سبق نمبر 21
بادشاہی دی خوشخبری کیویں سنائی جا رہی اے؟
یہوواہ خدا اپنی بادشاہی دے ذریعے ساڈے سارے مسئلے بوہت چھیتی حل کر دَوے گا۔ ایہہ اِک خوشخبری اے جیہڑی سانوں دُوجے لوکاں نُوں سنانی چاہی دی اے۔ یسوع مسیح نے اپنے شاگرداں نُوں حکم دِتا سی کہ اوہ بادشاہی دی خوشخبری دُوجیاں نُوں سنان۔ (متی 28:19، 20) اَج یہوواہ دے گواہ ایس حکم تے کیویں عمل کر رہے نیں؟
1. متی 24:14 چ لکھی پیشینگوئی اَج کیویں پوری ہو رہی اے؟
یسوع مسیح نے کہیا سی کہ بادشاہی دی ایس خوشخبری دی مُنادی ساری دُنیا چ کیتی جائے گی۔ (متی 24:14) اَج یہوواہ دے گواہ پوری دُنیا چ 1000 توں وی زیادہ زباناں چ لوکاں نُوں خوشخبری سنا رہے نیں۔ ظاہر اے کہ ایناں وڈا کم بوہت زیادہ محنت تے چنگے اِنتظام دے بغیر نئیں ہو سکدا۔ ایس لئی اَسی ایہہ اہم کم صرف یہوواہ خدا دی مدد نال ای کر رہے آں۔
2. اَسی لوکاں نُوں بادشاہی دی خوشخبری کیویں سنانے آں؟
اَسی ہر جگہ لوکاں نُوں خوشخبری سنان دی کوشش کرنے آں۔ پہلی صدی دے مسیحیاں وانگوں اَسی گھر گھر جا کے مُنادی کرنے آں۔ (اعمال 5:42) اِنج اَسی ہر سال لکھاں لوکاں نُوں خوشخبری سنانے آں۔ پر کدی کدار لوک اپنے گھر نئیں مِلدے ایس لئی اَسی ایہو جہیاں تھانواں تے وی مُنادی کرنے آں جِتھے لوک ہر ویلے آندے جاندے رہندے نیں جیویں کہ بازار وغیرہ۔ اَسی لوکاں نُوں یہوواہ تے اوہدے مقصد بارے دَسن دا کوئی وی موقع ہتھوں جان نئیں دیندے۔
3. لوکاں نُوں خوشخبری سنانا کدی ذمےداری اے؟
ہر سچے مسیحی دی ذمےداری اے کہ اوہ خوشخبری دی مُنادی کرے۔ ایہہ بوہت ای وڈی تے اہم ذمےداری اے۔ اَسی اپنے حالاتاں مطابق جِنّاں ہو سکے مُنادی دا کم کرن دی کوشش کرنے آں کیونکہ ایہدے ذریعے لوکاں نُوں نجات مِل سکدی اے۔ (1-تیمُتھیُس 4:16 نُوں پڑھو۔) اَسی ایس کم لئی کوئی پیسے نئیں لیندے کیونکہ بائبل چ لکھیا اے کہ تُسی مُفت پایا اے ایس لئی مُفت دَوو۔ (متی 10:7، 8) ایس لئی بھانویں لوک ساڈی گل سنن یاں نہ سنن، اَسی مُنادی دا کم کردے رہنے آں۔ ایہہ کم ساڈی عبادت دا حصہ اے تے ایہدے توں یہوواہ خوش ہوندا اے۔
ہور سوچوچار لئی
سکھو کہ یہوواہ دے گواہ پوری دُنیا چ خوشخبری سنان لئی کیہہ کیہہ کردے نیں تے یہوواہ اوہناں دی مدد کیویں کردا اے۔
دُنیا بھر چ مُنادی دے کم دے کجھ منظر: (1) کوسٹا ریکا، (2) امریکہ، (3) بینین، (4) تھائی لینڈ، (5) یاپ، (6) سویڈن
4. اَسی لوکاں نُوں خوشخبری سنان لئی بڑی محنت کرنے آں
یہوواہ دے گواہ ہر جگہ لوکاں نُوں بادشاہی دی خوشخبری سنان لئی بڑی محنت کردے نیں۔ ویڈیو چلاؤ تے فیر ایس سوال تے گل بات کرو:
یہوواہ دے گواہ مُنادی لئی جیہڑیاں کوششاں کردے نیں، اوہناں بارے توانوں کیہڑی گل سب توں چنگی لگدی اے؟
متی 22:39 تے رومیوں 10:13-15 نُوں پڑھو تے فیر ایہناں سوالاں تے گل بات کرو:
مُنادی دے کم دے ذریعے ایہہ کیویں ظاہر ہوندا اے کہ اَسی دُوجے لوکاں نُوں پیار کرنے آں؟
یہوواہ بادشاہی دی خوشخبری سنان والیاں بارے کیہہ محسوس کردا اے؟—ایت 15 نُوں ویکھو۔
5. اَسی خدا نال کم کرنے آں
ایس گل دے بوہت سارے ثبوت نیں کہ یہوواہ خوشخبری سنان دے کم چ ساڈی مدد کر رہیا اے۔ مثال لئی، ملک نیوزی لینڈ چ ساڈا اِک بھرا پال گھر گھر مُنادی کر رہیا سی۔ اوہدی ملاقات اِک عورت نال ہوئی جنہے اوسے دن دی صبح نُوں یہوواہ دا ناں لے کے دُعا کیتی سی تے ایہہ درخاست کیتی سی کہ کوئی اوہنوں پاک کلام دِیاں سچائیاں سمجھان لئی آئے۔ ایہدے تن گھنٹے بعد ای بھرا پال اوہدے گھر پونچ گیا۔
1-کُرنتھیوں 3:9 نُوں پڑھو تے فیر ایس سوال تے گل بات کرو:
ایس واقعے توں کیویں ظاہر ہوندا اے کہ یہوواہ خوشخبری سنان دے کم چ ساڈی مدد کر رہیا اے؟
اعمال 1:8 نُوں پڑھو تے فیر ایس سوال تے گل بات کرو:
مُنادی دا کم کرن لئی سانوں یہوواہ دی مدد دی لوڑ کیوں اے؟
کیہہ توانوں پتہ اے؟
ہر ہفتے ساڈی اِک عبادت چ سانوں مُنادی دا کم چنگی طرحاں کرن لئی تربیت دِتی جاندی اے۔ جے تُسی ساڈی ایس عبادت تے آئے او تے فیر اوتھے مِلن والی تربیت بارے تواڈا کیہہ خیال اے؟
6. مُنادی کر کے اَسی یہوواہ دا حکم مننے آں
پہلی صدی چ دُشمناں نے یسوع دے شاگرداں نُوں مُنادی کرن توں روکن دی پوری کوشش کیتی۔ پر مسیحیاں نے قانونی طور تے اپنے ایس حق دی حفاظت کیتی تاکہ اوہ آزادی نال مُنادی کر سکن۔ (فِلپّیوں 1:7) اَج یہوواہ دے گواہ وی بالکل اِنج ای کردے نیں۔a
ویڈیو چلاؤ۔
اعمال 5:27-42 نُوں پڑھو تے فیر ایس سوال تے گل بات کرو:
شاید کوئی پچھے: ”یہوواہ دے گواہ گھر گھر جا کے مُنادی کیوں کردے نیں؟“
تُسی ایہدا کیہہ جواب دَوو گے؟
خلاصہ
یسوع مسیح نے اپنے شاگرداں نُوں حکم دِتا سی کہ اوہ ساریاں قوماں دے لوکاں نُوں خوشخبری سنان۔ یہوواہ خدا ایس کم چ اپنے لوکاں دی مدد کر رہیا اے۔
دہرائی
پوری دُنیا چ مُنادی دا کم کیویں ہو رہیا اے؟
مُنادی دے کم توں کیویں ظاہر ہوندا اے کہ اَسی دُوجیاں نُوں پیار کرنے آں؟
تواڈے خیال چ کیہہ مُنادی دا کم کر کے سانوں خوشی مل سکدی اے؟ توانوں اِنج کیوں لگدا اے؟
ہور جانن لئی
ایس ویڈیو چ ویکھو کہ یہوواہ دے گواہ وڈے شہراں چ مُنادی دا کم کیویں کردے نیں۔
پیرس چ ہر طرحاں دے لوکاں نُوں خوشخبری سناؤن دی خاص مہم (11:5)
ایس ویڈیو چ ویکھو کہ یہوواہ دے گواہواں نے اوہناں لوکاں نُوں خوشخبری سنان لئی کیہہ کجھ کیتا اے جیہڑے اپنا ملک چھڈ کے کسے ہور ملک چ پناہ لین آئے نیں۔
ایس ویڈیو چ ویکھو کہ اِک بھین نُوں زیادہ توں زیادہ مُنادی دا کم کرن دی وجہ توں کِنّی خوشی ملی۔
a مُنادی دا کم کرن دی اجازت سانوں یہوواہ خدا نے دِتی اے۔ ایس لئی یہوواہ دے گواہواں نُوں خوشخبری سنان لئی انسانی حکمراناں کولوں اجازت لین دی کوئی ضرورت نئیں۔