہ توں اِک بھین نُوں مدد ملی کہ اوہ حکومت دی فرمانبردار رہوے؟‏

¹⁴ ہوسکدا اے کہ سانوں ہمیشاں حکومت دے فرمانبردار رہنا اسان نہ لگے۔ امریکہ چ رہن والی اِک بھین جوانہ کہندی اے:‏ ”‏مینوں حکومت دا فرمانبردار رہنا بڑا مشکل لگدا سی کیونکہ میرے خاندان دے کجھ جیاں نے حکومت دے ہتھوں بڑی نااِنصافی برداشت کیتی سی۔“‏ پر جوانہ نے اپنی سوچ نُوں بدلن لئی بڑی سخت کوشش کیتی۔ سب توں پہلے تے اوہنے سوشل میڈیا تے ایہو جہیاں چیزاں پڑھنیاں چھڈ دِتیاں جنہاں دی وجہ توں اوہدے دل چ حکومت دے خلاف بھیڑیاں گلاں پیدا ہوندیاں سن۔ (‏امثال 20:‏3)‏ دُوجا کم اوہنے ایہہ کیتا کہ اوہنے یہوواہ کولوں دُعا کیتی کہ اوہ چنگے حالات لئی اوہدے تے بھروسا کرے نہ کہ کسے حکومت دے بدلن دا اِنتظار کرے۔ (‏زبور 9:‏9، 10)‏ تیجا کم اوہنے ایہہ کیتا کہ اوہنے ساڈیاں کتاباں تے رسالیاں چوں ایہو جہے مضمون پڑھے جیہڑے طرف‌داری نہ کرن چ اوہدی مدد کر سکن۔ (‏یوحنا 17:‏16‏)‏ ہُن جوانہ کہندی اے کہ حکومت دا احترام کرن تے اوہدے تابع‌دار رہن نال اوہ ”‏بوہت مطمئن“‏ رہندی اے۔‏

یہوواہ دی تنظیم دے تابع‌دار رہوو

15.‏ سانوں کدی کدار یہوواہ دی تنظیم دِیاں ہدیتاں نُوں مننا مشکل کیوں لگ سکدا اے؟‏

¹⁵ یہوواہ سانوں کہندا اے کہ اَسی اوہناں لوکاں دے فرمانبردار رہیے جیہڑے ساڈی پیشوائی کردے نیں۔ (‏عبرانیوں 13:‏17‏)‏ ساڈا رہنما یسوع تے بے عیب اے پر جیہڑے بھراواں نُوں اوہ ساڈی رہنمائی کرن لئی استمال کردا اے، اوہ بے‌عیب نئیں نیں۔ ہوسکدا اے کہ کدی کدار سانوں اوہناں دی گل مننا مشکل لگے، خاص کر اوہدوں جدوں اوہ سانوں کوئی ایہو جیہا کم کرن لئی کہندے نیں جیہڑا اَسی نئیں کرنا چاہندے۔ اِک واری پطرس رسول نال وی اِنج ای ہویا۔ اِک فرشتے نے اوہنوں اوہناں جانوراں دا گوشت کھان لئی کہیا جیہڑے شریعت دے مطابق ناپاک سن۔ اوہنے اِک واری نئیں سگوں تِن واری اوہناں نُوں کھان توں انکار کیتا۔ (‏اعمال 10:‏9-‏16‏)‏ پر کیوں؟ کیونکہ اوہنوں ایہہ نوِیں ہدیت سمجھ نئیں آ رہی سی تے ایہہ ہدیت اوہناں گلاں توں بالکل فرق سی جنہاں نُوں اوہ ساری زندگی توں من‌دا آ رہیا سی۔ جے پطرس نُوں اِک بے عیب فرشتے دی گل نُوں مننا مشکل لگ رہیا سی تے ذرا سوچو کہ سانوں عیب‌دار انساناں دی گل نُوں مننا کِنّاں مشکل لگ سکدا اے۔‏

16.‏ بھانویں کہ اِک واری پولُس نُوں شاید اِک ہدیت صحی نئیں لگی سی پر فیر وی اوہنے کیہہ کیتا؟ (‏اعمال 21:‏23، 24،‏ 26‏)‏

¹⁶ پولُس رسول نے اوس ویلے وی فرمانبرداری ظاہر کیتی جدوں اوہنوں اِک ایہوجہی ہدیت ملی جیہڑی شاید اوہنوں ٹھیک نہ لگی ہووے۔ یہودی مسیحیاں نے پولُس بارے ایہہ افواہواں سُنیاں سن کہ اوہ دوجیاں نُوں موسیٰ دی شریعت توں برگشتہ کر رہیا اے۔ (‏اعمال 21:‏21‏)‏ ایس لئی یروشلیم دے بزرگاں نے اوہنوں ہدیت دِتی کہ اوہ اپنے نال چار بندے لے کے ہیکل جائے تے رسماں دے مطابق اپنے آپ نُوں پاک کرے تے اِنج ثابت کرے کہ اوہ شریعت دے مطابق زندگی گزار رہیا اے۔ بھانویں کہ پولُس جان‌دا سی کہ اوہنے کجھ غلط نئیں کیتا تے مسیحی شریعت دے پابند نئیں نیں۔ پر فیر وی اوہنے فوراً بزرگاں دی ہدیت منی۔ اگلے دن اوہنے اوہناں بندیاں نُوں نال لیا تے رسماں دے مطابق اپنے آپ نُوں اوہناں نال پاک کیتا۔ ‏(‏اعمال 21:‏23، 24،‏ 26 نُوں پڑھو۔)‏ پولُس دے فرمانبردار رہن دی وجہ توں مسیحیاں دا ایکا مضبوط ہویا۔—‏رومیوں 14:‏19،‏ 21‏۔‏

17.‏ تُسی بھین سٹیفنی دے تجربے توں کیہہ سکھیا اے؟‏

¹⁷ اِک واری اِک بھین جدا ناں سٹیفنی اے، اوہنوں تنظیم دے اِک فیصلے نُوں مننا تھوڑا مشکل لگیا۔ اوہ تے اوہدا شوہر دُوجے زبان والے گروپ چ بڑی خوشی نال خدمت کر رہے سن۔ پر فیر برانچ نے اوس گروپ نُوں ختم کر دِتا تے اوس میاں بیوی نُوں اوہناں دی اپنی زبان والی کلیسیا چ واپس گھل دِتا۔ بھین سٹیفنی کہندی اے:‏ ”‏مَیں بالکل وی خوش نئیں ساں۔ مینوں لگدا سی کہ میری اپنی زبان والی کلیسیا چ مبشراں دی اینی ضرورت نئیں اے۔“‏ ایہدے باوجود اوہنے فیصلہ کیتا کہ اوہ ایس ہدیت نُوں منے گی۔ اوہ کہندی اے:‏ ”‏وقت دے نال نال مَیں ویکھیا کہ ایہہ فیصلہ صحی سی۔ ساڈی نوِیں کلیسیا چ ایہوجہے بوہت سارے بھین بھرا سن جنہاں دے خاندان دا کوئی وی جی یہوواہ دا گواہ نئیں سی۔ ایس لئی اَسی اوہناں دا خاندان بن گئے۔ ایہدے علاوہ ہُن مَیں اِک ایہوجہی بھین نُوں بائبل کورس کرا رہی آں جنہے دُبارہ توں یہوواہ دی خدمت کرنی شروع کیتی اے۔ ہُن میرے کول ذاتی مطالعیا کرن لئی وی زیادہ وقت ہوندا اے۔“‏ بھین نے ایہہ وی کہیا:‏ ”‏میرا ضمیر بالکل صاف اے کیونکہ مینوں پتہ اے کہ مَیں تنظیم دی فرمانبردار رہی آں۔“‏

18.‏ فرمانبردار رہن دا سانوں کیہہ فائدہ ہوندا اے؟‏

¹⁸ اَسی فرمانبردار رہنا سکھ سکنے آں۔ یسوع نے وی چنگے حالات چ نئیں سگوں تکلیفاں سہہ کے فرمانبرداری سکھی۔ (‏عبرانیوں 5:‏8‏)‏ یسوع وانگوں اَسی وی اکثر مشکل حالات چ فرمانبردار رہنا سکھنے آں۔ مثال لئی، جدوں کورونا دی وبا دے شروع چ تنظیم نے سانوں کہیا سی کہ اَسی کجھ عرصے لئی بھین بھراواں نال مل کے عبادت نہ کریئے تے گھر گھر جا کے مُنادی نہ کریئے تے کیہہ توانوں ایس ہدیت نُوں مننا مشکل لگیا سی؟ پر جے فیر وی تُسی ایس ہدیت نُوں منیا تے اِنج تُسی محفوظ رہے، کلیسیا دا ایکا مضبوط ہویا تے یہوواہ وی خوش ہویا۔ ہُن اَسی سارے وڈی مصیبت دے دوران ہدیتاں نُوں منن لئی زیادہ چنگی طرحاں تیار ہو گئے آں کیونکہ ہدیتاں نُوں منن نال ای ساڈی جان بچے گی۔—‏ایوب 36:‏11۔‏

19.‏ تُسی فرمانبردار کیوں رہنا چاہندے او؟‏

¹⁹ اَسی سکھ لیا اے کہ فرمانبرداری کرن نال سانوں بوہت ساریاں برکتاں ملدیاں نیں۔ پر اَسی یہوواہ دے فرمانبردار خاص طور تے ایس لئی رہنے آں کیونکہ اَسی اوہنوں پیار کرنے آں تے اوہنوں خوش کرنا چاہنے آں۔ (‏1-‏یوحنا 5:‏3‏)‏ یہوواہ نے سانوں جو کجھ دِتا اے، اوہدے بدلے اَسی اوہنوں کجھ نئیں دے سکدے۔ (‏زبور 116:‏12)‏ پر اَسی اوہدے فرمانبردار ضرور رہ سکنے آں نالے اوہناں لوکاں دے وی جنہاں نُوں اوہنے اِختیار دِتا اے۔ فرمانبردار رہن نال اَسی ظاہر کرنے آں کہ اَسی سمجھ‌دار آں تے سمجھ‌دار لوک یہوواہ دے دل نُوں خوش کردے نیں۔—‏امثال 27:‏11۔‏