سبق نمبر 50
تواڈا گھرانہ خوش کیویں رہ سکدا اے؟—دُوجا حصہ
اولاد یہوواہ وَلّوں اِک نعمت اے۔ اوہ چاہندا اے کہ ماں پیو ایس نعمت دی قدر کرن۔ بچیاں دا چنگی طرحاں خیال رکھن لئی یہوواہ نے ماں پیو نُوں ودھیا مشورے دِتے نیں۔ اوہنے ایہو جہے مشورے وی دِتے نیں جنہاں تے عمل کر کے بچے وی اپنے گھر دے ماحول نُوں خوشگوار بنا سکدے نیں۔
1. یہوواہ نے ماں پیو لئی کیہڑے مشورے دِتے نیں؟
یہوواہ چاہندا اے کہ ماں پیو اپنے بچیاں نال پیار کرن تے اوہناں نال زیادہ توں زیادہ وقت گزارن۔ اوہ ایہہ وی چاہندا اے کہ ماں پیو اپنے بچیاں دی ہر طرحاں دے نقصان توں حفاظت کرن تے بائبل دے اصولاں مطابق اوہناں دی تربیت کرن۔ (امثال 1:8) بائبل چ ہر پیو نُوں ایہہ نصیحت کیتی گئی اے کہ اوہ یہوواہ وَلّوں اپنے بچیاں دی تربیت تے رہنمائی کرے۔ (اِفسیوں 6:4 نُوں پڑھو۔) یہوواہ ایہو جہے ماں پیو توں بوہت خوش ہوندا اے جیہڑے اوہدیاں ہدیتاں مطابق اپنے بچیاں نُوں پالدے نیں تے اپنی ایہہ ذمےداری کسے ہور دے سر تے نئیں پاندے۔
2. یہوواہ نے بچیاں لئی کیہڑے مشورے دِتے نیں؟
یہوواہ بچیاں نُوں ایہہ نصیحت کردا اے کہ اوہ ہر گل چ اپنے ماں پیو دا کہنا منن۔ (کُلسّیوں 3:20 نُوں پڑھو۔) جدوں بچے اپنے ماں پیو دی عزت کردے نیں تے اوہناں دا کہنا من دے نیں تے یہوواہ وی خوش ہوندا اے تے اوہناں دے ماں پیو وی خوش ہوندے نیں۔ (امثال 23:22-25) یسوع مسیح نے بچیاں لئی بوہت ای ودھیا مثال قائم کیتی۔ یسوع آپ تے گُناہ توں بالکل پاک سی پر فیر وی جدوں اوہ چھوٹا سی تے اوہ اپنے ماں پیو دا فرمانبردار رہیا بھانویں کہ اوہ عیبدار انسان سن۔—لُوقا 2:51، 52۔
3. تُسی اِک خاندان دے طور تے خدا نال دوستی کیویں کر سکدے او؟
جے تواڈے بچے ہے نیں تے تواڈی ایہہ خواہش ضرور ہوئے گی کہ اوہ وی تواڈے وانگوں یہوواہ نال دلوں پیار کرن۔ تُسی اپنے بچیاں دے دل چ یہوواہ لئی پیار کیویں پیدا کر سکدے او؟ ایہدے لئی ضروری اے کہ تُسی [یہوواہ دِیاں گلاں] اپنی اولاد نُوں وار وار سکھاؤ تے گھر بیٹھیاں تے راہ ٹُردیاں ایہناں دا ذکر کریا کرو۔ (اِستثنا 6:7) جدوں تُسی کوئی گل اپنے بچیاں نُوں وار وار سکھاؤ گے تے اوہ اوہناں دے دل تے دماغ چ بیٹھ جائے گی تے فیر اوہ اوہنوں کدی نئیں بُھلن گے۔ ایس لئی ایس ایت دے مطابق توانوں اپنے بچیاں نال یہوواہ بارے گل کرن دا کوئی وی موقع ہتھوں جان نئیں دینا چاہی دا۔ چنگا ہوئے گا کہ تُسی ہر ہفتے لئی اِک دن طے کر لوو جدوں تُسی اپنے خاندان نال مِل کے یہوواہ دی عبادت کرو گے۔ پر جے تواڈے بچے نئیں نیں تے فیر وی ہر ہفتے مِل کے پاک کلام دا مطالعیا کرنا تواڈے لئی بوہت فائدہمند ثابت ہوئے گا۔
ہور سوچوچار لئی
کجھ مشوریاں تے غور کرو جنہاں تے عمل کر کے تواڈا گھرانہ خوش رہ سکدا اے تے مشکلاں تے نقصان توں بچ سکدا اے۔
4. اپنے بچیاں دی تربیت پیار نال کرو
بچیاں دی تربیت کرنا سوکھا کم نئیں اے۔ پر بائبل ماں پیو دی مدد کر سکدی اے۔ یعقوب 1:19، 20 نُوں پڑھو تے فیر ایہناں سوالاں تے گل بات کرو:
ماں پیو بچیاں نال گل بات کردے ویلے پیار محبت کیویں وکھا سکدے نیں؟
ماں پیو نُوں غصے نال بچیاں دی تربیت کیوں نئیں کرنی چاہی دی؟a
5. اپنے بچیاں دی حفاظت کرو
بچیاں دی حفاظت کرن لئی ضروری اے کہ تُسی اپنے ہر بچے نال جنسی معاملیاں بارے گل کرو۔ پر اِنج کرنا شاید تواڈے لئی اسان نہ ہووے۔ ویڈیو چلاؤ تے فیر ایہناں سوالاں تے گل بات کرو:
کجھ ماں پیو لئی اپنے بچیاں نال جنسی معاملیاں بارے گل کرنا مشکل کیوں ہوندا اے؟
کجھ ماں پیو نے اپنے بچیاں نال جنسی معاملیاں بارے گل کیویں کیتی اے؟
پیشینگوئی دے مطابق شیطان دی ایہہ دُنیا دنبدن وِگڑدی جا رہی اے۔ 2-تیمُتھیُس 3:1، 13 نُوں پڑھو تے فیر ایس سوال تے گل بات کرو:
جیہڑے بھیڑے لوکاں دا ذکر 13 ایت چ کیتا گیا اے اوہناں وچوں کجھ لوک بچیاں نال گندے کم کردے نیں۔ ایس لئی ماں پیو لئی ایہہ ضروری کیوں اے کہ اوہ اپنے بچیاں نال جنسی معاملیاں بارے گل کرن تے اوہناں نُوں ایہو جہے بھیڑے لوکاں توں بچنا سکھان؟
کیہہ توانوں پتہ اے؟
یہوواہ دے گواہواں نے کئی مضمون تے ویڈیوز تیار کیتیاں نیں جنہاں دے ذریعے ماں پیو اپنے بچیاں نال جنسی معاملیاں بارے گل کر سکدے نیں تے اوہناں نُوں خطریاں توں بچا سکدے نیں۔ جیویں کہ
6. اپنے ماں پیو دی عزت کرو
بچے بھانویں چھوٹے ہون یاں وڈے، اوہناں نُوں اپنے ماں پیو نال عزت نال گل کرنی چاہی دی اے۔ ویڈیو چلاؤ تے فیر ایہناں سوالاں تے گل بات کرو:
بچیاں نُوں اپنے ماں پیو نال عزت نال گل کرن دا کیہہ فائدہ ہوئے گا؟
بچے اپنے ماں پیو نال عزت نال گل کیویں کر سکدے نیں؟
امثال 1:8 نُوں پڑھو تے فیر ایس سوال تے گل بات کرو:
جدوں ماں پیو اپنے بچے نُوں کوئی نصیحت کردے نیں تے اوہنوں کیہہ کرنا چاہی دا اے؟
7. خاندان دے طور تے یہوواہ دی عبادت کرو
یہوواہ دے گواہ ہر ہفتے لئی اِک دن طے کردے نیں تاکہ اوہ خاندان دے طور تے مِل کے یہوواہ دی عبادت کر سکن۔ خاندانی عبادت چ کیہہ کیہہ کیتا جا سکدا اے؟ ویڈیو چلاؤ تے فیر ایہناں سوالاں تے گل بات کرو:
باقاعدگی نال خاندانی عبادت کرن لئی تُسی کیہہ کر سکدے او؟
ماں پیو کیہہ کر سکدے نیں تاکہ خاندانی عبادت توں سارے جیاں نُوں فائدہ ہوئے تے ساریاں نُوں مزہ وی آئے؟—ایس سبق دی پہلی تصویر نُوں ویکھو۔
تواڈے لئی خاندانی عبادت کرنا مشکل کیوں ہو سکدا اے؟
پرانے زمانے چ یہوواہ نے اِسرائیلی خانداناں نُوں کہیا کہ اوہ مِل کے بِلاناغہ اوہدے کلام چوں گل بات کریا کرن۔ اِستثنا 6:6، 7 نُوں پڑھو تے فیر ایس سوال تے گل بات کرو:
تُسی ایہناں ایتاں چ دِتے گئے اصول تے کیویں عمل کر سکدے او؟
خاندانی عبادت لئی کجھ مشورے:
عبادتاں دی تیاری کرو۔
بائبل چوں کوئی ایہو جیہا واقعہ پڑھو تے اوہدے تے گل بات کرو جیہڑا سارے گھر والیاں نُوں پسند آئے۔
جے بچے چھوٹے نیں تے اوہناں لئی ویبسائٹ jw.org تے حصہ ”بچیاں لئی“ توں اِک مشق ڈاؤنلوڈ یاں پرنٹ کر کے استمال کرو۔
جے بچے نوجوان نیں تے اوہناں نال ویبسائٹ jw.org تے حصہ ”نوجواناں لئی“ چوں کسے مضمون تے گل بات کرو۔
اپنے بچیاں نال بائبل چ لکھے کسے واقعے دی اداکاری کرو۔
ویبسائٹ jw.org توں کوئی ویڈیو ویکھو تے اوہدے تے گل بات کرو۔
کجھ لوکاں دی رائے: ”بچے بائبل دِیاں گلاں نُوں نئیں سمجھ سکدے۔“
تواڈا کیہہ خیال اے؟
خلاصہ
یہوواہ خدا چاہندا اے کہ ماں پیو بچیاں نُوں پیار کرن، اوہناں دی تربیت کرن تے اوہناں دی حفاظت کرن۔ اوہ چاہندا اے کہ بچے اپنے ماں پیو دی عزت کرن تے اوہناں دا کہنا منن۔ نالے ایہہ وی کہ خاندان مِل کے اوہدی عبادت کرن۔
دہرائی
ماں پیو اپنے بچیاں دی تربیت تے حفاظت کیویں کر سکدے نیں؟
بچے اپنے ماں پیو دی عزت کیویں کر سکدے نیں؟
ہر ہفتے خاندانی عبادت لئی وقت کڈھن دے کیہڑے فائدے ہون گے؟
ہور جانن لئی
ایس رسالے چ پڑھو کہ تواڈے بچیاں نُوں کیہڑیاں گلاں سکھنیاں چاہی دِیاں نیں جیہڑیاں وڈے ہو کے وی اوہناں دے کم آن گیاں۔
چھ ایسے سبق جو بچوں کو سیکھنے کی ضرورت ہے (جاگو! نمبر 2، 2019)
بائبل چوں کجھ ایہو جہے مشوریاں تے غور کرو جیہڑے وڈیرے ماں پیو دی دیکھبھال کرن والیاں دے کم آ سکدے نیں۔
پاک کلام چ وڈیرے ماں پیو دی دیکھبھال کرن بارے کیہہ دَسیا گیا اے؟ (ویبسائٹ تے مضمون)
ایس ویڈیو چ ویکھو کہ اِک ایہو جیہا بندہ چنگا پیو کیویں بن گیا جنہوں بچیاں نُوں پالنا اوکھا لگدا سی۔
یہوواہ نے سانوں اپنے بچیاں دی تربیت تے دیکھبھال کرنا سکھایا (58:5)
ایس مضمون چ پڑھو کہ پیو اپنے پُتراں نال اِک مضبوط رشتہ کیویں رکھ سکدے نیں۔
والد اپنے بیٹوں کے ساتھ اپنا رشتہ مضبوط کیسے کر سکتے ہیں؟ (مینارِنگہبانی دا مضمون)
a بائبل دے مطابق تربیت کرن دا مطلب تلیم دینا، رہنمائی کرنا تے درستی کرنا اے۔ ایہدا مطلب بچیاں نُوں مارناکُٹنا یاں اوہناں نال بھیڑا سلوک کرنا نئیں اے۔—امثال 4:1۔