2.‏ 1914 توں دُنیا دے حالاتاں تے لوکاں دے رویے توں کیہہ پتہ چلدا اے؟‏

یسوع دے شاگرداں نے اوہنوں پچھیا:‏ تواڈی موجودگی تے دُنیا دے آخری زمانے دی نشانی کیہہ ہوئے گی؟ (‏متی 24:‏3‏)‏ یسوع نے اوہناں نُوں دَسیا کہ جدوں اوہ اسمان تے بادشاہی شروع کرے گا اوہدوں زمین تے حالات وِگڑ جان گے جیویں کہ جنگاں ہون گیاں، کال پین گے تے زلزلے آن گے۔ (‏متی 24:‏7 نُوں پڑھو۔)‏ بائبل چ ایہہ وی پہلاں توں دَسیا گیا سی کہ آخری زمانے چ لوکاں دے بُرے رویے دی وجہ توں مشکل وقت آئے گا۔‏ (‏2-‏تیمُتھیُس 3:‏1-‏5‏)‏ 1914 توں دُنیا دے حالاتاں چ آن والی تبدیلی صاف ویکھی جا سکدی اے۔‏

3.‏ جدوں توں خدا دی بادشاہی نے حکمرانی شروع کیتی اے دُنیا دے حالات اینے وِگڑ کیوں گئے نیں؟‏

یسوع نے بادشاہ بنن توں فوراً بعد اسمان تے شیطان تے اوہدے ساتھیاں نال جنگ کیتی۔ شیطان ایہہ جنگ ہار گیا۔ پاک کلام چ دَسیا گیا اے کہ ایس جنگ دے بعد شیطان نُوں زمین تے سُٹ دِتا گیا تے اوہدے فرشتیاں نُوں وی اوہدے نال سُٹ دِتا گیا۔‏ (‏مکاشفہ 12:‏9، 10،‏ 12‏)‏ ہُن شیطان نُوں پتہ اے کہ اوہنوں بوہت چھیتی ختم کر دِتا جائے گا ایس لئی اوہنے ساری زمین تے اَت چُکی ہوئی اے۔ ایسے وجہ توں اَج زمین تے حالات بوہت وِگڑے ہوئے نیں تے ہر پاسے دُکھ تے تکلیف پھیلی ہوئی اے۔ پر خدا دی بادشاہی بڑی چھیتی حالات صحی کر دَوے گی۔‏