-
زندگی دی نعمت لئی قدر وکھاؤخوشیاں بھری زندگی پاؤ—ہُن تے ہمیشاں تک—اِک دلچسپ بائبل کورس
-
-
3. اپنی صحت دا خیال رکھو
یہوواہ دی خدمت کرن والے مسیحی اپنی زندگی اوہدی وڈیائی لئی استمال کردے نیں۔ اوہ اپنی زندگی نُوں اِک طرحاں دی قربانی دے طور تے یہوواہ دے حضور پیش کردے نیں۔ رومیوں 12:1، 2 نُوں پڑھو تے فیر ایہناں سوالاں تے گل بات کرو:
توانوں اپنی صحت دا خیال کیوں رکھنا چاہی دا اے؟
تُسی اپنی صحت دا خیال کیویں رکھ سکدے او؟
-
-
کیہہ تُسی بپتسمہ لین لئی تیار او؟خوشیاں بھری زندگی پاؤ—ہُن تے ہمیشاں تک—اِک دلچسپ بائبل کورس
-
-
سبق نمبر 47
کیہہ تُسی بپتسمہ لین لئی تیار او؟
ہُن تک تُسی بائبل کورس دے دوران یہوواہ خدا بارے بوہت ساریاں گلاں سکھ لیاں نیں۔ شاید تُسی جو کجھ سکھیا اے اوہدے مطابق اپنی زندگی چ کجھ تبدیلیاں وی کیتیاں نیں۔ پر شاید حالے وی کجھ گلاں ہے نیں جنہاں دی وجہ توں تُسی اپنی زندگی یہوواہ دے ناں کرن تے بپتسمہ لین توں گھبرا رہے او۔ ایس سبق چ کجھ ایہو جہیاں رُکاوٹاں بارے گل کیتی جائے گی جیہڑیاں بپتسمہ لین دی راہ چ کھڑیاں ہو سکدیاں نیں۔ ایہدے چ دَسیا جائے گا کہ تُسی اوہناں رُکاوٹاں نُوں کیویں پار کر سکدے او۔
1. بپتسمہ لین توں پہلاں تواڈے کول بائبل دا کِنّاں کوُ علم ہونا چاہی دا اے؟
بپتسمہ لین لئی تواڈے کول سچائی بارے صحی علم ہونا چاہی دا اے۔ (1-تیمُتھیُس 2:4) پر ایہدا ایہہ مطلب نئیں کہ بپتسمہ لین توں پہلاں توانوں ہر اوس سوال دا جواب آنا چاہی دا اے جیہڑا لوک تواڈے کولوں بائبل چوں پچھ سکدے نیں۔ جنہاں مسیحیاں نُوں بپتسمہ لئے ہوئے کئی سال ہو گئے نیں اوہ ہُن تک پاک کلام چوں نوِیاں نوِیاں گلاں سکھ رہے نیں۔ (کُلسّیوں 1:9، 10) پر بپتسمہ لین لئی پاک کلام دی بنیادی تلیم توں واقف ہونا ضروری اے۔ کلیسیا دے بزرگ ایہہ جانن چ تواڈی مدد کرن گے کہ توانوں ایس بنیادی تلیم دا پتہ ہے کہ نئیں۔
2. بپتسمہ لین توں پہلاں توانوں کیہہ کیہہ کرنا چاہی دا اے؟
بپتسمہ لین توں پہلاں ضروری اے کہ تُسی اپنے گُناہواں توں توبہ کرو تے خدا وَل مُڑو۔ (اعمال 3:19 نُوں پڑھو۔) ایہدا مطلب اے کہ توانوں اپنے گُناہواں تے پچھتاوا اے تے تُسی ایہناں لئی یہوواہ کولوں معافی منگی اے۔ نالے تُسی ہر اوس کم توں بچو جیہڑا یہوواہ نُوں پسند نئیں تے اوہدی مرضی مطابق چلن دا پکا ارادہ کرو۔ ایہدے علاوہ عبادتاں تے جاؤ تے کلیسیا دے نال مِل کے مُنادی دے کم چ وی حصہ لوَو۔
3. توانوں بپتسمہ لین توں گھبرانا کیوں نئیں چاہی دا؟
کئی لوک ایس گل توں گھبراندے نیں کہ اوہ یہوواہ نال کیتا ہویا وعدہ پورا نئیں کر سکن گے۔ ایہہ سچ اے کہ کدی کدار تواڈے کولوں غلطیاں ہون گیاں جیویں کہ پرانے زمانے چ خدا دے کجھ وفادار لوکاں کولوں ہوئیاں سن۔ خدا نُوں پتہ اے کہ اَسی مٹی آں تے ساڈے کولوں خطا ہو سکدی اے۔ (زبور 103:13، 14 نُوں پڑھو۔) جدوں اَسی اوہدے حکماں مطابق چلن دی پوری کوشش کرنے آں تے اوہ خوش ہوندا اے تے ساڈی مدد کردا اے۔ یہوواہ اپنے کلام چ سانوں کہندا اے کہ کوئی وی چیز سانوں اوہدی محبت توں وَکھ نئیں کر سکدی۔—رومیوں 8:38، 39 نُوں پڑھو۔
ہور سوچوچار لئی
ویکھو کہ بپتسمے دی راہ چ آن والیاں رُکاوٹاں نُوں پار کرن لئی یہوواہ نُوں ہور چنگی طرحاں جاننا تے اوہدے کولوں مدد لینا ضروری کیوں اے۔
4. یہوواہ خدا نُوں ہور چنگی طرحاں جانو
توانوں بپتسمہ لین توں پہلاں یہوواہ نُوں کِنّی کوُ چنگی طرحاں جاننا چاہی دا اے؟ اینی چنگی طرحاں کہ تُسی اوہنوں دلوں پیار کرو تے اوہنوں خوش کرن والے کم کر سکو۔ ویڈیو چلاؤ تے ویکھو کہ پوری دُنیا چ بائبل کورس کرن والے لوک اِنج کیویں کر رہے نیں۔ فیر ایس سوال تے گل بات کرو:
کجھ لوکاں نے کیہہ کیتا تاکہ اوہ بپتسمہ لین لئی تیار ہو سکن؟
رومیوں 12:2 نُوں پڑھو تے فیر ایہناں سوالاں تے گل بات کرو:
کیہہ تواڈے ذہن چ بائبل دی تلیم بارے کوئی شک اے؟ یاں توانوں لگدا اے کہ یہوواہ دے گواہ سچی تلیم نئیں دیندے؟
جے ہاں تے تُسی ایہدے بارے کیہہ کر سکدے او؟
5. بپتسمے دی راہ چ آن والیاں رُکاوٹاں نُوں پار کرو
جدوں اَسی اپنی زندگی یہوواہ دے ناں کر کے بپتسمہ لینے آں تے سانوں مشکلاں دا سامنا کرنا پیندا اے۔ ایہدی اِک مثال ویکھن لئی ایہہ ویڈیو چلاؤ تے فیر ایہناں سوالاں تے گل بات کرو:
ویڈیو چ وکھائی جان والی عورت نُوں خدا دی خدمت چ کیہڑیاں مشکلاں دا سامنا کرنا پیا؟
یہوواہ نال محبت نے ایہناں مشکلاں تے قابو پان چ اوہدی مدد کیویں کیتی؟
امثال 29:25 تے 2-تیمُتھیُس 1:7 نُوں پڑھو تے فیر ایس سوال تے گل بات کرو:
سانوں رُکاوٹاں تے قابو پان دی ہمت کیویں مِلدی اے؟
6. یہوواہ وَلّوں مِلن والی مدد تے بھروسا رکھو
یہوواہ اوہ کم کرن چ تواڈی مدد کرے گا جنہاں توں اوہ خوش ہوندا اے۔ ویڈیو چلاؤ تے فیر ایہناں سوالاں تے گل بات کرو:
ویڈیو چ جیہڑا بندہ وکھایا گیا اے اوہ بپتسمہ لین توں کیوں گھبرا رہیا سی؟
اوہنے کیہڑی گل سکھی جدی وجہ توں یہوواہ خدا تے اوہدا بھروسا ودھ گیا؟
یسعیاہ 41:10، 13 نُوں پڑھو تے فیر ایس سوال تے گل بات کرو:
تُسی ایہہ یقین کیوں رکھ سکدے او کہ تُسی اپنی زندگی یہوواہ دے ناں کرن دا وعدہ پورا کر سکو گے؟
7. اپنے دل چ یہوواہ دی محبت لئی شکرگزاری نُوں ہور ودھاؤ
جِنّاں زیادہ تُسی ایس گل بارے سوچو گے کہ یہوواہ توانوں کِنّاں پیار کردا اے، اونی ای زیادہ تواڈے دل چ اوہدے لئی شکرگزاری ودھے گی تے تُسی اپنی ساری زندگی جی جان نال اوہدی خدمت کرنا چاہوو گے۔ زبور 40:5 نُوں پڑھو تے فیر ایس سوال تے گل بات کرو:
تُسی یہوواہ دِیاں کیہڑیاں نعمتاں لئی خاص طور تے اوہدے شکرگزار او؟
یرمیاہ نبی نُوں یہوواہ تے اوہدے کلام نال بوہت پیار سی۔ اوہنوں ایس گل تے وی بڑا مان سی کہ اوہ یہوواہ دے ناں توں کہلاندا اے۔ اوہنے کہیا کہ تیریاں گلاں توں میرا دل بڑا خوش ہوندا اے کیونکہ اَے فوجاں دے رب یہوواہ، میں تیرے ناں توں کہلانا واں۔ (یرمیاہ 15:16) ایہناں سوالاں دے جواب دَوو:
یہوواہ دا گواہ ہونا بڑے مان دی گل کیوں اے؟
کیہہ تُسی بپتسمہ لے کے یہوواہ دا گواہ بننا چاہندے او؟
کیہہ کوئی ایہو جہی گل ہے وے جیہڑی توانوں بپتسمہ لین توں روک رہی اے؟
تواڈے خیال چ توانوں کیہہ کرنا چاہی دا اے تاکہ تُسی بپتسمہ لے سکو؟
کجھ لوکاں دی رائے: ”مینوں لگدا اے کہ بپتسمہ لینا اِک بوہت وڈی ذمےداری اے جیہڑی میں پوری نئیں کر سکاں۔“
کیہہ توانوں وی اِنج ای لگدا اے؟
خلاصہ
یہوواہ دی مدد نال تُسی بپتسمے دی راہ چ آن والی ہر رُکاوٹ نُوں پار کر سکدے او۔
دہرائی
بپتسمہ لین لئی تواڈے کول بائبل دا کِنّاں کوُ علم ہونا چاہی دا اے؟
بپتسمہ لین توں پہلاں توانوں اپنی زندگی چ کیہڑیاں تبدیلیاں کرنیاں پین گیاں؟
توانوں بپتسمہ لین توں گھبرانا کیوں نئیں چاہی دا؟
ہور جانن لئی
ایس مضمون چ پڑھو کہ توانوں کیہڑی گل دی وجہ توں بپتسمہ لینا چاہی دا اے۔
کیا آپ بپتسمہ لینے کے لیے تیار ہیں؟ (مینارِنگہبانی، مارچ 2020)
ایس مضمون چ پڑھو کہ تُسی بپتسمے دی راہ چ آن والیاں رُکاوٹاں نُوں کیویں پار کر سکدے او۔
بپتسمے کی راہ میں حائل رُکاوٹوں پر قابو پائیں (مینارِنگہبانی، مارچ 2019)
ایس ویڈیو چ ویکھو کہ اِک بندے نے بپتسمے دی راہ چ آن والیاں رُکاوٹاں نُوں کیویں پار کیتا۔
اِک بندہ جدا ناں عطا اے، اوہ بپتسمہ لین توں گھبراندا سی۔ ایس ویڈیو چ ویکھو کہ اوہ بپتسمہ لین لئی تیار کیویں ہو گیا۔
-